విశ్వాసము: నమ్మకం మరియు విధేయత యొక్క బంధం

క్రీస్తు నందు విశ్వాసం కలిగియుండడం అంటే అర్థమేమిటి? మనం ఆయనను నమ్ముతున్నాం లేదా ఆయన నిజమనే సాక్ష్యాన్ని కలిగియున్నాం అని దానర్థమా? అది ఒక ప్రారంభం కావచ్చు, కానీ అది అంతకు మించినది. విశ్వాసం అంటే నమ్మకం అని మీరు ఎప్పుడైనా ఆలోచించారా? మీరు బాగా నమ్మే ఒక వ్యక్తి గురించి ఆలోచించండి—బహుశా ఒక కుటుంబ సభ్యుడు లేదా ఒక స్నేహితుడు. మీరు వారిని ఎందుకు నమ్ముతారు? బహుశా మీరు వారి స్థిరమైన ప్రేమను మరియు సహాయాన్ని చూడడం వలన కావచ్చు.

క్రీస్తు నందు మనం విశ్వాసం కలిగియున్నప్పుడు, మనం ఆయన దీవెనలను గుర్తిస్తాం మరియు ఆయనతో ఒక నమ్మకమైన బంధాన్ని పెంపొందించుకుంటాం.

విశ్వాసం అనేది మనం యేసు క్రీస్తును నమ్మినప్పుడు మొలకెత్తుతుందని మరియు మనం ఆయనపట్ల నమ్మకంగా, విధేయతతో ఉన్నప్పుడు వికసిస్తుందని గమనించండి. మీరు క్రీస్తుతో నిజమైన సంబంధాన్ని కోరుకుంటే, నిబంధనలు చేయడం ద్వారా మరియు వాటిని విశ్వాసంతో, విధేయతతో గౌరవించడం ద్వారా ఆయనకు చూపించండి. యేసు క్రీస్తుతో నిబంధనలు చేయడం నిరీక్షణను పెంచుతుంది. వాటిని గౌరవించడం విశ్వాసాన్ని పెంచుతుంది.

ఒక వ్యక్తిగత ఉదాహరణ చెబుతాను: నా చిన్నతనంలో, ఒక రోజు మా అమ్మ ఒంటరిగా ఏడుస్తూ కనిపించింది. ఎందుకు ఏడుస్తున్నావని నేను ఆమెను అడిగినప్పుడు, ఆమె సున్నితంగా, “నువ్వు మంచి అబ్బాయివి కావాలి” అని చెప్పింది. ఆమె బాధకు కారణం నేను కాదని తెలిసినప్పటికీ, నేను మా అమ్మను చాలా ప్రేమించాను, నమ్మాను మరియు ఆమె జీవితంలో కష్టాన్ని తగ్గించాలనుకున్నాను. కాబట్టి, కన్నీళ్లతో మరియు తొమ్మిదేళ్ల పిల్లవాడికి ఉండే పూర్తి గంభీరతతో, నేను ఎల్లప్పుడూ ఉత్తమ కొడుకుగా ఉండడానికి మరియు ఆమె గర్వపడేలా చేయడానికి ప్రయత్నిస్తానని ఆ రోజు ఆమెకు వాగ్దానం చేసాను.

ఆ వాగ్దానం నాపై ఎంత శక్తిని కలిగి ఉండేదో—ఇంకా ఎంత శక్తిని కలిగి ఉందో—మీరు ఊహించగలరా?

ఆమెతో చేసిన ఆ వాగ్దానం నా జీవితాన్ని నడిపిస్తుంది. నిర్ణయాలు తీసుకునే ముందు, నా చర్యలు ఆమెను సంతోషపరుస్తాయో లేదో నేను ఆలోచిస్తాను. ఈ వాగ్దానం యొక్క బంధం మరియు మా అమ్మతో ఉన్న సంబంధం నా జీవితమంతా నా ప్రవర్తనకు లంగరులుగా నిలిచాయి.

చాలా సంవత్సరాల తరువాత, నేను యేసు క్రీస్తు గురించి బాగా తెలుసుకున్నప్పుడు, నా విశ్వాసాన్ని ఆయనపై ఎలా ఆధారం చేసుకోవాలో నాకు అప్పటికే తెలుసు. నేను ప్రభువుతో నిబంధనలు చేసాను మరియు నేను వాటిని గౌరవించడానికి ప్రయత్నించినప్పుడు, ఆయన నా పాపాలను క్షమించారు, నా జీవితాన్ని నడిపించారు మరియు పూర్తిగా “తన ప్రేమతో నన్ను నింపారు”. క్రీస్తు నాలో ఆయన పట్ల లోతైన ప్రేమను, గౌరవాన్ని మరియు విధేయతను నింపారు.

“విశ్వాసం అనేది క్రియా సూత్రము” అని మరియు “విశ్వాసములేకుండ [దేవునికి] ఇష్టుడైయుండుట అసాధ్యము” అని మీకు అర్థమైందా?

మీరు దేవునికి ఇష్టమైనది చేయడానికి ప్రయత్నించినప్పుడు, ఐగుప్తులో పోతీఫరు భార్య చేత శోధించబడినప్పుడు యోసేపు చెప్పినట్లుగా మీరు ఇలా చెప్తారు: “కాబట్టి నేనెట్లు ఇంత ఘోరమైన దుష్కార్యము చేసి దేవునికి విరోధముగా పాపము కట్టుకొందును?” మరియు వ్యతిరేకతను ఎదుర్కొన్నప్పుడు, మీరు యువ ప్రవక్త జోసెఫ్‌లా ఇలా చెప్తారు: “దానిని నేనెరుగుదును, దేవుడు దానిని యెరిగియున్నాడని నేనెరుగుదును, దానిని నేను తృణీకరించలేను … ఆవిధముగా చేయుట వలన దేవుని బాధించెదనని నేనెరుగుదును.”

