Ko e Fāmili Mātiní

Naʻe fakaʻuli foki ʻa Helevēsio Mātini ki ʻapi mei he ngāué ʻi Lio ti Senelo, Palāsila. Naʻe fonu ʻa e halá ʻi he ngaahi kaá pea naʻe ʻikai lava ha taha ʻo ngaue. Naʻe fakakaukau ʻa Helevēsio ki heʻene moʻuí. Naʻá ne maʻu ha ngāue lelei. Naʻá ne ʻofa ʻi hono uaifi ko Lutá, mo ʻene fānau ʻe toko ua ko Mākisi mo Malisá. Ka naʻá ne ongoʻi hangē ne ʻi ai ha meʻa ne molé.

Kau Māʻoniʻoní, 4:275–76

Naʻe hifo ʻa Helevēsio mei heʻene kaá ʻo kamata ke lotu. Naʻá ne pehē, “ʻE Hoku ʻOtua, ʻoku ou ʻiloʻi ʻokú ke ʻi ha feituʻu, ka ʻoku ʻikai ke u ʻilo pe ko e fē.” Naʻá ne fakahā ki he Tamai Hēvaní ʻoku fekumi hono fāmilí ki ha meʻa, pea naʻa nau fiemaʻu ʻEne tokoní. Naʻe heka leva ʻa Helevēsio ki heʻene kaá ʻo foki ki ʻapi.

Kau Māʻoniʻoní, 4:276–77

Kimui ange aí, naʻe fekauʻi atu ʻe he ʻEikí ha kau faifekau mei he ʻIunaiteti Siteití. Naʻa nau ʻaʻahi ki he fāmili Mātiní. Naʻe fakatokangaʻi ʻe Helevēsio naʻa nau ʻomi ha laumālie melino ki hono ʻapí. Naʻá ne ʻiloʻi, ʻi he taimi ko iá, naʻe ʻikai faʻa tokangaʻi lelei ʻi he ʻIunaiteti Siteití ʻa e kakai naʻe kili lanu fakapōpōʻulí. Naʻá ne fehuʻi ange, “Ko e hā ʻa e fakafōtunga homou tui fakalotú ki he kakai ʻUliʻulí?”

Kau Māʻoniʻoní, 4:277–78

Naʻe fakamatalaʻi ange ʻe he ongo faifekaú ʻe lava ke papitaiso kotoa e fānau ʻa e ʻOtuá. Ka ʻi he taimi ko iá, naʻe ʻikai lava ʻe he kakai ʻUliʻuli ʻoku ʻi ai honau ngaahi kui mei ʻAfiliká, ʻo maʻu ʻa e lakanga fakataulaʻeikí pe lahi taha ʻo e ngaahi tāpuaki ʻo e temipalé. Naʻe maʻu ʻe Helevēsio mo Luta ha toe ngaahi fehuʻi lahi ange. Naʻe fakahoko ʻe he ongo faifekaú hona lelei tahá ke tali ia.

Kau Māʻoniʻoní, 4:278

Naʻe lotu ʻa e kau palōfitá ʻi ha ngaahi taʻu lahi ke ʻiloʻi ʻa e taimi ʻe lava ke foaki ai ʻa e ngaahi tāpuaki ʻo e lakanga fakataulaʻeikí mo e temipalé ki he kakai kotoa pē.

Kau Māʻoniʻoní, 4:86

Naʻe fakakaukau ʻa Helevēsio mo Luta ke na ʻahiʻahi ʻalu ki he lotú. Naʻe angaʻofa mo angalelei ʻaupito ʻa e Kāingalotu aí. Naʻe saiʻia ʻa e fāmili Mātiní ʻi he meʻa naʻa nau ako ʻi he lotú.

Kau Māʻoniʻoní, 4:278–79

ʻI ha ʻaho ʻe taha, ʻi heʻenau foki mai mei he lotú, naʻe talaange ʻe Mākisi ki hono fāmilí naʻá ne fakatokangaʻi ʻoku nau fiefia ange. Naʻe pehē ange ʻe Mākisi, “ʻOku ou ʻilo ʻa e meʻa ʻoku tupu mei aí. Ko e ongoongolelei ʻo Sīsū Kalaisí.” Naʻe ʻiloʻi ʻe he toenga ʻo e fāmilí naʻe moʻoni ʻa Mākisi. Naʻa nau fili ke papitaiso mo hilifakinima.

Kau Māʻoniʻoní, 4:279

Hili ha ngaahi taʻu mei ai, naʻe femoʻuekina e Kāingalotu ʻi Palāsilá ʻi hono langa ha temipalé. Naʻe fiefia ʻa e fāmili Mātiní, ka naʻa nau toe loto-mamahi foki. He ʻikai ke nau lava ʻo hū ki he temipalé hili hono fakatapuí. Naʻe talaange ʻe Helevēsio kia Luta, “ʻOua te ke tokanga ki ai. ʻOku ʻafioʻi ʻe he ʻEikí ʻa e meʻa kotoa.”

Kau Māʻoniʻoní, 4:350–51

Naʻe ʻikai faingofua ke kei faivelenga. Naʻe fakakata ʻaki ʻe he kakaí ʻa e fāmili Mātiní. Naʻa mo honau ngaahi kaungāmeʻá naʻe ʻikai mahino kiate kinautolu ʻa e ʻuhinga naʻa nau nofo ai ʻi he Siasí. Ka naʻe ʻiloʻi ʻe Helevēsio mo hono fāmilí ko e Siasi ia ʻo Sīsū Kalaisí.

Kau Māʻoniʻoní, 4:301–02

ʻI ha ʻaho ʻe taha, ʻi he taimi ne foki mai ai ʻa Helevēsio mei he ngāué, naʻe talaange ʻe Luta, “ʻOku ou maʻu ha ongoongo, ko ha ongoongo fakafiefia!” Hili ha ʻaukai mo ha lotu lahi, naʻe maʻu ʻe he palōfitá, Palesiteni Sipenisā W. Kimipolo ha fakahā. Naʻe fakahā ange ʻe he ʻOtuá ʻe lava ʻe ha taha pē, neongo pe ko e hā ʻa e lanu honau kilí, ʻo maʻu ʻa e tāpuaki kotoa ʻo e lakanga fakataulaʻeikí mo e temipalé.

Fanongonongo Fakamafaiʻi 2; Kau Māʻoniʻoní, 4:381–82

Naʻe tatali fuoloa ʻa e fāmili Mātiní mo ha niʻihi kehe tokolahi. Ko ʻeni kuo ʻosi ʻa e tatalí! Naʻe maʻu ʻe Helevēsio mo Mākisi ʻa e lakanga fakataulaʻeikí. Naʻe silaʻi ʻa Helevēsio, Luta, mo ʻena fānaú ko ha fāmili ʻi he temipalé. Te nau lava ʻi he taimí ni ʻo maʻu ʻa e ngaahi tāpuaki kotoa ʻo e ongoongoleleí.

Kau Māʻoniʻoní, 4:382–83