రక్షకుడిని కలుసుకోవడానికి వ్యక్తిగత సిద్ధపాటు

నా ప్రియమైన సహోదర సహోదరీలారా, గత అక్టోబరులో, అధ్యక్షులు రస్సెల్ ఎమ్. నెల్సన్ గారు ఇలా బోధించారు, “మన ప్రభువు మరియు రక్షకుడైన యేసు క్రీస్తు యొక్క రెండవ రాకడ కొరకు సిద్ధపడేందుకు మీకు మరియు నాకు సమయమిదే.” రెండవ రాకడ గురించి అధ్యక్షులు నెల్సన్ మాట్లాడినప్పుడల్లా అది ఆనందకరమైన ఆశావాదంతో కూడియుంటుంది. అయితే, ఇటీవల ప్రాథమికలో ఒక అమ్మాయి రెండవ రాకడ గురించి ప్రస్తావించబడినప్పుడల్లా తాను ఆందోళన చెందుతుందని నాతో చెప్పింది. “యేసు మరల తిరిగి వచ్చేముందు చెడు విషయాలు జరుగుతాయి కాబట్టి నేను భయపడుతున్నాను,” అని ఆమె చెప్పింది.

ఈ విధంగా భావించేది కేవలం పిల్లలు మాత్రమే కాదు. ఆమె కొరకు, మీ కొరకు మరియు నా కొరకు, ఉత్తమమైన సలహా ఏమిటంటే రక్షకుని యొక్క బోధనలను అనుసరించడం. ఆయన సూచనలు మర్మమైనవి లేదా సంక్లిష్టమైనవి కావు. మనం వాటిని అనుసరించినప్పుడు, మనం భయపడాల్సిన అవసరం లేదు లేదా ఆందోళన చెందాల్సిన అవసరం లేదు.

ఆయన మర్త్య పరిచర్య ముగిసే సమయానికి, ఆయన మళ్ళీ ఎప్పుడు వస్తారని యేసు క్రీస్తు అడగబడ్డారు. దానికి సమాధానమిస్తూ, ఆయన రెండవ రాకడ సమయంలో లేదా మనం ఈ లోకాన్ని విడిచిపెట్టే సమయంలో ఆయనను కలుసుకోవడానికి అవసరమైన సిద్ధపాటు గురించి ఆయన మూడు ఉపమానాలను బోధించారు—అవి మత్తయి 25లో నమోదు చేయబడ్డాయి. ఆయనను కలుసుకోవడానికి వ్యక్తిగత సిద్ధపాటు జీవిత ఉద్దేశ్యానికి కేంద్రబిందువుగా ఉన్నందున ఈ బోధనలు చాలా ముఖ్యమైనవి.

రక్షకుడు మొదటిగా పదిమంది కన్యకల ఉపమానమును చెప్పారు. ఈ ఉపమానంలో, పదిమంది కన్యకలు ఒక వివాహ విందుకు వెళ్ళారు. అయిదుగురు బుద్ధిగలవారు తమ దివిటీలను నింపుకోవడానికి నూనె తీసికొనివచ్చారు మరియు అయిదుగురు బుద్ధి లేనివారు అలా చేయలేదు. పెండ్లికుమారుడు త్వరలో వస్తాడని ప్రకటించినప్పుడు, బుద్ధిలేని కన్యకలు నూనె కొనడానికి వెళ్లిపోయారు. వారు తిరిగి వచ్చేసరికి, చాలా ఆలస్యమైంది; విందుకు వెళ్ళడానికి తలుపు మూసివేయబడింది.

ఆ ఉపమానంలో మనకు సహాయపడే మూడు అంశాలను యేసు గుర్తించారు. ఆయన ఇలా వివరించారు:

“ఆ దినమున నేను మహిమతో వచ్చునప్పుడు, పదిమంది కన్యకలను గూర్చి నేను చెప్పిన ఉపమానము నెరవేర్చబడును.

“ఏలయనగా జ్ఞానము కలిగి, సత్యమును స్వీకరించి, పరిశుద్ధాత్మను తమ మార్గదర్శిగా పొందినవారు మోసగించబడలేదు— … కానీ వారు ఆ దినమున నిలిచియుందురని నేను మీతో నిశ్చయముగా చెప్పుచున్నాను.”

