నీవు క్రీస్తువు

ముందుగా, యేసు క్రీస్తునందు విశ్వసించండి.

జీవాహారమైన ప్రసంగము తరువాత, “ఆయన శిష్యులలో అనేకులు” ఆయన బోధనలు మరియు సిద్ధాంతము అంగీకరించడానికి కష్టమైనదిగా కనుగొన్నారు మరియు వారు “వెనుకతీసి, మరి ఎన్నడును ఆయనను వెంబడింపలేదు.” తరువాత రక్షకుడు పన్నెండుమంది వైపు తిరిగి, హృదయవిదారకమైన ప్రశ్నను అడిగారు: “మీరు కూడ వెళ్లిపోవలెనని యున్నారా?”

పేతురు జవాబిచ్చాడు:

“ప్రభువా, యెవని యొద్దకు వెళ్లుదుము? నీవే నిత్యజీవపు మాటలు గలవాడవు.

“… నీవే జీవముగల దేవుని కుమారుడవని, క్రీస్తువని మేము విశ్వసించి యెరిగియున్నాము.”

పేతురు రుజువు చేసినట్లుగా, నమ్మకమనేది “ఒకరియందు విశ్వాసమును కలిగియుండుట లేదా ఏదైనా నిజమని అంగీకరించుట.” మన విశ్వాసము రక్షణకు దారితీయడానికి, అది ప్రభువైన యేసు క్రీస్తునందు కేంద్రీకరించబడాలి. “ఆయన ఉన్నాడనే అభయాన్ని మనము కలిగియుండి, ఆయన [నిజమైన] లక్షణాన్ని [మరియు స్వభావమును] [అర్థం చేసుకొని], ఆయన చిత్తానికి అనుగుణంగా జీవించడానికి ప్రయత్నిస్తున్నామనే జ్ఞానమును మనము కలిగియున్నప్పుడు [యేసు] క్రీస్తు నందు మన విశ్వాసాన్ని … మనము సాధన చేస్తాము.”

మన ప్రియమైన ప్రవక్త, అధ్యక్షులు రస్సెల్ ఎమ్. నెల్సన్ ఇలా ప్రకటించారు, “యేసు క్రీస్తు యందు విశ్వాసము సమస్త నమ్మకానికి పునాది మరియు దైవిక శక్తికి మార్గము.”

పిల్లలు యేసు క్రీస్తునందు వారి విశ్వాసమును బలపరచుకొని, ఆయన దైవిక శక్తిని పొందడానికి మనము ఎలా సహాయపడగలము? మనము చూడవలసినది మన రక్షకుని వైపు మాత్రమే.

“[ప్రభువు] జనులతో ఇలా చెప్తూ మాట్లాడారు:

“ఇదిగో, … యేసు క్రీస్తును నేనే. …

“లేచి నా యొద్దకు రండి. …

“… అంతట సమూహము ముందుకు వెళ్ళి, తమ చేతులతో ఆయన ప్రక్కలను తాకిరి మరియు ఆయన చేతులలో, కాళ్ళలో మేకుల గుర్తులను తడిమి తెలుసుకొనిరి; వారందరు ముందుకు వెళ్ళువరకు ఒకని తరువాత ఒకడు వెళ్ళుచూ వారు దీనిని చేసిరి, వారు తమ కన్నులతో చూచి, చేతులతో తడిమి తెలుసుకొనిరి మరియు ఎవరైతే రావలెనని ప్రవక్తల చేత వ్రాయబడినదో అది నిశ్చయముగా ఆయనేనని తెలుసుకొని, సాక్ష్యమిచ్చిరి.”

ఇప్పుడు చెప్పబడిన సూత్రాలు చిన్న పిల్లల జీవితాలలో ఎలా అన్వయించబడతాయో ఆలోచించమని నేను మిమ్మల్ని ఆహ్వానిస్తున్నాను. యేసు క్రీస్తు మరియు ఆయన సువార్త సాక్ష్యాలను వారు వింటున్నారా? ఆయన పరిచర్య మరియు దైవత్వము యొక్క పూజ్యమైన, ఆరాధనా చిత్రాలను వారు చూస్తున్నారా? ఆయన వాస్తవికతను, దైవత్వమును గురించి పరిశుద్ధాత్మ సాక్ష్యమిచ్చుటను వారు భావించారా మరియు గుర్తించారా? వారు ఆయన సందేశము మరియు పరిచర్య గురించి తెలుసుకున్నారా?

