Paʻale mo Fakafetaʻi Pālati

Naʻe hoko ʻa Paʻale Pālati mo Fakafetaʻi Pālati ko ha ongo faama ʻi ʻOhaiō. ʻI ha ʻaho ʻe taha, naʻe ongoʻi ʻe Paʻale ʻoku talaange ʻe he Laumālié ke mavahe mei hono ʻapí ke akoʻi ʻa e kakaí fekauʻaki mo e Tohi Tapú.

Kau Māʻoniʻoní, 1:92

Naʻe fakatau atu ʻe Paʻale mo Fakafetaʻi ʻena fāmá. Naʻe ʻikai ke na ʻilo pe te na ō ki fē, ka naʻá na falala ʻe tāpuakiʻi kinaua ʻe he ʻOtuá ʻi heʻena tauhi kiate Iá.

Kau Māʻoniʻoní, 1:92

Naʻe ʻave ʻe Paʻale mo Fakafetaʻi ha vala mo ha paʻanga ʻo heka ʻi ha vaka. ʻI heʻena fononga ʻi Niu ʻIoké, naʻe talaange ʻe he Laumālié kia Paʻale ke hifo mei he vaká. Naʻe kole ange ʻe Paʻale kia Fakafetaʻi ke hoko atu toko taha pē ia. Naʻá ne palōmesi ʻe vavé ni pē haʻane foki atu kiate ia. Naʻá ne ongoʻi naʻe ʻi ai ha meʻa naʻe finangalo ʻa e ʻOtuá ke ne fai ʻi Niu ʻIoke.

Kau Māʻoniʻoní, 1:92

Naʻe lue lōloa ʻa Paʻale. Faifai peá ne aʻu mai ki he ʻapi ʻo ha tangata malanga. Naʻe talaange ʻe he tangata malangá kia Paʻale fekauʻaki mo ha tohi ngali kehe naʻe ʻoange ʻe ha taha kiate ia. Naʻe maʻu ia mei he ʻū lauʻi peleti koulá pea naʻe hiki ia ʻi he kuonga muʻá. Naʻe ui ia ko e Tohi ʻa Molomoná. Naʻe liliu ia ʻe ha talavou ʻi Niu ʻIoke ʻaki e mālohi ʻo e ʻOtuá.

Kau Māʻoniʻoní, 1:92

Naʻe fuʻu fieʻilo ʻaupito ʻa Paʻale. Naʻe fakaʻaliʻali ange ʻe he tangata malangá kia Paʻale ʻa e tohí. ʻI he fiefia ʻa Paʻalé, naʻá ne fakaava hake ia ʻo kamata ke ne lau. Ne ʻosi atu ha lau houa, ka naʻe ʻikai lava ke tuku ʻene laukongá, ʻo aʻu pē ki he kaí pe mohé. Naʻe fakahā ange ʻe he Laumālie ʻo e ʻEikí ʻoku moʻoni ia.

Kau Māʻoniʻoní, 1:92–93

Naʻe fuʻu saiʻia ʻaupito ʻa Paʻale ʻi he Tohi ʻa Molomoná, ko ia naʻá ne fiemaʻu ke kumi ʻa e tangata naʻá ne liliu iá. Naʻá ne lue ki he faama ʻa e fāmili Sāmitá, ʻo ne fetaulaki ai mo Hailame, ko e tokoua ʻo Siosefá. Naʻá na talanoa ʻi he pō ko iá. Naʻe talaange ʻe Hailame kia Paʻale ʻoku moʻoni e Tohi ʻa Molomoná. Naʻá ne ʻoange kia Paʻale haʻane tatau ʻo e tohí.

Kau Māʻoniʻoní, 1:93

ʻI he hoko atu ʻene laú, naʻe ʻilo ai ʻe Paʻale naʻe ʻaʻahi ʻa Sīsū Kalaisi ki he kakai ʻi he ongo ʻAmeliká ʻi he kuonga muʻá. Naʻe lava ʻa Paʻale ʻo ʻiloʻi naʻe mahuʻinga ange ʻa e Tohi ʻa Molomoná ʻi he ngaahi koloa kotoa ʻo e māmaní. Naʻe ʻikai ke ne faʻa tatali ke foki kia Fakafetaʻi ʻo vahevahe mo ia ʻa e meʻa kuó ne akó.

Kau Māʻoniʻoní, 1:93; 3 Nīfai 11:1–12

Naʻe talaange ʻe Paʻale kia Fakafetaʻi mo e kau mēmipa kehe ʻo hono fāmilí fekauʻaki mo e Tohi ʻa Molomoná. Naʻá ne talaange kiate kinautolu ʻa e meʻa ʻokú ne akoʻi fekauʻaki mo Sīsū Kalaisí. Naʻe fiefia ʻa Fakafetaʻi ʻi he muimui ʻa Paʻale ki he Laumālié ʻo ne maʻu ai ʻa e ngāue naʻe finangalo ʻa e ʻOtuá ke ne faí. Hangē ko Paʻalé, naʻe ʻilo ʻe Fakafetaʻi ʻiate ia pē ʻoku moʻoni ʻa e Tohi ʻa Molomoná.

Kau Māʻoniʻoní, 1:98–99