కనికరము యొక్క ప్రణాళిక

గత ఏప్రిల్‌లో, సంఘము కర్ట్‌లాండ్ దేవాలయాన్ని సంపాదించిందనే ఆనందకరమైన వార్త తర్వాత వెంటనే, సిద్ధాంతము మరియు నిబంధనలు లోని 109వ ప్రకరణములో నమోదు చేయబడిన కర్ట్‌లాండ్ దేవాలయం యొక్క ప్రతిష్ఠాపన ప్రార్థనను చదవమని అధ్యక్షులు రస్సెల్ ఎమ్. నెల్సన్ గారు మనల్ని ఆహ్వానించారు. “ప్రతిష్ఠాపన ప్రార్థన, ఈ చివరి రోజుల్లో జీవితంలోని సవాళ్లను ఎదుర్కోవడానికి దేవాలయం మీకు మరియు నాకు ఆధ్యాత్మికంగా ఎలా శక్తినిస్తుంది అనేదానిని బోధిస్తుంది” అని అధ్యక్షులు నెల్సన్ చెప్పారు.

109వ ప్రకరణాన్ని మీరు అధ్యయనం చేయడం వల్ల మీకు ఆశీర్వాదకరమైన అంతర్దృష్టులు లభించాయని నేను ఖచ్చితంగా అనుకుంటున్నాను. ఈ సాయంత్రం, మన ప్రవక్త యొక్క ఆహ్వానాన్ని అనుసరించినప్పుడు నేను నేర్చుకున్న కొన్ని విషయాలను పంచుకుంటాను. నా అధ్యయనం శాంతినిచ్చు మార్గానికి నడిపించింది, అది ప్రభువు కనికరము గలవాడని మరియు మన పరలోక తండ్రి యొక్క రక్షణ ప్రణాళిక నిజంగా కనికరము యొక్క ప్రణాళిక అని నాకు గుర్తు చేసింది.

“క్రొత్తగా పిలువబడిన సువార్తికులు వీలైనంత త్వరగా దేవాలయ వరము పొందాలని మరియు పరిస్థితులు అనుమతించినంత తరచుగా దేవాలయానికి హాజరు కావాలని ప్రోత్సహించబడ్డారు,” అని మీకు తెలిసియుండవచ్చు. వరము పొందిన తర్వాత, వారు “సువార్త సేవను ప్రారంభించే ముందు దేవాలయ … సేవకులుగా కూడా పని చేయవచ్చు.”

దేవాలయ నిబంధనల ఆశీర్వాదాలను ప్రపంచంతో పంచుకునే ముందు ఆ నిబంధనల గురించి వారు ఎక్కువగా తెలుసుకుంటున్నప్పుడు, సువార్తికుల శిక్షణా కేంద్రము (MTC) లోకి ప్రవేశించే ముందు దేవాలయంలో గడిపే సమయం కొత్త సువార్తికులకు ఒక అద్భుతమైన ఆశీర్వాదం కాగలదు.

అయితే, 109వ ప్రకరణాన్ని అధ్యయనం చేస్తున్నప్పుడు, దేవాలయంలో, దేవుడు క్రొత్త సువార్తికులను—నిజానికి, మనందరినీ—అదనపు, పవిత్రమైన మార్గంలో శక్తివంతం చేస్తారని నేను నేర్చుకున్నాను. బయల్పాటు ద్వారా ఇవ్వబడిన ప్రతిష్ఠాపన ప్రార్థనలో జోసెఫ్ ఇలా ప్రార్థించారు, “నీ నామమును గూర్చి సాక్ష్యమిచ్చుటకు నీ సేవకులు నీ మందిరమునుండి బయలు వెళ్ళునప్పుడు”, “జనులందరు”—“గొప్పవారు, బీదలందరు, అవసరతలో ఉన్నవారు, కష్టాలు అనుభవిస్తున్నవారందరి” … “హృదయములు సున్నితమగును గాక.” “వారి తొందరపాటు నిర్ణయములు సత్యమునకు మార్గమునిచ్చి, అందరి దృష్టిలో నీ జనులు అనుగ్రహమును పొందెదరు గాక; తద్వారా భూదిగంతములన్నియు నీ సేవకులమైన మేము నీ స్వరమును వింటిమనియు, నీవు మమ్ములను పంపియున్నావనియు తెలుసుకొందురు గాక,” అని ఆయన ప్రార్థించారు.