రెండవది, యేసు క్రీస్తుకు మరియు ఆయన సంఘానికి చెందియుండుట

రాజైన బెంజమిన్ యొక్క జనులు హృదయములో బలమైన మార్పును అనుభవించారు మరియు నిబంధన ద్వారా దేవుని చిత్తాన్ని చేయడానికి వారి జీవితాలను సమర్పించుకున్నారు. దేవునితో, యేసు క్రీస్తుతో వారు చేసిన నిబంధన కారణముగా, వారు “క్రీస్తు యొక్క సంతానమని, ఆయన కుమారులు, కుమార్తెలని పిలువబడుదురు.” యేసు క్రీస్తు యొక్క కడవరి-దిన పరిశుద్ధుల సంఘ సభ్యులుగా, మనము ఆయన రాజ్యమును నిర్మించడానికి మరియు ఆయన రాకడ కొరకు సిద్ధపడడానికి నిబంధనపరమైన బాధ్యతను కలిగియున్నాము.

పిల్లలు పవిత్రమైన నిబంధనలు చేసి, పాటించడానికి మనం ఎలా సహాయపడగలము? రండి, నన్ను అనుసరించుడి చేతిపుస్తకము యొక్క అనుబంధము ఎ మరియు బిలో, దేవుని నిబంధన బాటపై జీవితకాలము నిలిచేందుకు పిల్లలను సిద్ధం చేసే పవిత్ర బాధ్యతలో కుటుంబాలను శక్తివంతం చేసే మరియు బోధకులకు, నాయకులకు మద్దతు ఇచ్చే సంభాషణ ప్రారంభాలను, పాఠాలను మనము కనుగొంటాము.

మూడవది, యేసు క్రీస్తు వలె మారుట.

మోర్మన్ గ్రంథములో, రక్షకుడు క్రొత్తగా పిలువబడిన తన శిష్యులను వీలైనంత ఎక్కువగా ఆయనను అనుకరించమని హెచ్చరించారు: “కావున, మీరు ఏ విధమైన మనుష్యులై యుండవలెను? నేను ఉన్నట్లుగానే అని నిశ్చయముగా నేను మీతో చెప్పుచున్నాను.”

బాప్తిస్మము పొంది, నిర్ధారించబడిన పిల్లలు వారిని మరియు ఇతరులను యేసు క్రీస్తు వద్దకు సమకూర్చే వారి నిబంధన బాధ్యతను నెరవేర్చడానికి మనము ఎలా సహాయపడగలము? జీవితకాల శిష్యత్వానికి మనము “వినువారు మాత్రమైయుండక, వాక్యము ప్రకారము ప్రవర్తించువారునై యుండుట” అవసరము.

ప్రభువు యొక్క అతి చిన్న శిష్యులకు ఆహ్వానాలను ఇచ్చినప్పుడు, వారిని నడిపించడానికి, మార్గనిర్దేశాన్ని ఇవ్వడానికి, వారి ప్రక్కన నడవడానికి మరియు మార్గము కనుగొనడంలో వారికి సహాయపడడానికి దయచేసి ప్రతి అవకాశాన్ని వినియోగించుకోండి. వారు బోధించడానికి, సాక్ష్యమివ్వడానికి, ప్రార్థించడానికి లేదా సేవ చేయడానికి సిద్ధపడినప్పుడు, ఈ ప్రశస్థమైన చిన్నపిల్లలకు సలహా ఇవ్వండి, తద్వారా వారు నమ్మకంగా ఉంటారు మరియు వారి బాధ్యతలను నెరవేర్చడంలో ఆనందాన్ని అనుభవిస్తారు. ఇది వారి సంఘమని మరియు రక్షకుని రాకడ కొరకు సిద్ధపడడంలో వారు ముఖ్యమైన పాత్రను కలిగియున్నారని తెలుసుకోవడానికి వారికి సహాయపడడానికి ప్రేరేపించబడిన విధానాలను వెదకండి.

