Ko e Fāmili Ianakitá

Naʻe nofo ʻa Tosihiko mo Tokisi Ianakita ʻi Siapani. Naʻá na tui kia Sīsū Kalaisi peá na kau ki Hono Siasí. Ka naʻe faingataʻa ʻaupito ʻa e moʻui ʻi Siapaní ʻi he taimi ko iá. Naʻe fakaʻauha ha ngaahi ʻapi mo ha ngaahi fale lahi ʻi ha tau. Naʻe loto ʻa Tosihiko mo Tokisi ke langa ha fale maʻa hona fāmilí, ka naʻá na fuʻu masiva ʻaupito.

Kau Māʻoniʻoní, 3:543

Naʻe ʻiloʻi ʻe he ongo Ianakitá naʻe finangalo ʻa e ʻEikí ke na totongi vahehongofulu, ka naʻe ʻikai ke na fakapapauʻi pe te na lava. Naʻe fehuʻi ange ʻe Tosihiko ki ha faifekau pe ko e hā e meʻa ʻoku totonu ke na faí. Naʻá ne pehē, “ʻOku fuʻu faingataʻa ʻa e vahehongofulú kiate kimaua.” Naʻe palōmesi ange ʻe he ongo faifekaú kapau te na totongi ʻena vahehongofulú, ʻe tokoniʻi kinaua ʻe he ʻEikí ke na aʻusia ʻena taumuʻa ke maʻu ha ʻapí.

Tokāteline mo e Ngaahi Fuakava 119; Kau Māʻoniʻoní, 3:543–44

Ka naʻe ʻikai ke fuʻu fakapapauʻi ʻe Tosihiko mo Tokisi ʻe lava. Naʻe ʻikai ke na maʻu ha paʻanga feʻunga ke fakatau ha meʻatokoni hoʻatā hona fohá ki he akó. Ka naʻá na fakakaukau ke falala ki he ʻEikí mo totongi vahehongofulu.

Kau Māʻoniʻoní, 3:543–44

Naʻe tāpuakiʻi ʻe he ʻEikí ʻa e fāmili Ianakitá. Naʻe ʻikai fuoloa kuo nau lava ʻo fakatau mai ha konga kelekele pea kamata langa ha ʻapi.

Kau Māʻoniʻoní, 3:544

ʻI ha ʻaho ʻe taha naʻe haʻu ai ha ʻinisipēkita. Naʻá ne pehē ʻoku ʻi ai ha palopalema ʻi honau konga kelekelé, pea he ʻikai ke na lava ʻo langa ai ha fale. Naʻá ne taʻofi e kau ngāué.

Kau Māʻoniʻoní, 3:544

Naʻe loto-mamahi ʻaupito ʻa e fāmili Ianakitá. Naʻá na talaange ki he ongo faifekaú ʻa e meʻa naʻe hokó. Naʻe pehē ʻe he ongo faifekaú te na ʻaukai mo lotu fakataha mo e ongo Ianakitá.

Kau Māʻoniʻoní, 3:545

Kimui ange aí, naʻe toe haʻu mo ha ʻinisipēkita ʻe taha. Naʻá ne pehē ʻe lava ke fakaleleiʻi ʻa e palopalema ʻi honau konga kelekelé. ʻE lava ke langa ʻe he fāmili Ianakitá honau ʻapí. Naʻe talaange ʻe he ʻinisipēkitá kia Tosihiko mo Tokisi, “ʻOku pau pē naʻá mo fai ha meʻa lelei.” Naʻá na ʻiloʻi naʻe faitāpuekina kinaua ʻe he ʻOtuá. Naʻá na fiefia ʻi heʻena falala kiate Ia mo totongi vahehongofulú.

Kau Māʻoniʻoní, 3:545