మరో మాటలో చెప్పాలంటే, వారు భయపడాల్సిన అవసరం లేదు లేదా ఆందోళన చెందాల్సిన అవసరం లేదు, ఎందుకంటే వారు మనుగడ సాగించి అభివృద్ధి చెందుతారు. వారు విజయం సాధిస్తారు.

మనం బుద్ధిగలవారమైతే, యాజకత్వ విధులు మరియు నిబంధనల ద్వారా యేసు క్రీస్తు సువార్తను అంగీకరించడం ద్వారా మనం సత్యాన్ని స్వీకరిస్తాము. తరువాత, పరిశుద్ధాత్మను నిరంతరం మనతో కలిగియుండేందుకు యోగ్యులుగా ఉండడానికి మనం కృషి చేస్తాము. ఈ సామర్థ్యాన్ని వ్యక్తిగతంగా మరియు స్వయంగా, కొంచెము కొంచెముగా సంపాదించుకోవాలి. స్థిరమైన, వ్యక్తిగతమైన మరియు ఏకాంతమైన భక్తి కార్యాలు మనల్ని నడిపించడానికి పరిశుద్ధాత్మను ఆహ్వానిస్తాయి.

యేసు నొక్కి చెప్పిన మూడవ అంశం మోసాన్ని నివారించడం. రక్షకుడు ఇలా హెచ్చరించారు:

“ఎవడును మిమ్మును మోసపరచకుండ చూచుకొనుడి.

“అనేకులు నా పేరట వచ్చి–నేనే క్రీస్తునని చెప్పి పలువురిని మోసపరచెదరు.”

వేషధారులు ఎన్నుకోబడిన వారిని మోసం చేయడానికి ప్రయత్నిస్తారని మరియు చాలా మంది శిష్యులు మోసపోతారని రక్షకుడికి తెలుసు. దైవిక అనుమతి ఉందని తప్పుగా చెప్పుకునే వారిని మనం నమ్మకూడదు లేదా వంచకులచే బోధించబడే నమ్మదగని లేదా మోసపూరిత మూలాల నుండి జ్ఞానాన్ని కోరుకోకూడదు.

శిష్యుల నుండి మోసగాళ్లను మనం వేరు చేయడమెలాగో మోర్మన్ గ్రంథము మనకు బోధిస్తుంది. శిష్యులు ఎల్లప్పుడూ దేవుణ్ణి విశ్వసించడం, ఆయనను సేవించడం మరియు మంచి చేయడం వంటి వాటిని ప్రోత్సహిస్తారు. రక్షకుని యొక్క నమ్మకమైన శిష్యులైన విశ్వసనీయ వ్యక్తుల నుండి సలహా కోరినప్పుడు మరియు తీసుకున్నప్పుడు మనం మోసపోము.

దేవాలయంలో క్రమం తప్పకుండా ఆరాధించడం ద్వారా కూడా మనం మోసాన్ని నివారించవచ్చు. ఇది మనం నిత్య దృక్పథాన్ని కాపాడుకోవడానికి సహాయపడుతుంది మరియు నిబంధన మార్గం నుండి మన దృష్టిని మరల్చే లేదా మళ్లించే ప్రభావాల నుండి మనల్ని కాపాడుతుంది.

ఈ పదిమంది కన్యకల ఉపమానం యొక్క ముఖ్యమైన ఉపదేశము ఏమిటంటే, మనం సువార్తను అంగీకరించి, పరిశుద్ధాత్మను మనతో కలిగియుండడానికి ప్రయత్నించినప్పుడు మరియు మోసాన్ని నివారించినప్పుడే మనం బుద్ధిగలవారము. అయిదుగురు బుద్ధిగల కన్యకలు నూనె లేని వారికి సహాయం చేయలేకపోయారు; ఎవరూ మన తరఫున సువార్తను అంగీకరించలేరు, పరిశుద్ధాత్మ మార్గదర్శకత్వాన్ని పొందలేరు మరియు మోసాన్ని నివారించలేరు. ఇది మనకై మనం చేసుకోవాలి.