క్రొత్తగా పిలువబడిన సువార్తికునికి ఇది ఒక అందమైన వాగ్దానం—తొందరపాటు నిర్ణయములు “సత్యమునకు మార్గమునివ్వడం,” “అందరి దృష్టిలో అనుగ్రహం పొందడం” మరియు “వారు ప్రభువుచేత పంపబడ్డారని లోకము తెలుసుకోవడం”. మనలో ప్రతి ఒక్కరికీ ఖచ్చితంగా ఈ ఆశీర్వాదాలు అవసరం. మనం పొరుగువారితో మరియు సహోద్యోగులతో సంభాషించేటప్పుడు హృదయాలు మృదువుగా ఉండడం ఎంత ఆశీర్వాదకరం! దేవాలయంలో మనం గడిపే సమయం ఇతరుల హృదయాలను ఎలా మృదువుగా చేస్తుందో ప్రతిష్ఠాపన ప్రార్థన ఖచ్చితంగా వివరించలేదు, కానీ ప్రభువు యొక్క మందిరంలో గడిపే సమయం యేసు క్రీస్తు మరియు ఆయన కనికరంపైకి మన దృష్టిని మళ్ళించడం ద్వారా మన స్వంత హృదయాలను ఎలా మృదువుగా చేస్తుందనే దానితో ఇది ముడిపడి ఉందని నేను నమ్ముతున్నాను.

నేను కర్ట్‌లాండ్ ప్రతిష్ఠాపన ప్రార్థనను అధ్యయనం చేస్తున్నప్పుడు, జోసెఫ్ మళ్ళీ మళ్ళీ కనికరము కోసం వేడుకున్నారని తెలిసి ఆశ్చర్యపోయాను—సంఘ సభ్యుల కోసం, సంఘము యొక్క శత్రువుల కోసం, దేశ నాయకుల కోసం, భూమిపై ఉన్న దేశాల కోసం. మరియు చాలా వ్యక్తిగతంగా, తనను జ్ఞాపకం చేసుకోవాలని మరియు తన ప్రియమైన ఎమ్మాపై, వారి పిల్లలపై కనికరము చూపాలని ఆయన ప్రభువును వేడుకున్నారు.

ఒక వారం తరువాత, 1836, ఏప్రిల్ 3, ఈస్టరు ఉదయాన కర్ట్‌లాండ్ దేవాలయంలో, రక్షకుడు ఆయనకు మరియు ఆలీవర్ కౌడరీకి కనిపించి, సిద్ధాంతము మరియు నిబంధనలు యొక్క 110వ ప్రకరణములో నమోదు చేయబడినట్లుగా, “నేను ఈ మందిరమును అంగీకరించితిని, నా నామము ఇక్కడ ఉండును; కరుణతో ఈ మందిరములో నా జనులకు నన్ను నేను ప్రత్యక్షపరచుకొందును” అని చెప్పినప్పుడు జోసెఫ్ ఎలా భావించియుండవచ్చో కదా. కనికరము యొక్క ఈ వాగ్దానం జోసెఫ్‌కు ప్రత్యేక అర్థాన్ని కలిగియుండవచ్చు. మరియు గత ఏప్రిల్‌లో అధ్యక్షులు నెల్సన్ బోధించినట్లుగా, ఈ వాగ్దానం “నేడు ప్రతిష్ఠించబడిన ప్రతీ దేవాలయానికి వర్తిస్తుంది.”