యేసు క్రీస్తు మన జీవితాలకు కేంద్రముగా మారినప్పుడు, మనము ఏమి కోరుతున్నాము మరియు మనము దానిని ఎలా కోరుతున్నాము అనేది శాశ్వతంగా మార్చబడుతుంది. పరివర్తన సమస్తమును మార్చివేస్తుంది! అది “మనము చెడు చేయుటకు ఇక ఏ మాత్రము కోరుకొనక నిరంతరము మంచి చేయుటకు కోరిక కలిగియుండునట్లు” మన స్వభావాన్ని మారుస్తుంది. అది మన సమయాన్ని, మన డబ్బును, మానసిక శక్తిని ఉపయోగించే విధానాన్ని; మనము చదివే దానిని, చూచే దానిని, వినే దానిని మరియు పంచుకొనే దానిని మారుస్తుంది. అది ఒక విశిష్టమైన, విద్యాపరమైన, వృత్తి దిశను నిర్ణయించే ఇంటర్వ్యూలో మనం స్పందించే విధానాన్ని కూడా మారుస్తుంది.

మన జీవితాలలోని ప్రతి మూలలోనికి యేసు క్రీస్తు యొక్క వెలుగును మనము నింపాలి. మన గృహాలలో మరియు ఈ సంఘము యొక్క ప్రతీ సమావేశంలో, ఆయన పూర్వమర్త్య జీవితపు దైవత్వము, ఆయన దైవిక నియమితకార్యము మరియు మరణపు చెరను తప్పించిన ఆయన పునరుత్థానము యొక్క యథార్థతను గూర్చి మనము సాక్ష్యమివ్వని యెడల మన ప్రేమ, సేవ, నిజాయితీ, వినయము, కృతజ్ఞత మరియు కనికరము గురించిన మన సందేశాలు ఆలోచనాపూర్వకంగా జీవించడానికి ప్రోత్సహించే ప్రసంగములు మాత్రమే కాగలవు. యేసు క్రీస్తు లేకుండా మార్చగల శక్తి లేదు, ఆపేక్షించగల ఉద్దేశ్యం లేదు మరియు జీవితపు సవాళ్లను (సువార్త ఉద్దేశ్యాలు మరియు సూత్రాలతో) సమన్వయపరచడం ఉండదు. యేసు క్రీస్తునందు మన శిష్యత్వము తేలికగా మారిన యెడల, అది మన పిల్లలకు గొప్ప ఆపద కలిగించవచ్చు.

మన పిల్లల్ని మనం ప్రేమిస్తున్నామని చెప్పినప్పుడు, పరలోకమందున్న వారి తండ్రి మరియు రక్షకుడైన యేసు క్రీస్తు కూడా వారిని ప్రేమిస్తున్నారని మనము వారికి చెబుతున్నామా? మన ప్రేమ ఆదరణనిచ్చి ప్రేరేపించగలదు, కానీ వారి ప్రేమ పరిశుద్ధపరచగలదు, ఉన్నతస్థితిలో ఉంచగలదు మరియు స్వస్థపరచగలదు..

ఈ యేసు కల్పితమైన యేసు లేదా సరళమైన లేదా భౌతిక శరీరము లేని యేసు లేదా సాధారణమైన యేసు, తెలియని యేసు కాకూడదు, కానీ ఆయన మహిమపరచబడిన, సర్వశక్తిమంతుడైన, పునరుత్థానము చెందిన, ఉన్నతస్థితి పొందిన, పూజింపదగిన, శక్తిమంతుడు, దేవుని యొక్క అద్వితీయ కుమారుడు, ఆయన రక్షించుటకు శక్తిమంతుడు. “రక్షించబడడానికి మనము విలువైనవారము!”, అని ఫిలిప్పీన్స్‌లో ఒక చిన్న బిడ్డ ఒకరోజు సంతోషంగా నాకు సాక్ష్యమిచ్చింది. “[గొప్ప] ప్రాయశ్చిత్తమై యుండుటకు దేవుడు పంపిన” ఆయన పవిత్రమైన మరియు పరిశుద్ధ నామములో, ఆమేన్.