“Ko e Tānaki Fakataha ki ʻOhaioó,” Ngaahi Talanoa ʻo e Tokāteline mo e Ngaahi Fuakavá (2024)
“Ko e Tānaki Fakataha ki ʻOhaioó,” Ngaahi Talanoa ʻo e Tokāteline mo e Ngaahi Fuakavá
Tīsema 1830–Mē 1831
Ko e Tānaki Fakataha ki ʻOhaioó
Ko e tui ʻa Lusi Sāmitá mo ha mana
ʻI ʻOhaioó, naʻe fakaʻau ke tokolahi ange ʻa e kakai naʻe kau ki he Siasí. Naʻe fakahā ʻe he ʻEikí kia Siosefa Sāmita, ko e Kāingalotu ʻoku nofo ʻi he ngaahi feituʻu kehé ʻoku totonu ke nau fakatahataha ki ʻOhaiō. Ko ha fononga lōloa ia. Ka naʻe talaʻofa ʻe he ʻEikí ʻi he hili ʻenau tānaki fakatahá, te Ne akoʻi ʻEne fonó ki he Kāingalotú mo tāpuakiʻi kinautolu ʻaki ʻa e mālohi ke fai ʻEne ngāué.
Tokāteline mo e Ngaahi Fuakava 37; 38:32; Kau Māʻoniʻoní, 1:118–120
Naʻe mavahe ʻa e faʻē ʻa Siosefa ko Lusí, mo ha kulupu kāingalotu ʻo e Siasí ʻe toko 80 nai mei honau ngaahi ʻapí ʻi Niu ʻIoke, ʻo hiki ki ʻOhaiō. Naʻa nau heka ʻi ha vaka te ne ʻave kinautolu ʻi ha konga ʻo e fonongá. Hili ʻenau fononga ʻi ha ngaahi ʻaho siʻi, naʻe pau ke tuʻu ʻa e vaká. Naʻe hoko ʻa e matolu ʻa e ʻaisí ʻi he vaí ke taʻofi ai ʻenau fonongá.
Kau Māʻoniʻoní, 1:132–22
Naʻe pau ke tatali ʻa e Kāingalotú ke movete ʻa e ʻaisí. Naʻa nau ongosia, fiekaia, viviku, mo mokosia.
Kau Māʻoniʻoní, 1:133
Naʻe faingataʻa ke nau tatali. Naʻe kamata ke fakakikihi ha niʻihi ʻo e Kāingalotú ʻiate kinautolu pē.
Kau Māʻoniʻoní, 1:133
Naʻe ʻikai ke saiʻia ʻa Lusi he fanongo ki he fakakikihi ʻa e Kāingalotú. Naʻá ne ʻiloʻi naʻe fiemaʻu ke ne lea. Naʻá ne fehuʻi ange, “Ko fē hoʻomou tuí?” Naʻe talaange ʻe Lusi ki he Kāingalotú kapau te nau lotu ki he ʻOtuá, te Ne veteki ʻa e ʻaisí kae lava ke hoko atu ʻenau fonongá.
Kau Māʻoniʻoní, 1:133
Naʻe fakafokifā pē kuo nau fanongo ki ha longoaʻa hangē ha maná, ʻi he mavaeua ʻa e ʻaisí. Naʻe ʻatā ha hala ʻi he ʻaisí, ʻo fālahi feʻunga ke hū ai honau vaká.
Kau Māʻoniʻoní, 1:133
Naʻe ʻohovale mo houngaʻia ʻa e Kāingalotú. Naʻa nau fakataha mai ʻo lotu mo fakamālō ki he Tamai Hēvaní. Naʻe fononga malu atu honau vaká ki ʻOhaiō.
Kau Māʻoniʻoní, 1:134
ʻI he aʻu atu ʻa e Kāingalotú ki ʻOhaioó, naʻe talitali lelei mo tokoniʻi kinautolu ʻe he kāingalotu ʻo e Siasí ʻi aí, ke nau maʻu ha ngaahi feituʻu ke nau nofo ai. Naʻe tauhi ʻe he ʻEikí ʻa ʻEne talaʻofa ke akoʻi kiate kinautolu ʻa ʻEne fonó mo foaki ange ʻa e mālohi ke fakahoko ʻaki ʻEne ngāué.
Tokāteline mo e Ngaahi Fuakava 42; Kau Māʻoniʻoní, 1:137