ప్రభువు యొక్క మందిరంలో మనలో ప్రతి ఒక్కరూ కనికరమును పొందగలిగే మార్గాలు చాలా ఉన్నాయి. ఒక గుడారాన్ని నిర్మించి, దాని మధ్యలో “కరుణాపీఠము”ను ఉంచమని ప్రభువు మొదట ఇశ్రాయేలును ఆజ్ఞాపించినప్పటి నుండి ఇది నిజమైయుంది. దేవాలయంలో, మనం చేసే నిబంధనలలో మనం కనికరమును కనుగొంటాము. బాప్తిస్మపు నిబంధనతో పాటు, ఆ నిబంధనలు మనల్ని తండ్రితో, కుమారునితో బంధిస్తాయి మరియు “హెబ్రీయ భాషలో హెసెడ్ అని పిలువబడే … ఒక ప్రత్యేక రకమైన ప్రేమ మరియు కనికరము” అని అధ్యక్షులు నెల్సన్ బోధించిన దానికి మనకు అధిక ప్రాప్తిని ఇస్తాయి.

నిత్యత్వము కొరకు మన కుటుంబాలతో ముద్రవేయబడే అవకాశంలో మనం కనికరమును కనుగొంటాము. సృష్టి, పతనము, రక్షకుని ప్రాయశ్చిత్త త్యాగము మరియు మన పరలోక తండ్రి సన్నిధిలోకి మళ్ళీ ప్రవేశించగల మన సామర్థ్యము—రక్షణ ప్రణాళికలోని ప్రతీ భాగము—కనికరము యొక్క ప్రత్యక్షతలని కూడా మనం దేవాలయంలో మరింత స్పష్టతతో అర్థం చేసుకుంటాము. నిజానికి, రక్షణ ప్రణాళిక అనేది సంతోష ప్రణాళిక అని చెప్పవచ్చు, ఎందుకంటే అది “కనికరము యొక్క ప్రణాళిక.”

110వ ప్రకరణములో ప్రభువు తన దేవాలయాలలో తననుతాను కనికరముతో ప్రత్యక్షపరచుకుంటానని ఇచ్చిన అందమైన వాగ్దానానికి నేను కృతజ్ఞుడిని. జోసెఫ్ లాగా మనం కూడా కనికరము కోసం వేడుకున్నప్పుడల్లా ప్రభువు కనికరముతో తననుతాను ఎలా ప్రత్యక్షపరచుకుంటారనే దాని గురించి అది బయల్పరచిన దానికి కూడా నేను కృతజ్ఞుడిని.

కనికరము కోసం ఆయన చేసిన విజ్ఞప్తులలో, 109వ ప్రకరణములో జోసెఫ్ స్మిత్ కనికరము కోసం చేసిన విజ్ఞప్తి బయల్పాటుకు పురికొల్పడం ఇదే మొదటిసారి కాదు. పరిశుద్ధ వనము‌లో, యౌవనుడైన జోసెఫ్ ఏ సంఘము నిజమైనదో తెలుసుకోవడానికి మాత్రమే ప్రార్థించలేదు, కానీ అతడు “కనికరము కోసం ప్రభువును ప్రార్థించాడు, ఎందుకంటే నేను కనికరము పొందడానికి మరెవరి దగ్గరకు వెళ్ళలేను” అని కూడా అతడు చెప్పాడు. ఏదో ఒక విధంగా, ప్రభువు మాత్రమే అందించగల కనికరము తనకు అవసరమని అతను గుర్తించడం పరలోకపు వాకిండ్లను తెరవడానికి సహాయపడింది. మూడు సంవత్సరాల తరువాత, దేవదూత మొరోనై కనిపించాడు, ఆ తర్వాత జోసెఫ్ “తన పాపములు, దోషములన్నింటికి సర్వశక్తిమంతుడగు దేవుడిని క్షమాపణ కోరుటకు ప్రార్థించాడు.”