తరువాత రక్షకుడు తలాంతుల ఉపమానమును చెప్పారు. ఈ ఉపమానంలో, ఒక వ్యక్తి ముగ్గురు దాసులకు వేర్వేరు మొత్తాలలో తలాంతులుగా సూచించబడిన ఆస్తిని ఇచ్చాడు. ఒక దాసునికి ఐదు తలాంతులు, మరొక దాసునికి రెండు, మూడవ దాసునికి ఒకటి ఇచ్చాడు. కాలక్రమేణా, మొదటి ఇద్దరు దాసులు తాము పొందిన దానిని రెట్టింపు చేసుకున్నారు. కానీ మూడవ దాసుడు మాత్రం తన ఒక్క తలాంతును పాతిపెట్టాడు. తమ తలాంతులను రెట్టింపు చేసుకున్న ఇద్దరు దాసులతో, ఆ వ్యక్తి ఇలా అన్నాడు, “భళా, … నమ్మకమైన మంచి దాసుడా, నీవు ఈ కొంచెములో నమ్మకముగా ఉంటివి, నిన్ను అనేకమైన వాటిమీద నియమించెదను, నీ యాజమానుని సంతోషములో పాలుపొందుము.”

ఆ వ్యక్తి తన తలాంతును పాతిపెట్టిన దాసుడిని “సోమరివైన చెడ్డ దాసుడా” అని మందలించాడు. ఈ దాసుని యొక్క తలాంతు తీసివేయబడి, అతను వెళ్ళగొట్టబడ్డాడు. అయినా, ఈ దాసుడు తన తలాంతును రెట్టింపు చేసియుంటే, అతను కూడా ఇతర దాసుల మాదిరిగానే ప్రశంసలు మరియు ప్రతిఫలాన్ని పొందేవాడు.

ఈ ఉపమానం యొక్క ఒక సందేశం ఏమిటంటే, మనకు ఇవ్వబడిన సామర్థ్యాలను మనం వృద్ధి చేసుకోవాలని దేవుడు ఆశిస్తున్నారు, కానీ మన సామర్థ్యాలను ఇతరుల సామర్థ్యాలతో పోల్చాలని ఆయన కోరుకోరు. అనిపోల్‌కు చెందిన 18వ శతాబ్దపు హసిడిక్ పండితుడు జుస్యా అందించిన ఈ అంతర్దృష్టిని పరిగణించండి. జుస్యా ఒక ప్రఖ్యాత ఉపాధ్యాయుడు, మరణాన్ని సమీపిస్తున్న కొద్దీ అతడు భయపడడం ప్రారంభించాడు. “బోధకుడా, మీరు ఎందుకు భయపడుతున్నారు? మీరు మంచి జీవితాన్ని గడిపారు; తప్పకుండా దేవుడు మీకు గొప్ప ప్రతిఫలం ఇస్తారు,” అని ఆయన శిష్యులు అన్నారు.

జుస్యా ఇలా అన్నాడు: “దేవుడు నాతో, ‘జుస్యా, నువ్వు మరో మోషే ఎందుకు కాలేదు?’ అని అడిగితే? ‘ఎందుకంటే నువ్వు మోషేకు ఇచ్చినంత గొప్ప ఆత్మను నాకు ఇవ్వలేదు కాబట్టి,’ అని అంటాను. మరియు నేను దేవుని ఎదుట నిలబడినప్పుడు ఆయన, ‘జుస్యా, నువ్వు మరొక సొలొమోను ఎందుకు కాలేదు?’ అని అడిగితే? ‘ఎందుకంటే నువ్వు సొలొమోనుకు ఇచ్చినంత జ్ఞానాన్ని నాకు ఇవ్వలేదు కాబట్టి,’ అని అంటాను. కానీ, అయ్యో నేను నా సృష్టికర్త ఎదుట నిలబడినప్పుడు ఆయన, ‘జుస్యా, నువ్వు మరొక జుస్యా ఎందుకు కాలేదు అని అడిగితే‘ నేను ఏమి చెప్పగలను? నేను నీకిచ్చిన సామర్థ్యానికి తగిన వ్యక్తిగా నువ్వు ఎందుకు కాలేదు?’ అని అడిగితే? అయ్యో, అందుకే నేను భయపడుతున్నాను.”

నిజానికి, దేవుని ద్వారా మనం పొందిన సామర్థ్యాలను వృద్ధి చేసుకోవడానికి రక్షకుని యోగ్యతలు, దయ మరియు కృపపై మనం ఆధారపడకపోతే దేవుడు నిరాశ చెందుతారు. ఆయన ప్రేమపూర్వక సహాయంతో, మనల్ని మనం ఉత్తమమైన వ్యక్తులుగా మార్చుకోవాలని ఆయన ఆశిస్తున్నారు. మనం మన జీవితాలను విభిన్న సామర్థ్యాలతో ప్రారంభించవచ్చు అనేది ఆయనకు సంబంధించినది కాదు. అది మనకు సంబంధించినది.

