“ʻOku ʻOhofi ʻa Siosefa mo Sitenei,” Ngaahi Talanoa ʻo e Tokāteline mo e Ngaahi Fuakavá (2024)
“ʻOku ʻOhofi ʻa Siosefa mo Sitenei,” Ngaahi Talanoa ʻo e Tokāteline mo e Ngaahi Fuakavá
Fēpueli 1832
ʻOku ʻOhofi ʻa Siosefa mo Sitenei
ʻOku feinga ha kakai loto-ʻita ke taʻofi e ngāue ʻa e palōfita ʻo e ʻOtuá
Naʻe saiʻia ha kakai ʻe niʻihi ʻi he meʻa naʻe akoʻi ʻe Siosefa Sāmita fekauʻaki mo e Tamai Hēvaní, Sīsū Kalaisi, mo hēvaní. Ka naʻe ʻikai saiʻia e kakai kehé ʻi he meʻa naʻá ne akoʻí. Naʻe ʻita hanau niʻihi pea nau loto ke taʻofi ʻa Siosefa mei heʻene faiakó.
Tokāteline mo e Ngaahi Fuakava 76; Kau Māʻoniʻoní, 1:163
ʻI ha pō ʻe taha, naʻe ʻā fuoloa ai ʻa Siosefa ʻo tokoni kia ʻEma ke tokangaʻi ha taha ʻo ʻena ongo kiʻi pēpē māhanga naʻe ohi maí. Naʻe puke lahi ʻa e pēpeé.
Kau Māʻoniʻoní, 1:164
Naʻe ʻave ʻe ʻEma ʻa e pēpeé peá ne talaange kia Siosefa ke mālōlō. Naʻe pau ke ne malanga ʻi he pongipongí. Naʻe faifai pea mohe fakatouʻosi ʻa Siosefa mo ʻEma.
Kau Māʻoniʻoní, 1:164
Fakafokifā pē kuo ava hake ʻa e matapaá, pea lele mai ha kau tangata loto-ʻita ki he lokí. Naʻe kikī ʻa ʻEma ʻi hono puke ʻe he kau tangatá e ongo nima, vaʻe, mo e ʻulu ʻo Siosefá. Naʻa nau toho ia ki tuʻa mei he falé.
Kau Māʻoniʻoní, 1:164
Naʻe feinga ʻa Siosefa ke homo mei he kau tangatá, ka naʻa nau puke maʻu ia. Naʻe sio ʻa Siosefa naʻe toho foki ʻe he kau tangatá hono kaungāmeʻa ko Sitenei Likitoní mei hono ʻapí.
Kau Māʻoniʻoní, 1:164–65
Naʻe haehae ʻe he kau tangatá ʻa e vala ʻo Siosefá pea nau lingi ha valitā vela mo pikipiki ʻi hono kilí mo e ʻulú. Naʻa nau fakapipiki leva ha fulufuluʻi moa ʻiate ia pea nau hola.
Kau Māʻoniʻoní, 1:165
Hili e mavahe ʻa e kau tangatá, naʻe toe foki ʻa Siosefa ki fale. Naʻe ilifia ʻa ʻEma ʻi heʻene sio kia Siosefá. Naʻe fanongo e ngaahi kaungāmeʻa naʻe nofo ofi maí ki he meʻa naʻe hokó pea nau fakavave mai ke tokoni. Naʻe vau ʻe ʻEma ʻa e valitaá mei he kili ʻo Siosefá. Naʻe tokoni ʻa ʻEma mo hono ngaahi kaungāmeʻá ke tokangaʻi ʻa Siosefa mo Sitenei, ʻi he toenga ʻo e poó.
Tokāteline mo e Ngaahi Fuakava 25:5; Kau Māʻoniʻoní, 1:166–67
ʻI he ʻaho hono hokó, naʻe kei mamahi lahi pē ʻa Siosefa. Ka naʻá ne teuteu pea ne akoʻi ha falukunga kakai fekauʻaki mo Sīsū Kalaisi. Naʻe fanongo ha niʻihi ʻo e kau tangata naʻa nau ʻohofi iá ki heʻene faiakó. Kimui ange ʻi he ʻaho ko iá, naʻe papitaiso ʻe Siosefa ha toko tolu. Naʻá ne kei fai pē ʻa e ngāue ʻa e ʻEikí, ʻo aʻu ki he taimi naʻe feinga ai ʻa e kakaí ke taʻofi iá.
Tokāteline mo e Ngaahi Fuakava 24:8; Kau Māʻoniʻoní, 1:167