“ʻOku Fokotuʻu ʻa e Siasi ʻo Sīsū Kalaisí,” Ngaahi Talanoa ʻo e Tokāteline mo e Ngaahi Fuakavá (2024)
“ʻOku Fokotuʻu ʻa e Siasi ʻo Sīsū Kalaisí,” Ngaahi Talanoa ʻo e Tokāteline mo e Ngaahi Fuakavá
ʻEpeleli 1830
ʻOku Fokotuʻu ʻa e Siasi ʻo Sīsū Kalaisí
Ko ha fakataha fakafiefia ʻa e Siasí
Kuo paaki eni ʻa e Tohi ʻa Molomoná, pea naʻe toe ʻi māmani e mālohi lakanga fakataulaʻeiki ʻo e ʻOtuá. Naʻe fakahā ʻe he ʻEikí kia Siosefa Sāmita kuo taimi ke fokotuʻu ʻa e Siasi ʻo Sīsū Kalaisí.
Kau Māʻoniʻoní, 1:84
ʻI he ʻaho 6 ʻo ʻEpeleli 1830, naʻe haʻu ai ha kau fafine mo ha kau tangata ʻe toko 40 nai ki he ʻapi ʻo e fāmili Uitemaá ke fokotuʻu ʻa e Siasí. Naʻe ui ʻe he ʻEikí ʻa Siosefa mo ʻŌliva ke tataki Hono Siasí. Naʻe kole ʻe Siosefa mo ʻŌliva ki he kakaí ke hiki honau nimá ke fakahaaʻi naʻa nau poupouʻi kinaua ko honau ongo taki.
Tokāteline mo e Ngaahi Fuakava 20:1–3; Kau Māʻoniʻoní, 1:84
Hokó, naʻe tāpuakiʻi ʻe Siosefa mo ʻŌliva ʻa e sākalamēnití. Naʻá na ʻoatu ia ki he kakaí ke tokoni ke nau manatuʻi ʻa Sīsū Kalaisi. Naʻe hili leva ʻe Siosefa mo ʻŌliva hona ongo nimá ʻi he ʻulu ʻo e kakai kuo papitaisó. Naʻá na fakamaʻu kinautolu ko e kāingalotu ʻo e Siasí mo foaki ange kiate kinautolu ʻa e meʻafoaki ʻo e Laumālie Māʻoniʻoní.
Tokāteline mo e Ngaahi Fuakava 20:75–79; Kau Māʻoniʻoní, 1:85
Naʻe ʻoange ʻe he ʻEikí ha pōpoaki kia Siosefa maʻá e Siasi foʻoú. Naʻá Ne folofola ke nau hiki ʻa e meʻa kuo hoko ʻi he Siasí. Naʻá Ne folofola ko Siosefa Sāmitá ko ʻEne palōfita. Naʻá Ne talaʻofa ki he kāingalotu ʻo e Siasí kapau te nau muimui ki he ngaahi fekau naʻá Ne foaki kia Siosefá, te Ne tāpuakiʻi kinautolu. He ʻikai maʻu ʻe he tēvoló ha mālohi kiate kinautolu.
Tokāteline mo e Ngaahi Fuakava 21:1–6; Kau Māʻoniʻoní, 1:85
Naʻe fiefia ʻaupito ʻa e kakaí ke maʻu ʻa e Siasi ʻo Sīsū Kalaisí! Hili ʻa e fakatahá, naʻe tokolahi ange e kakai ne papitaisó, kau ai ʻa e faʻē mo e tamai ʻa Siosefá. ʻI he taimi naʻe tuʻu hake ai ʻene tamaí mei he vaí, naʻe fāʻofua ange ʻa Siosefa kiate ia. Naʻá ne pehē, “Kuó u moʻui ʻo mamata ki hono papitaiso ʻeku tamaí ki he siasi moʻoni ʻo Sīsū Kalaisí!”
Kau Māʻoniʻoní, 1:86
Kimui ange ʻi he pō ko iá, naʻe ʻalu ʻa Siosefa ki he vao ʻakaú ke ʻi ai toko taha pē. Naʻe fonu hono lotó ʻi he fiefia. Ko e taʻu ʻeni ʻe 10 mei heʻene fuofua mamata ki he Tamai Hēvaní mo Sīsū Kalaisí. Talu mei ai mo e lahi ʻa e meʻa naʻe hokó. Naʻe houngaʻia ʻaupito ʻa Siosefa ʻi heʻene lava ʻo tokoni ke fakafoki mai, pe toe ʻomi, ʻa e Siasi ʻo Sīsū Kalaisí!
Kau Māʻoniʻoní, 1:86