“Ko e Mataʻitofe Mahuʻingá,” Ngaahi Talanoa ʻo e Tokāteline mo e Ngaahi Fuakavá (2024)
“Ko e Mataʻitofe Mahuʻingá,” Ngaahi Talanoa ʻo e Tokāteline mo e Ngaahi Fuakavá
Siulai 1835–Māʻasi 1842
Ko e Mataʻitofe Mahuʻingá
Folofola lahi ange mei he ʻEikí
ʻI ha ʻaho ʻe taha, naʻe haʻu ha tangata ki Ketilani mo ha kau pekia kuo fakatolonga mei ʻIsipite. Naʻe ʻomi ʻa e kau pekia kuo fakatolongá mo ha ʻū takainga tohi, pe ko ha ʻū takainga pepa motuʻa ʻaupito. Naʻe ʻi he ʻú takainga tohí ha ʻū tohi faka-ʻIsipite. Naʻe fakaʻaliʻali ia ʻe he tangatá ki he Palōfita ko Siosefa Sāmitá. Naʻe tokanga ʻaupito ʻa Siosefa ki he ngaahi meʻa naʻe tohí.
Kau Māʻoniʻoní, 1:240–41
Naʻe tokoni ha ngaahi kaungāmeʻa ʻe niʻihi kia Siosefa ke fakatau mai ʻa e kau pekia kuo fakatolongá mo e ʻū takainga tohí. ʻI hono ako ʻe Siosefa ʻa e tohí, naʻe fakahā kiate ia ʻe he ʻEikí ha ngaahi tohi fakakuongamuʻa meia ʻĒpalahame, ko ha palōfita ʻi he Tohi Tapú. ʻI he tokoni ha ngaahi kaungāmeʻa hangē ko ʻŌliva Kautelé, naʻe hiki ai ʻe Siosefa ʻa e meʻa naʻe akoʻi ange ʻe he ʻEikí kiate ia fekauʻaki mo e ngaahi akonaki ʻa ʻĒpalahamé.
Kau Māʻoniʻoní, 1:241–42
Naʻe mamata ʻa ʻĒpalahame ki ha mata meʻa-hā-mai ʻo ʻetau moʻui mo e Tamai Hēvaní kimuʻa pea fanauʻi kitautolú. Naʻá ne mamata naʻe fili ʻa Sīsū ke hoko ko hotau Fakamoʻui. Naʻe ako foki ʻa ʻĒpalahame fekauʻaki mo hono faʻu ʻo e māmaní. Naʻe fiefia ʻa e Kāingalotú ke maʻu ʻa e ngaahi akonaki ko ʻeni meia ʻĒpalahamé. Naʻa nau fiefia ʻi he finangalo ʻa e ʻEikí ke akoʻi lahi ange kinautolú.
ʻĒpalahame 2:6–11; 3–5; Kau Māʻoniʻoní, 1:241–42
Naʻe hoko e ngaahi tohi ʻa ʻĒpalahamé ko ha konga ʻo e tohi folofola naʻe ui ko e Mataʻitofe Mahuʻingá. ʻOku ʻi he tohí ni foki ha tohi meia Mōsese, ko ha palōfita ʻe taha ʻi he Tohi Tapú. ʻOku akoʻi ai ha ngaahi moʻoni ʻoku puli mei he Tohi Tapú. Naʻe finangalo ʻa e ʻEikí ke ʻiloʻi ʻe he kakaí ʻa e ngaahi moʻoni ko ʻení, ko ia naʻá Ne vahevahe ia mo Siosefa Sāmita.
ʻOku kau foki ʻi he Mataʻitofe Mahuʻingá ʻa e fakamoʻoni ʻa Siosefa Sāmitá pea mo e Ngaahi Tefito ʻo e Tui ʻe 13 ʻa e Siasí. Naʻe tohi ʻe Siosefa Sāmita ʻa e ngaahi meʻá ni ke tala ki he māmaní ʻa e meʻa ʻoku tui ki ai ʻa e Kau Māʻoniʻoni ʻi he Ngaahi ʻAho Kimui Ní. Ko e Mataʻitofe Mahuʻingá ko ha tohi siʻisiʻi ia, hangē ko e siʻisiʻi ʻa ha foʻi tofe, ka ʻoku matuʻaki mahuʻinga ʻaupito ia.