కాబట్టి యేసు క్రీస్తుపై విశ్వాసం అనేది విధేయతతో మరియు ప్రేమతో ఏర్పడిన నమ్మకం యొక్క బంధం. మరో మాటలో చెప్పాలంటే, కనికరముతో కూడిన దేవుని ప్రేమ (హెసెడ్) పట్ల కృతజ్ఞతగా, మనం ఆయన ఆజ్ఞలను పాటించడం ద్వారా విధేయతతో కూడిన మన ప్రేమను (ఎమునా) చూపిస్తాము.

“నా ఆజ్ఞలను అంగీకరించి వాటిని గైకొనువాడే … నా తండ్రివలన ప్రేమింపబడును; నేనును వానిని ప్రేమించి, వానికి నన్ను కనబరచుకొందును,” అని క్రీస్తు వాగ్దానమిచ్చారు. మీరు ఆయనకు విధేయులుగా ఉండడానికి కట్టుబడి ఉంటే, ఆయన మీ పట్ల తన ప్రేమను ప్రదర్శిస్తారు.

కానీ ఆయన అద్భుతాలు అవసరమయ్యే ప్రతికూల పరిస్థితులపట్ల మీరు ఎలా స్పందించాలి? సవాళ్లు అనివార్యమైనవి మరియు కొన్నిసార్లు భయానకమైనవి అయినప్పటికీ, “ప్రతి ఆలోచనలో నా వైపు చూడుడి; సందేహించవద్దు, భయపడవద్దు” అని 2025 ఎఫ్‌ఎస్‌వై ఇతివృత్తం ఆహ్వానించినట్లుగా, ఆయన వైపు ధైర్యంగా నడవండి.

ధైర్యంగా ఆయన వైపు మీరెలా నడవగలరు?

మీరు తెలియని ప్రాంతంలో అన్వేషకుడిగా ఉన్నారని ఊహించుకోండి. మీ ముందున్న అడ్డంకులను అధిగమించడానికి, మీకు వెలుగు అవసరం. దేవుని పట్ల మీ విశ్వాసం మరియు ఆయనతో మీ నిరంతర సంభాషణలు మీ లాంతరుకు ఇంధనం. కాబట్టి మీరు చీకటిని, ప్రమాదకరమైన పరిస్థితులను ఎదుర్కొన్నప్పుడు, వాటి వైపు గుడ్డిగా నడవడానికి బదులుగా, అనిశ్చిత మార్గంలో ఆశా కిరణాలను వెదజల్లడానికి మీరు క్రీస్తుపై విశ్వాసమనే నూనెతో నిండిన మీ దీపాన్ని వెలిగిస్తారు. మీ గత అనుభవాలు, ప్రభువు మీ ప్రయాణంలో మిమ్మల్ని ఆదుకుంటారనే మీ నిరీక్షణను పెంచుతాయి.

నా యౌవన స్నేహితులారా, మేము మిమ్మల్ని ఎంతో ప్రేమిస్తున్నాము మరియు నమ్ముతున్నాము! మీరు దేవుని కుటుంబానికి చెందినవారు మరియు నిబంధన సంతానము. యేసు క్రీస్తును విశ్వసించండి మరియు నమ్మండి. ఆయన మిమ్మల్ని నిజంగా తన శిష్యులుగా మారేలా చేస్తారు.

యేసు క్రీస్తుతో మీ అనుబంధాన్ని పెంచుకోవడాన్ని నేడే ప్రారంభించమని నేను మిమ్మల్ని ఆహ్వానిస్తున్నాను. ఆయనను ఎప్పటికీ విడిచిపెట్టకూడదని ఒప్పందం చేసుకోండి.

క్రీస్తుపై మీకున్న విధేయత, ప్రేమ మరియు నమ్మకం ఆయన మాదిరిగా మీ వ్యక్తిత్వాన్ని మరియు గుర్తింపును రూపొందిస్తాయి. మీరు సాతాను దాడులను అధిగమించడానికి ఆత్మవిశ్వాసాన్ని, బలాన్ని పొందుతారు. మరియు మీరు తప్పులు చేసినప్పుడు, మీరు ఆయన క్షమాపణ కోసం ఆరాటపడతారు. చివరగా, భవిష్యత్తు కోసం మీ నిరీక్షణ ప్రకాశవంతంగా ఉంటుంది. ఆయన సన్నిధికి తిరిగి వచ్చే శక్తితో సహా, ఆయన మీ నుండి ఆశించేది ఏదైనా సాధించడానికి మీకు తన శక్తినివ్వడానికి ఆయన మిమ్మల్ని నమ్ముతారు.

“విమోచించు ప్రేమ గీతమును” పాడడం నుండి మరియు “ఆయన ప్రేమ యొక్క బాహువులలో శాశ్వతముగా చుట్టబడియుండుట” నుండి వచ్చే ఆనందాన్ని నేను మీకు సాక్ష్యమిస్తున్నాను. యేసు క్రీస్తు యొక్క పవిత్ర నామములో, ఆమేన్.