Misi ʻa Tesiteliá

Naʻe nofo ʻa Tesitelia Ianesi ʻi Napola, Mekisikou. ʻI ha pō ʻe taha, naʻe misi ai ʻa Tesitelia fekauʻaki mo ha kiʻi tohi siʻisiʻi ʻoku pulusi ʻi Mekisikou Siti. Naʻe ui ia ko e Voz de amonestación, pe ko e Leʻo ʻo e Fakatokangá. ʻI he ʻā hake ʻa Tesiteliá, naʻá ne ʻiloʻi kuo pau ke ne kumi ʻa e tohi ko iá.

Kau Māʻoniʻoní, 2:560

Ka naʻe fuʻu mamaʻo ʻa Mekisikou Siti, pea naʻe fuʻu motuʻa ʻa Tesitelia ke fakahoko ha fononga lōloa pehē. Naʻá ne ongoʻi naʻe finangalo ʻa e ʻEikí ke ne maʻu ʻa e tohi ko iá. Ko ia naʻá ne talaange ki hono foha ko Hōseá, fekauʻaki mo e misí. Naʻe tui ʻa Hōsea naʻe mahuʻinga foki mo e tohí. Naʻá ne talaange ki heʻene faʻeé te ne kumi ia maʻana.

Kau Māʻoniʻoní, 2:560

ʻI he tūʻuta ʻa Hōsea ʻi Mekisikou Sití, naʻe femoʻuekina, longoaʻa, mo fonu ʻa e ngaahi halá ʻi he kakaí. Te ne maʻu fēfē nai ʻa e tohí ʻi ha feituʻu moʻumoʻua pehē?

Kau Māʻoniʻoní, 2:561

Hili ha ngaahi ʻaho siʻi, naʻe fetaulaki ʻa Hōsea mo ha faifekau ko Sēmisi Sitiuati. Naʻe pehē ʻe Sēmisi ʻokú ne ngāue ke paaki ha tohi naʻe ui ko e Voz de amonestación.

Kau Māʻoniʻoní, 2:561

Naʻe fiefia ʻaupito ʻa Hōsea! Naʻá ne fakamatala kia Sēmisi fekauʻaki mo e misi ʻene faʻeé. Naʻe fakamatala ange ʻe Sēmisi, ʻe fakaʻaongaʻi ʻe he kau faifekaú ʻa e Voz de amonestación ke akoʻi e kakaí fekauʻaki mo Sīsū Kalaisi mo ha tohi folofola foʻou, ko e Tohi ʻa Molomoná.

Kau Māʻoniʻoní, 2:561

Naʻe teʻeki ke ʻosi ʻa e Voz de amonestación, pea kuo teʻeki ke liliu ʻa e Tohi ʻa Molomoná ki he lea faka-Sipeiní. Ka naʻe ʻoange ʻe Sēmisi ha ngaahi tohi mo e pepa kehe kia Hōsea ke tokoni kiate ia mo ʻene faʻeé ke ako fekauʻaki mo Sīsū Kalaisi, ko e Tohi ʻa Molomoná, pea mo e Siasi kuo fakafoki maí.

Tokāteline mo e Ngaahi Fuakava 90:11; Kau Māʻoniʻoní, 2:560–561

Naʻe fakatovave atu ʻa Hōsea ki ʻapi ki heʻene faʻeé. Naʻá na ako fakataha ʻa e ongoongoleleí, pea naʻá na ʻiloʻi naʻe moʻoni ia. Naʻe kole ʻe Tesitelia ki he kau faifekaú ke nau omi ʻo papitaiso ia.

Kau Māʻoniʻoní, 2:561

Naʻe kau ʻa Tesitelia ʻi he kau fuofua fefine ke papitaiso ʻi Mekisikoú. Naʻe papitaiso foki mo Hōsea mo hono ʻofefiné.

Kau Māʻoniʻoní, 2:561

ʻI he maau ʻa e Voz de amonestación, naʻe ʻomi ʻe Hōsea ha tatau ʻe 10 maʻa ʻene faʻeé ke ne vahevahe mo e niʻihi kehe ʻi Napolá. Hili ha ngaahi taʻu lahi mei ai, ʻi he taimi naʻe faifai pea paaki ai ʻa e Tohi ʻa Molomoná ʻi he lea faka-Sipeiní, naʻe hoko ʻa Tesitelia ko e fuofua tokotaha ia ʻi Mekisikou ke ne maʻu ha tatau. Naʻá ne ʻiloʻi naʻe tataki ia ʻe he ʻEikí ki Hono Siasi kuo fakafoki maí.

Tokāteline mo e Ngaahi Fuakava 88:81; Kau Māʻoniʻoní, 2:561