“Sitenei mo Fīpē Likitoni,” Ngaahi Talanoa ʻo e Tokāteline mo e Ngaahi Fuakavá (2024)
“Sitenei mo Fīpē Likitoni,” Ngaahi Talanoa ʻo e Tokāteline mo e Ngaahi Fuakavá
ʻOkatopa–Nōvema 1830
Sitenei mo Fīpē Likitoni
Ko hono liliu ʻena moʻuí ke tali ʻa e ongoongoleleí
Naʻe ʻamanaki ke vahevahe ʻe Paʻale P. Pālati mo ha niʻihi kehe ʻa e ongoongoleleí ki he Kakai Tuʻufonua ʻo ʻAmeliká. ʻI heʻenau fonongá, naʻe fiemaʻu ʻe Paʻale ke nau afe ʻo ʻaʻahi ki hono kaungāmeʻa ko Sitenei Likitoní. Ko Siteneí ko ha tangata malanga ia kuó ne akoʻi ʻa Paʻale fekauʻaki mo Sīsū Kalaisi ʻi he Tohi Tapú. Naʻe fie akoʻi ʻe Paʻale ʻa Sitenei fekauʻaki mo Sīsū ʻi he Tohi ʻa Molomoná.
Tokāteline mo e Ngaahi Fuakava 32; Kau Māʻoniʻoní, 1:99
Naʻe fakamatala ange ʻe Paʻale kia Sitenei fekauʻaki mo e Tohi ʻa Molomoná pea fakaafeʻi ke ne lau ia. Naʻe ʻikai ke fakapapauʻi ʻe Sitenei ka koeʻuhí ko hano kaungāmeʻa ʻa Paʻale, naʻá ne palōmesi ange te ne fai ia.
Kau Māʻoniʻoní, 1:100
ʻI he taimi naʻe lau ai ʻe Sitenei ʻa e Tohi ʻa Molomoná, naʻá ne ʻiloʻi naʻe maʻu ia mei he ʻOtuá. Naʻá ne vahevahe ʻene ngaahi ongó mo hono uaifi ko Fīpeé.
Kau Māʻoniʻoní, 1:101
Ka naʻe ʻikai fakapapauʻi ʻe Sitenei pe ko e hā ʻa e meʻa hoko ke faí. Kapau te ne papitaiso, ʻe mole ʻene ngāue ko ha tokotaha malanga ʻi hono siasí. Te ne tokangaʻi fēfē ʻa Fīpē mo ʻena fānau ʻe toko onó? ʻE ongoʻi fēfē nai ʻa e kakai ʻi hono siasí? Naʻá ne lotu ki he Tamai Hēvaní ki ha tokoni, pea naʻá ne maʻu ha ongoʻi nonga.
Kau Māʻoniʻoní, 1:101; Tokāteline mo e Ngaahi Fuakava 19:23
Naʻe ʻeke ange ʻe Sitenei kia Fīpē pe naʻá ne loto-fiemālie ke tukuange ʻena moʻui fiemālié kae kau fakataha mo ia ki he siasi foʻou ko ʻení. Naʻá ne talaange, “Ko hoku lotó ke fai e finangalo ʻo e ʻOtuá, ʻo tatau ai pē pe ko e moʻui pe mate ʻe hoko maí.” Naʻá na fakakaukau ke na papitaiso.
Kau Māʻoniʻoní, 1:101
Naʻe toki fetaulaki ʻa Sitenei mo e Palōfita ko Siosefa Sāmitá kimui ange. Naʻe ʻoange ʻe he ʻEikí ha pōpoaki kia Sitenei ʻo fakafou ʻia Siosefa. Naʻá Ne folofola ange kuó Ne ʻafioʻi ʻa e ngaahi meʻa lelei kuo fakahoko ʻe Siteneí pea ongoʻi ʻene ngaahi lotú. Naʻe fakahā ʻe he ʻEikí kia Sitenei ne ʻi ai Haʻane ngāue lahi maʻana ke ne fai. ʻE fakahoko ʻe Sitenei ha ngaahi meʻa maʻongoʻonga.