“Ko Ha Misiona ki he Kakai Tuʻufonua ʻo ʻAmeliká,” Ngaahi Talanoa ʻo e Tokāteline mo e Ngaahi Fuakavá (2024)
“Ko Ha Misiona ki he Kakai Tuʻufonua ʻo ʻAmeliká,” Ngaahi Talanoa ʻo e Tokāteline mo e Ngaahi Fuakavá
ʻOkatopa 1830–Sānuali 1831
Ko Ha Misiona ki he Kakai Tuʻufonua ʻo ʻAmeliká
ʻOku fanongo ʻa e kau ʻInitia Telaueá ki he ongoongoleleí
Hili pē ha taimi nounou mei hono papitaiso ʻo Paʻale P. Pālatí, naʻe uiuiʻi ia ʻe he ʻEikí ke kau fakataha mo ʻŌliva Kautele mo ha niʻihi kehe ʻi he ngāue fakafaifekaú. Naʻá Ne finangalo ke nau malanga ʻaki ʻa e ongoongoleleí ki he Kakai Tuʻufonua ʻo ʻAmeliká. Naʻe fononga ʻa e kau faifekaú ʻi ha ngaahi uike lahi ʻi he sinou lolotó. Naʻe faifai pea nau fetaulaki mo Kikitauinani, ko e taki ʻo e kau ʻInitia Telaueá.
Tokāteline mo e Ngaahi Fuakava 28:14; 30:5–6; 32; Kau Māʻoniʻoní, 1:98, 115
Naʻe anga fakakaumeʻa ʻa e takí ki he kau faifekaú. Naʻá ne fakaafeʻi hono ngaahi kaungāmeʻá ke fanongo ki heʻenau pōpoakí. Naʻe pehē ʻe ʻŌliva kuó ne fononga mamaʻo mo Paʻale ke ʻomi kiate kinautolu ʻa e Tohi ʻa Molomoná. Naʻe fakamatala ia fekauʻaki mo ha kakai naʻa nau nofo ʻi he ongo ʻAmeliká ʻi he kuonga muʻá. Naʻe finangalo ʻa e ʻOtuá ke na vahevahe ʻa e tohí koeʻuhí ke ʻilo ʻe he tokotaha kotoa pē fekauʻaki mo Sīsū Kalaisi.
Kau Māʻoniʻoní, 1:115–16
Naʻe ʻoange ʻe ʻŌliva ha tatau ʻo e Tohi ʻa Molomoná kia Kikitauinani. Naʻá ne fakamālō ʻi he haʻu ʻa ʻŌliva mo hono ngaahi kaungāmeʻá ke vahevahe ia mo hono kakaí. Naʻá ne talaange kia ʻŌliva mo Paʻale naʻá ne fiemaʻu ke na foki ange ʻo lau mo akoʻi kiate kinautolu ha meʻa lahi ange fekauʻaki mo e Tohi ʻa Molomoná.
Kau Māʻoniʻoní, 1:116–17