కనికరము కోసం విజ్ఞప్తి చేసిన తర్వాత వచ్చిన బయల్పాటు యొక్క ఈ నమూనా లేఖనాల్లో సుపరిచితమైనది. క్షమాపణ కోసం ప్రార్థించిన తర్వాతే ఈనస్ ప్రభువు యొక్క స్వరాన్ని విన్నాడు. రాజైన లమోనై తండ్రి యొక్క పరివర్తన, “నిన్ను తెలుసుకొనుటకు నా పాపములన్నిటినీ నేను వదిలివేసెదను” అనే అతని ప్రార్థనతో ప్రారంభమవుతుంది. మనం ఇలాంటి నాటకీయ అనుభవాలతో ఆశీర్వదించబడకపోవచ్చు, కానీ కొన్నిసార్లు ప్రార్థనకు జవాబులు పొందడానికి ఇబ్బంది పడేవారికి, ప్రభువు యొక్క కనికరమును కోరుకోవడం అనేది పరిశుద్ధాత్మ సాక్ష్యాన్ని అనుభవించడానికి గల అత్యంత శక్తివంతమైన మార్గాలలో ఒకటి.

మొరోనై 10:3–5లో ఇలాంటి సూత్రమే అందంగా బోధించబడింది. నిజాయితీగల ప్రార్థన ద్వారా, మోర్మన్ గ్రంథము నిజమైనదో కాదో మనం తెలుసుకోవచ్చని బోధించడానికి మనం తరచుగా ఈ వచనాలను సంక్షిప్తీకరిస్తాము. కానీ ఈ సంక్షిప్తీకరణ కనికరము యొక్క ముఖ్యమైన పాత్రను విస్మరించవచ్చు. మొరోనై తన ఉద్బోధను ఎలా ప్రారంభిస్తాడో వినండి: “మీరు ఈ సంగతులను చదివినప్పుడు, … ఆదాము యొక్క సృష్టి నుండి మీరు ఈ సంగతులను అందుకొను సమయము వరకు నరుల సంతానముపట్ల ప్రభువు ఎంత కనికరముతోనుండెనో మీరు జ్ఞాపకము చేసుకొనవలెనని, దానిని మీ హృదయములలో ధ్యానించవలెనని నేను మీకు ఉద్బోధించుచున్నాను.”

మొరోనై ఈ విషయాలను—తాను ముద్రవేయబోయే గ్రంథాలను—చదవమని మాత్రమే మనల్ని కోరడం లేదు, కానీ “నరుల సంతానముపట్ల ప్రభువు ఎంత కనికరముతోనుండెనో” అనే దాని గురించి మోర్మన్ గ్రంథము బయల్పరిచే దానిని మన హృదయాలలో ధ్యానించమని కూడా కోరుతున్నాడు. అంటే, “ఇవి సత్యమా కాదా అని నిత్యుడగు తండ్రియైన దేవుడిని క్రీస్తు యొక్క నామమందు అడగడానికి” మనల్ని సిద్ధం చేసే ప్రభువు యొక్క కనికరము గురించి ధ్యానించడం.

మనం మోర్మన్ గ్రంథాన్ని ధ్యానించినప్పుడు, మనం ఇలా అడగవచ్చు: ఆల్మా బోధించినట్లుగా, ఈ భూమిపై నివసించిన ప్రతీ వ్యక్తి పునరుత్థానం చెందుతారని మరియు “వారి పరిపూర్ణ రూపమునకు పునఃస్థాపించబడతారని” దేవుని కనికరము యొక్క ప్రణాళిక హామీ ఇస్తుంది అనేది నిజంగా నిజమేనా? అమ్యులెక్ చెప్పినది నిజమేనా—రక్షకుని కనికరము నిజంగా మనం చెల్లించాల్సిన న్యాయము యొక్క అన్ని కఠినమైన, నిజమైన అక్కరలను సంతృప్తిపరచగలదా మరియు దానికి బదులుగా “మనల్ని భద్రత యొక్క బాహువులందు [చుట్టుగలదా]?”

