“Ko Hono Langa ʻo e Temipale Ketilaní,” Ngaahi Talanoa ʻo e Tokāteline mo e Ngaahi Fuakavá (2024)
“Ko Hono Langa ʻo e Temipale Ketilaní,” Ngaahi Talanoa ʻo e Tokāteline mo e Ngaahi Fuakavá
Tīsema 1832–Māʻasi 1836
Ko Hono Langa ʻo e Temipale Ketilaní
Ko ha fale makehe maʻá e ʻEikí
Naʻe fakahā ʻe he ʻEikí kia Siosefa Sāmita, kuo taimi ke langa ʻe he Kāingalotú ha fale makehe ʻi Ketilani. ʻE hoko e fale ko ʻení ko ha temipale, ko ha feituʻu ʻe ʻaʻahi ai ʻa e ʻEikí ki Hono kakaí ʻo fai ha ngaahi palōmesi mo kinautolu. Te Ne foaki kiate kinautolu ha meʻaʻofa makehe ʻi Hono temipalé. Naʻá Ne ui ʻa e meʻaʻofá ko ha fakakoloa ʻo e mālohi.
Tokāteline mo e Ngaahi Fuakava 88:119; 95:8; Kau Māʻoniʻoní, 1:225
Naʻe ʻikai kamata ʻe he Kāingalotú hono langa ʻo e temipalé ʻi he taimi pē ko iá. Hili ha ngaahi māhina siʻi mei ai, naʻe fakamanatu ange ʻe he ʻEikí kiate kinautolu naʻe fuʻu mahuʻinga ʻaupito ʻa e temipalé. Naʻe lele ʻa Hailame Sāmita ki he fale ʻo ʻene ongomātuʻá ke tānaki ha ʻū meʻangāue. ʻI he taimi naʻe ʻeke ange ai ʻe heʻene faʻeé pe ko ʻene ʻalú ki fē, naʻá ne talaange naʻá ne fie hoko ko e fuofua tokotaha ke ngāue ʻi he fale ʻo e ʻEikí.
Tokāteline mo e Ngaahi Fuakava 95:1–8
Naʻe kamata he langa ʻe he Kāingalotu ʻi Ketilaní ʻa e temipalé. Naʻe lahi ʻaupito ʻa e fakamole fakapaʻanga mo e ngāue ki aí. Naʻe foaki ʻe he kāingalotu ʻo e Siasí, hangē ko Sitenei Likitoní, ha paʻanga lahi ke langa ʻaki e temipalé. Naʻa nau fiefia ke muimui ki he ngaahi fekau ʻa e ʻEikí pea maʻu ʻEne ngaahi tāpuakí ʻi Hono falé.
Kau Māʻoniʻoní, 1:229–231
ʻI he ngāue ʻa e Kāingalotú ʻi he temipalé, naʻe kamata ke ʻosi ʻenau paʻangá. Naʻe hohaʻa ʻa Sitenei mo e kau taki kehe ʻo e Siasí. Naʻe lotu ʻa Sitenei ki he ʻOtuá ki ha tokoni.
Kau Māʻoniʻoní, 1:230–31
Naʻe fakahaofi ʻe ha mēmipa ʻo e Siasí ko Kalolaine Tīpeti mo hono fāmilí ha paʻanga lahi ʻaupito. Naʻe fakaʻatā ʻe Kalolaine ke nō ʻe he Siasí ʻenau paʻangá ke tokoni ke langa ʻa e temipalé.
Kau Māʻoniʻoní, 1:231–34
Naʻe ngāue mālohi ha Kāingalotu tokolahi ʻi Ketilani ke langa ʻa e temipalé. Naʻe heka ha niʻihi ʻi ha ngaahi saliote fonu maka ki he temipalé. Naʻe ngaohi ʻe ha niʻihi ha vala mo e meʻakai maʻá e kau ngāué. Naʻe tānaki ʻe he fānaú ʻa e ʻū kongokonga sioʻata ne mafahifahí ke momosi pea fakapipiki ki he holisi ʻo e temipalé ke fetapaki ia ʻi he ulo mai ʻa e laʻaá.
Kau Māʻoniʻoní, 1:230–31, 240, 242
Naʻe ʻikai fuoloa kuo ʻosi ʻa e temipalé! Naʻe fiefia ʻa e Kāingalotú ke nau ō ki he fale ʻo e ʻEikí ke maʻu ʻa e ngaahi tāpuaki naʻá Ne talaʻofa kiate kinautolú.
Kau Māʻoniʻoní, 1:242