Mali Tokolahí

Lolotonga hono ako ʻe he Palōfita ko Siosefá ʻa e Tohi Tapú, naʻá ne lau ai kau ki he kau palōfita hangē ko ʻĒpalahame mo Mōsese ʻa ia naʻá na mali ki ha uaifi ne tokolahi ange ʻi he toko tahá. Naʻe maʻu ʻe Siosefa ha ngaahi fehuʻi lahi. Ko ia naʻá ne fakakaukau ai ke lotu ʻo ʻeke ki he ʻEikí.

Tokāteline mo e Ngaahi Fuakava 132:1; Kau Māʻoniʻoní, 1:132, 554

Naʻe folofola ʻa e ʻEikí ko e angamahení ke maʻu ʻe ha tangata ha uaifi pē ʻe toko taha. Ka ʻi he taimi ʻe niʻihi naʻe fekauʻi ʻe he ʻEikí ha tangata ke mali ki ha uaifi tokolahi ange. Naʻe ui ʻeni ko e mali tokolahí. Naʻe fakahā ʻe he ʻEikí kia Siosefa ʻoku totonu ke mali tokolahi pē Hono kakaí kapau te Ne fekauʻi ia.

Sēkope 2:27–30; Tokāteline mo e Ngaahi Fuakava 132:34–39; Kau Māʻoniʻoní, 1:131, 317–18, 538–39, 554

Hili ha ngaahi taʻu mei ai, naʻe fakahā ʻe he ʻEikí kia Siosefa mo ha Kāingalotu kehe ʻe niʻihi ke nau mali tokolahi. Naʻe ʻikai faingofua ke moʻui ʻaki ʻa e fekau ko ʻení.

Kau Māʻoniʻoní, 1:317–18, 491–93

Naʻe fokotuʻu ʻe he puleʻangá ha ngaahi lao ke fakafepakiʻi ʻa e mali tokolahí. Naʻe tuku pōpula ha Kāingalotu ʻe niʻihi, kau ai ʻa e kau taki ʻo e Siasí.

Kau Māʻoniʻoní, 2:587–90

Naʻe fakahā ʻe he ʻEikí ʻi he 1890, kia Uilifooti Utalafi ko e Palesiteni ʻo e Siasí, ʻoku ʻikai totonu ke toe mali ʻa e houʻeiki tangatá mo ha uaifi tokolahi ange ʻi he toko tahá. Naʻe vahevahe ʻe he kau taki ʻo e Siasí ʻa e fekau ko ʻení mo e Kāingalotú. ʻOku kei hoko pē ʻeni he ʻahó ni ko e fekau ʻa e ʻEikí—ʻoku totonu ke mali ha tangata ki ha uaifi pē ʻe taha.

Fanongonongo Fakamafaiʻí 1; Kau Māʻoniʻoní, 2:701–04, 710–3