ఆల్మా సాక్ష్యమిచ్చినట్లుగా, క్రీస్తు మన పాపాల కోసం మాత్రమే కాకుండా మన “బాధలు మరియు శ్రమల” కోసం బాధపడ్డారు, తద్వారా “వారి బలహీనతలను బట్టి తన జనులను ఎట్లు ఆదరించవలెనో … ఆయన ఎరుగును” అనేది నిజమేనా? రాజైన బెంజమిన్ బోధించినట్లుగా, ప్రభువు నిజంగా అంత కనికరముగలవాడా, ఉచిత బహుమానంగా, “దేవుని చిత్తము తెలియకనే మరణించియున్నవారు లేదా అజ్ఞానము వలన పాపము చేసియున్న వారి పాపముల కొరకు కూడా ఆయన ప్రాయశ్చిత్తము చేసారా”?

లీహై చెప్పినట్లుగా, “మనుష్యులు ఉనికిలోనికి వచ్చునట్లు, వారు సంతోషమును కలిగియుండునట్లు ఆదాము పతనమాయెను” అనేది నిజమేనా? యెషయాను వ్యాఖ్యానిస్తూ, అబినడై సాక్ష్యమిచ్చినట్లుగా, యేసు క్రీస్తు “మన అతిక్రమక్రియలనుబట్టి గాయపరచబడెను, మన దోషములనుబట్టి నలుగగొట్టబడెను; మన సమాధానార్థమైన శిక్ష అతనిమీద పడెను; అతడు పొందిన దెబ్బలచేత మనకు స్వస్థత కలుగుచున్నది” అనేది నిజంగా నిజమేనా?

మొత్తం మీద, మోర్మన్ గ్రంథములో బోధించబడినట్లు తండ్రి యొక్క ప్రణాళిక నిజంగా అంత కనికరము గలదా? అది నిజమేనని మరియు మోర్మన్ గ్రంథములో కనికరము యొక్క శాంతినిచ్చే ఆశాజనకమైన బోధనలు నిజమని నేను సాక్ష్యమిస్తున్నాను.

మీరు విశ్వాసంతో చదివి ప్రార్థించినప్పటికీ, పరలోక తండ్రి “వాటి సత్యమును పరిశుద్ధాత్మ శక్తి ద్వారా మీకు ప్రత్యక్షపరచును” అనే మొరోనై వాగ్దానాన్ని గ్రహించడానికి ఇంకా కొందరు ఇబ్బంది పడుతున్నారని నేను అనుకుంటున్నాను. చాలా సంవత్సరాల క్రితం, నేను మోర్మన్ గ్రంథాన్ని చదివిన మొదటి రెండుసార్లు నా ప్రార్థనలకు తక్షణమే స్పష్టమైన సమాధానం లభించనప్పుడు నేను దానిని అనుభవించాను కాబట్టి, నాకు ఈ పోరాటం తెలుసు.

మీరు ఇబ్బంది పడుతుంటే, “నరుల సంతానముపట్ల ప్రభువు ఎంత కనికరముతోనుండెనో” అని మోర్మన్ గ్రంథము బోధించే అనేక విధాలను ధ్యానించమనే మొరోనై సలహాను అనుసరించమని నేను మిమ్మల్ని ఆహ్వానిస్తున్నాను. నా అనుభవం ఆధారంగా, మీరు అలా చేసినప్పుడు, పరిశుద్ధాత్మ యొక్క శాంతి మీ హృదయంలోకి ప్రవేశించగలదని, మోర్మన్ గ్రంథము మరియు అది బోధించే కనికరము యొక్క ప్రణాళిక నిజమని మీరు తెలుసుకోగలరని, నమ్మగలరని మరియు అనుభూతి చెందగలరని నేను ఆశిస్తున్నాను.

తండ్రి యొక్క కనికరము యొక్క గొప్ప ప్రణాళికకు మరియు దానిని అమలు చేయడానికి రక్షకుని సంసిద్ధతకు నేను నా కృతజ్ఞతను తెలియజేస్తున్నాను. మనం ఆయనను వెదికితే ఆయన తన పరిశుద్ధ దేవాలయంలో మరియు మన జీవితంలోని ప్రతీ భాగంలో కనికరముతో తననుతాను ప్రత్యక్షపరచుకుంటారని నాకు తెలుసు. యేసు క్రీస్తు నామములో, ఆమేన్.