“Ko e Lea ʻo e Potó,” Ngaahi Talanoa ʻo e Tokāteline mo e Ngaahi Fuakavá (2024)
“Ko e Lea ʻo e Potó,” Ngaahi Talanoa ʻo e Tokāteline mo e Ngaahi Fuakavá
Fēpueli 1833
Ko e Lea ʻo e Potó
Ko e fono ʻa e ʻEikí ki he moʻui leleí
Naʻe fakaafeʻi ʻe Siosefa Sāmita ha kau tangata tokosiʻi ʻi he Siasí ke nau fakataha mo ia ʻi he fungavaka ki ʻolunga ʻo e falekoloa ʻo Niueli mo ʻAna Uitenií. Naʻa nau ako ai ʻa e ongoongoleleí mo ha ngaahi kaveinga kehe, pea naʻa nau lotu fakakulupu. Naʻa nau ui ʻa e ngaahi fakataha ko ʻení ko e Akoʻanga ʻo e Kau Palōfitá.
Tokāteline mo e Ngaahi Fuakavá 88:117–137; Kau Māʻoniʻoní, 1:181
Naʻe tokolahi ʻa e kau tangata naʻa nau ifi mo fakateka tapaka lolotonga ʻa e ngaahi lēsoní. Naʻe ʻahuina ʻa e lokí tupu mei he kohu ʻo e ifí, pea naʻe ʻuliʻi ʻe he tapaká ʻa e falikí. Hili ʻa e ngaahi fakatahá, naʻe ʻalu ʻa ʻEma Sāmita ki ʻolunga ke fakamaʻa ʻa e lokí. Naʻe ʻuli ʻaupito!
Kau Māʻoniʻoní, 1:182
Naʻe toutou olo ʻe ʻEma ʻa e falikí, ka naʻe ʻikai maʻa e ʻuli ʻo e tapaká. Naʻá ne talanoa kia Siosefa fekauʻaki mo e ʻulí.
Kau Māʻoniʻoní, 1:182
Naʻe fakafanongo ʻa Siosefa kia ʻEma. ʻI he fanongo [ʻa Siosefa] kia [ʻEmá], naʻá ne fifili ai pe ko e hā nai ʻa e ongo ʻa e ʻEikí fekauʻaki mo e tapaká.
Kau Māʻoniʻoní, 1:182
Ko ia, naʻe fehuʻi ai ʻe Siosefa ki he ʻEikí fekauʻaki mo e tapaká. Naʻe fakahā ʻe he ʻEikí kia Siosefa ʻoku ʻi ai haʻane Lea ʻo e Potó maʻá e Kāingalotú.
Tokāteline mo e Ngaahi Fuakava 89:1–9; Kau Māʻoniʻoní, 1:183
Naʻe folofola ʻa e ʻEikí ʻoku ʻikai totonu ke ifi tapaka, fakaʻaongaʻi e tapaká, pe inu kava mālohi pe “inu vela,” ʻa ia ʻoku ʻuhinga ko e kofí mo e tií, ʻa e Kāingalotú.
Tokāteline mo e Ngaahi Fuakava 89:1–9; Kau Māʻoniʻoní, 1:183
Naʻe akoʻi foki ʻe he ʻEikí ki he Kāingalotú ʻoku lelei ʻa e kēlení mo e fuaʻiʻakaú ke nau kai. Naʻá ne toe folofola foki te nau lava he taimi ʻe niʻihi ʻo kai ʻa e kakanoʻi manú.
Tokāteline mo e Ngaahi Fuakava 89:10–17; Kau Māʻoniʻoní, 1:183
Naʻe fakahā ʻe he ʻEikí kia Siosefa ʻe maluʻi ʻa e Kāingalotu te nau fili ke talangofua ki Heʻene Lea ʻo e Potó. Naʻe talaʻofa ʻe he ʻEikí te Ne tāpuakiʻi kinautolu ʻaki ʻa e moʻui lelei, ʻilo, mo e mālohi. Naʻe fakahā ʻe Siosefa ki he kau tangata ʻi he Akoʻanga ʻo e Kau Palōfitá fekauʻaki mo e Lea ʻo e Poto ʻa e ʻEikí.
Tokāteline mo e Ngaahi Fuakava 89:18–21; Kau Māʻoniʻoní, 1:183
Naʻe laku ʻe he kau tangata ʻi he lokí ʻenau tapaká mo ʻenau ʻū paipá ki he afí ke fakahaaʻi ʻenau loto ke talangofua ki he Lea ʻo e Poto ʻa e ʻEikí.
Kau Māʻoniʻoní, 1:183