“Misiona ʻo Paʻale ki Kānatá,” Ngaahi Talanoa ʻo e Tokāteline mo e Ngaahi Fuakavá (2024)
“Misiona ʻo Paʻale ki Kānatá,” Ngaahi Talanoa ʻo e Tokāteline mo e Ngaahi Fuakavá
ʻEpeleli–Sune 1836
Misiona ʻo Paʻale ki Kānatá
Ko e fakahaaʻi ʻa e tuí ki he ngaahi talaʻofa ʻa e ʻEikí
Hili hono fakatapui ʻa e Temipale Ketilaní, naʻe tokolahi ʻa e kau taki ʻo e Siasí naʻa nau ō ʻo ngāue fakafaifekau ke malangaʻi ʻa e ongoongoleleí.
Tokāteline mo e Ngaahi Fuakava 88:81; 109:22–23; 112:28–29; Kau Māʻoniʻoní, 1:271
Naʻe manako ʻa Paʻale P. Pālati ke vahevahe ʻa e ongoongoleleí. Ka naʻá ne fakakaukau ʻoku totonu ke ne nofo pē ʻi ʻapi koeʻuhí ko e fokoutua ʻa hono uaifi ko Fakafetaʻí. Naʻe ʻikai foki ke ʻi ai haʻana paʻanga feʻunga.
Kau Māʻoniʻoní, 1:271
Naʻe haʻu ʻa Hiipa Kimipolo, ko e kaungāmeʻa ʻo Paʻalé mo ha taha ʻo e kau ʻAposetoló, ʻo ʻaʻahi. Naʻá ne foaki ha tāpuaki kia Paʻale mo ne pehē ʻoku totonu ke ne malangaʻi ʻa e ongoongoleleí ʻi Kānata. ʻI he tāpuakí, naʻe palōmesi ai ʻe Hiipa ʻe fakaʻau ke sai ange ʻa Fakafetaʻi. Naʻá ne palōmesi ange ʻe ʻi ai hano foha pea ʻe tokoniʻi ʻe he ʻEikí ʻa Paʻale ke ne maʻu ʻa e paʻanga naʻá ne fiemaʻú.
Kau Māʻoniʻoní, 1:271–72
Ko e taʻu ʻeni ʻe 10 e mali ʻa Fakafetaʻi mo Paʻalé. Naʻe ʻikai ke ʻi ai haʻana fānau. Ka naʻá na tui ki he ngaahi talaʻofa ʻa e ʻEikí. Neongo ʻe faingataʻa ke mamaʻo meia Fakafetaʻi ʻi Kānata, ka naʻe mavahe ʻa Paʻale ke vahevahe ʻa e ongoongoleleí.
Kau Māʻoniʻoní, 1:272
ʻI Kānatá, naʻe kumi ʻe Paʻale ha ngaahi feituʻu te ne lava ai ʻo akoʻi ʻa e kakaí. Naʻá ne kole pe ʻe lava ke ne faiako ʻi he ngaahi fale lotú mo e ngaahi fale kehé. Naʻe tali ʻikai ʻa e tokotaha kotoa.
Kau Māʻoniʻoní, 1:274–75
Naʻe fetaulaki leva ʻa Paʻale mo Sione mo Lionola Teila. Naʻá na ʻofa ʻia Sīsū Kalaisi mo e Tohi Tapú. Naʻe fehuʻi ange ʻe Sione kia Paʻale pe naʻe kehe ʻa e meʻa naʻá ne akoʻí mei he Tohi Tapú.
Kau Māʻoniʻoní, 1:274–75
Naʻe talaange ʻe Paʻale naʻá ne akoʻi fekauʻaki mo Sīsū, kau palōfitá, papitaisó, mo e Laumālie Māʻoniʻoní. Naʻe ʻi he Tohi Tapú ʻa e ngaahi meʻa kotoa ko iá. Naʻe fehuʻi ange ʻe Sione, “Fēfē ʻa Siosefa Sāmita mo e Tohi ʻa Molomoná?” Naʻe talaange ʻe Paʻale kia Sione naʻá ne ʻiloʻi naʻe moʻoni e Tohi ʻa Molomoná, ʻo hangē pē ko e Tohi Tapú, pea ko Siosefa Sāmitá ko ha palōfita ia ʻo e ʻOtuá.
Kau Māʻoniʻoní, 1:276
Naʻe tui ʻa Sione ki he meʻa naʻe lea ʻaki ʻe Paʻalé. Naʻá ne lau e Tohi ʻa Molomoná peá ne ʻiloʻi naʻe moʻoni ia. Naʻe fakaafeʻi ʻe Sione mo Lionola hona ngaahi kaungāmeʻa ko Siosefa, Meesi, mo Mele Filitingi mo ha niʻihi kehe ke nau omi ʻo fanongo ki he faiako ʻa Paʻalé. Naʻe papitaiso ha kakai tokolahi pea nau kau ki he Siasí.
Kau Māʻoniʻoní, 1:277–78
Naʻe fiefia ʻa Paʻale, ka naʻá ne fie foki ki ʻapi kia Fakafetaʻi ʻi Ketilani. Naʻá ne lea māvae ki hono ngaahi kaungāmeʻa foʻou ʻi Kānatá. ʻI heʻene lulululu mo kinautolú, naʻa nau ʻoange ha paʻanga ke tokoni kiate ia ʻi hono tokangaʻi hono fāmilí.
Kau Māʻoniʻoní, 1:278–79
ʻI he aʻu ʻa Paʻale ki ʻapí, naʻá ne ʻiloʻi naʻe ongoʻi sai ange ʻa Fakafetaʻi. Naʻe maʻu ʻe Paʻale ha ʻū tatau lahi ange ʻo e Tohi ʻa Molomoná pea foki ki Kānata ke hokohoko atu hono vahevahe ʻo e ongoongoleleí. ʻI he taimi ko ʻení, naʻá ne ʻalu ai mo Fakafetaʻi.
Kau Māʻoniʻoní, 1:279
Naʻe ʻikai fuoloa kuo ʻilo ʻe Fakafetaʻi mo Paʻale ʻe ʻi ai haʻana pēpē. Naʻá na manatuʻi ʻa e tāpuaki naʻe foaki ʻe Hiipa kia Paʻalé. Naʻá na ongoʻi naʻe hoko ʻo moʻoni ʻa e meʻa kotoa pē kuo talaʻofa ange ʻe he ʻEikí ʻi he tāpuaki ko iá.
Kau Māʻoniʻoní, 1:279