చివరగా, రక్షకుడు గొఱ్ఱెలు మరియు మేకల ఉపమానాన్ని చెప్పారు. ఆయన తన మహిమతో తిరిగి వచ్చినప్పుడు, “సమస్త జనములు ఆయన యెదుట పోగు చేయబడుదురు; గొల్లవాడు మేకలలోనుండి గొఱ్ఱెలను వేరుపరచునట్లు ఆయన వారిని వేరుపరచి తన కుడివైపున గొఱ్ఱెలను ఎడమవైపున మేకలను నిలువబెట్టును.”

ఆయన కుడి వైపున ఉన్నవారు ఆయన రాజ్యంలో వారసులయ్యారు మరియు ఆయన ఎడమ వైపున ఉన్నవారు వారసత్వాన్ని పొందలేకపోయారు. వారి విశిష్టమైన లక్షణం ఏమిటంటే, వారు ఆయన ఆకలిగా ఉన్నప్పుడు ఆయనకు భోజనము పెట్టారు, దప్పిగొనినప్పుడు దాహమిచ్చారు, ఆయన పరదేశియైయున్నప్పుడు ఆయనను ఇంట చేర్చుకొన్నారు, ఆయన దిగంబరియైయున్నప్పుడు ఆయనకు బట్టలు ఇచ్చారు, ఆయన రోగియైయున్నప్పుడు లేదా చెరసాలలో ఉన్నప్పుడు ఆయనను సందర్శించారు.

కుడి చేయి వైపున ఉన్నవారూ, ఎడమ చేయి వైపున ఉన్నవారూ అందరూ కలవరపడ్డారు. ఆయనకు ఆహారం, పానీయం, దుస్తులు వారు ఎప్పుడు ఇచ్చారో, ఎప్పుడు ఇవ్వలేదో అడిగారు లేక ఆయన దుర్బలంగా ఉన్నప్పుడు ఆయనకు సహాయం చేశామా లేదా అని అడిగారు. ప్రతిస్పందనగా, రక్షకుడు ఇలా అన్నారు, “మిక్కిలి అల్పులైన యీ నా సహోదరులలో ఒకనికి మీరు చేసితిరి గనుక నాకు చేసితిరని నిశ్చయముగా మీతో చెప్పుచున్నాను.”

ఈ ఉపమానం యొక్క సందేశం స్పష్టంగా ఉంది: మనం ఇతరులకు సేవ చేసినప్పుడు, మనం దేవుణ్ణి సేవిస్తాము; మనం అలా చేయనప్పుడు, మనం నిరాశపరుస్తాము. మన వరములు, తలాంతులు మరియు సామర్థ్యాలను పరలోక తండ్రి పిల్లల జీవితాలను ఆశీర్వదించడానికి ఉపయోగించాలని ఆయన ఆశిస్తున్నారు. 19వ శతాబ్దంలో జోహన్ లుడ్విగ్ రూన్‌బర్గ్ అనే ఫిన్నిష్ కవి రాసిన ఒక కవితలో, ఇతరులకు సేవ చేయాలనే దైవిక ప్రేరణ గురించి వివరించబడింది. నేను మరియు నా తోబుట్టువులు మా చిన్నతనంలో “పావో రైతు” అనే కవితను పదే పదే విన్నాము. ఈ కవితలో, పావో అనే ఒక పేద రైతు, తన భార్యా పిల్లలతో మధ్య ఫిన్లాండ్‌లోని సరస్సు ప్రాంతంలో నివసించేవాడు. వరుసగా అనేక సంవత్సరాలు, అతని పంటలు చాలా వరకు నాశనమయ్యాయి, అది వసంతకాలంలో మంచు కరగడం వల్ల వచ్చే ప్రవాహం వల్ల కావచ్చు, వేసవి వడగళ్ల తుఫాను వల్ల కావచ్చు లేదా శరదృతువు ప్రారంభంలో వచ్చే మంచు వల్ల కావచ్చు. పంట తక్కువగా వచ్చిన ప్రతిసారీ , రైతు భార్య, “పావో, పావో, దురదృష్టవంతుడైన వృద్ధుడా, దేవుడు మనల్ని విడిచిపెట్టాడు” అని విలపించేది. బదులుగా, పావో, “పిల్లలకు ఆకలి వేయకుండా ఉండడానికి బెరడును కాయధాన్యం పిండితో కలిపి రొట్టె తయారు చేయి. చిత్తడి నేలలను ఎండబెట్టడానికి నేను మరింత కష్టపడి పనిచేస్తాను. దేవుడు మనల్ని పరీక్షిస్తున్నారు, కానీ ఆయన సమకూరుస్తారు,” అని ధైర్యంగా చెప్పేవాడు.

