“Faingataʻa ʻi Mīsulí,” Ngaahi Talanoa ʻo e Tokāteline mo e Ngaahi Fuakavá (2024)
“Faingataʻa ʻi Mīsulí,” Ngaahi Talanoa ʻo e Tokāteline mo e Ngaahi Fuakavá
Siulai 1831–Siulai 1833
Faingataʻa ʻi Mīsulí
Ko e tauhi ke mālohi ʻa e tuí ʻi he ngaahi taimi fakatuʻutāmakí
Naʻe tokolahi ha Kāingalotu naʻe omi ke nofo ʻi Tauʻatāina, Mīsuli. Naʻe finangalo ʻa e ʻEikí ke nau langa ai ʻa e kolo ko Saioné. Ka naʻe ʻikai ke feʻofoʻofani ʻa e Kāingalotú mo e kakai naʻa nau ʻosi nofoʻi ʻa Tauʻatāiná. Naʻe lahi ʻa e ngaahi meʻa naʻa nau loto kehekehe aí. Naʻe ʻita ha kakai ʻe niʻihi ʻi he koló pea nau loto ke mavahe ʻa e Kāingalotú.
Tokāteline mo e Ngaahi Fuakava 57:1–3; Kau Māʻoniʻoní, 1:187–91
Ko ʻEtuate Pātilisi naʻe pīsope ʻi Tauʻatāiná. Naʻá ne haʻu ki ha fakataha mo e kau taki ʻo e koló. Naʻa nau pehē ʻe pau ke mavahe ʻa e Kāingalotú mei Tauʻatāina. Naʻe ʻiloʻi ʻe Pīsope Pātilisi naʻe finangalo ʻa e ʻOtuá ke langa ʻe he Kāingalotú ʻa Saione ʻi Tauʻatāina. Naʻá ne talaange he ʻikai lava ke mavahe ʻa e Kāingalotú.
Kau Māʻoniʻoní, 1:193
Naʻe kamata ke holoki ʻe he kau tangata loto-ʻitá ʻa e tukui ʻapi mo e ʻū fale naʻe langa ʻe he Kāingalotú.
Naʻe ʻave ʻe he kau tangatá ʻa Pīsope Pātilisi mo ha tangata ʻe taha ko Sālesi ʻĀlani mei hona ʻapí. Naʻa nau toho ʻa e ongo tangatá ki he loto koló.
Kau Māʻoniʻoní, 1:196
Naʻe pehē ʻe Pīsope Pātilisi, “Kapau kuo pau ke u mamahi koeʻuhí ko ʻeku tui fakalotú, ʻoku ʻikai ke toe kehe ia mei he meʻa kuo fai ʻe he niʻihi kehe ʻi muʻa ʻiate aú.” Naʻe tekeʻi ʻe he kau tangatá ʻa Pīsope Pātilisi mo Sālesi ki he kelekelé. Naʻa nau vali ‘aki hona sinó kotoa ha valitā vela mo ha fulufuluʻi moa.
Kau Māʻoniʻoní, 1:196–97
Naʻe fanongo ʻa Uiliami Makalelini, ko ha mēmipa ʻo e Siasí ʻi Tauʻatāina, fekauʻaki mo e meʻa naʻe fai ʻe he kakai loto-ʻitá. Naʻá ne ilifia peá ne lele ki he loto vao ʻakaú ʻo toitoi.
Kau Māʻoniʻoní, 1:199
Naʻe fifili ʻa Viliami pe ko e hā ʻa e meʻa ʻe hoko kapau ʻe ʻilo ia ʻe he kau tangata loto-ʻitá. Te ne kei pehē nai ʻoku moʻoni ʻa e Tohi ʻa Molomoná, neongo kapau te nau feinga ke tāmateʻi ia?
Kau Māʻoniʻoní, 1:199–200
Naʻe ʻiloʻi ʻe he ongo kaungāmeʻa ko ʻŌliva Kautele mo Tēvita Uitemaá ʻa Viliami ʻi he loto vao ʻakaú. Naʻe ʻiloʻi ʻe Viliami naʻe tui ʻa ʻŌliva mo Tēvita ki he Tohi ʻa Molomoná. Naʻe fakahā ange ʻe ha ʻāngelo kiate kinaua ʻa e ʻū lauʻi peleti koulá. Naʻe fehuʻi ange ʻe Viliami, “Talamai angé, ʻoku moʻoni nai ʻa e Tohi ʻa Molomoná?”
Kau Māʻoniʻoní, 1:200
Naʻe talaange ʻe ʻŌliva mo Tēvita kia Viliami, ʻoku moʻoni ʻa e Tohi ʻa Molomoná. Naʻá na talaange neongo kapau ʻe feinga ʻa e kau tangata loto-ʻitá ke tāmateʻi kinaua, he ʻikai teitei tuku ʻena vahevahe ʻena fakamoʻoní mo e kakaí. Naʻe pehē ange ʻe Viliami, “ʻOku ou tui kiate kimoua.”
Tokāteline mo e Ngaahi Fuakava 17:3–6; Kau Māʻoniʻoní, 1:200