పంటలు నాశనమైన ప్రతిసారీ, ఆకలిని నివారించడానికి పిండిలో కలిపే బెరడును రెట్టింపు చేయమని పావో తన భార్యను ఆదేశించేవాడు. అతను కూడా మరింత కష్టపడి పనిచేసేవాడు, నేలను ఎండబెట్టడానికి కందకాలు త్రవ్వేవాడు, వసంతకాలంలో వచ్చే నీటి ప్రవాహం వలన మరియు శరదృతువు ప్రారంభంలో వచ్చే మంచు వలన తన పొలాలు ముంపుకు గురయ్యే అవకాశాన్ని తగ్గించేవాడు.

సంవత్సరాల తరబడి కష్టపడిన తర్వాత, చివరకు పావో చాలా సమృద్ధిగా పంటను పండించాడు. అతని భార్య ఉప్పొంగి, “పావో, పావో, ఇవి సంతోషకరమైన సమయాలు! బెరడును పారవేసి, కాయధాన్యం పిండితో మాత్రమే చేసిన రొట్టెలు కాల్చే సమయం ఇది,” అని అన్నది. కానీ పావో యథావిధిగా తన భార్య చేతిని పట్టుకుని, “మన పొరుగువారి పొలాలు మంచుతో నిండిపోయాయి కాబట్టి సగం పిండిని బెరడుతో కలపమని అన్నాడు.” పావో తన మరియు తన కుటుంబ సభ్యుల బహుమానాన్ని త్యాగం చేసి, నిరాశ్రయులైన తన పొరుగువారికి సహాయం చేశాడు.

రక్షకుని గొఱ్ఱెలు మరియు మేకల ఉపమానం యొక్క ఉపదేశము ఏమిటంటే, మనకు ఇవ్వబడిన వరములు—సమయం, తలాంతులు మరియు దీవెనలను—పరలోక తండ్రి పిల్లలకు, ముఖ్యంగా అత్యంత దుర్బలమైన మరియు అవసరంలో ఉన్నవారికి సేవ చేయడానికి ఉపయోగించాలి.

నేను ముందుగా చెప్పిన ఆందోళనతో ఉన్న ప్రాథమిక బాలికకు మరియు మీలో ప్రతి ఒక్కరికీ నా ఆహ్వానం ఏమిటంటే, మీరు యేసు క్రీస్తును అనుసరించండి మరియు ఒక ప్రియమైన స్నేహితుడిలా పరిశుద్ధాత్మను విశ్వసించండి. మిమ్మల్ని ప్రేమించే వారిపై మరియు రక్షకుడిని ప్రేమించే వారిపై ఆధారపడండి. మీ ప్రత్యేక సామర్థ్యాలను అభివృద్ధి చేసుకోవడానికి దేవుని మార్గదర్శకత్వాన్ని వెదకండి మరియు సులభం కానప్పుడు కూడా ఇతరులకు సహాయం చేయండి. మీరు రక్షకుడిని కలుసుకోవడానికి సిద్ధంగా ఉంటారు మరియు ఆనందంగా ఆశావాదంతో ఉండడంలో మీరు అధ్యక్షులు నెల్సన్‌ గారితో చేరగలరు. అలా చేయడం ద్వారా, యేసు క్రీస్తు యొక్క రెండవ రాకడ కొరకు ప్రపంచాన్ని సిద్ధం చేయడంలో మీరు సహాయపడతారు; ఇప్పుడు మరియు భవిష్యత్తులో ప్రభువు యొక్క విశ్రాంతిలోనికి, ఆనందంలోనికి ప్రవేశించడానికి తగినంత నిరీక్షణతో మీరు దీవించబడతారు.

మన కొత్త కీర్తనలలో ఒకదానిలో మనం పాడుతున్నట్లు:

యేసు క్రీస్తు నామములో, ఆమేన్.