Lusi Moalī mo Hono Fāmilí

ʻI ha ʻaho ʻe taha, naʻe tokoni ʻa Lusi Moalií, taʻu 15 ki hono kaungāʻapi ko ʻApikale Tanielá ke lalanga ha tupenu. ʻI heʻena ngāué, ne na fanongo ki ha tukituki ʻi he matapaá. Ko ha kau faifekau ʻe toko tolu. Naʻe fakaafeʻi kinautolu ʻe ʻApikale ki loto. Naʻa nau pehē naʻe ʻomi kinautolu ʻe Sīsū Kalaisi ke vahevahe ha pōpoaki.

Kau Māʻoniʻoní, 1:102–3

Naʻe talaange ʻe he kau tangatá kia ʻApikale mo Lusi kuo uiuiʻi ʻe Sīsū ʻa Siosefa Sāmita ke ne hoko ko ha palōfita. Naʻa nau fakamatala foki kiate kinaua fekauʻaki mo e Tohi ʻa Molomoná.

Kau Māʻoniʻoní, 1:103

Naʻe ʻohovale ʻa Lusi kuo ʻita ʻa ʻApikale. Naʻá ne fekau ʻa e kau faifekaú ke nau mavahe mei hono falé.

Kau Māʻoniʻoní, 1:103

Naʻe ʻiloʻi ʻe Lusi ko e kau faifekau ko ʻení ko ha kau tamaioʻeiki kinautolu ʻa e ʻOtuá. Naʻá ne talaange ke nau ʻaʻahi ki hono fāmilí ʻi lalo siʻi hifo he halá. Naʻá ne pehē, “ʻOku nofo ʻeku tamaí ʻi ha maile ʻe taha mei heni. ʻAlu ki ai pea ʻe fafanga mo tokangaʻi kimoutolu.”

Kau Māʻoniʻoní, 1:103–4

Naʻe moʻoni pē ʻa Lusi. Naʻe maʻu meʻatokoni lelei ʻa e kau faifekaú ʻi he faama ʻa e fāmili Moalií. Naʻe kaungāmeʻa ʻa e ongomātuʻa ʻa Lusí mo Sitenei Likitoni. Naʻa nau tui naʻe finangalo ʻa Sīsū ke nau vahevahe e meʻa kotoa naʻa nau maʻú mo e niʻihi kehé. Naʻa nau fakaafeʻi ʻa e kau faifekaú ke akoʻi kinautolu mo honau ngaahi kaungāmeʻá.

Kau Māʻoniʻoní, 1:104

ʻI he pō ko iá ʻi he tuʻapoó nai, naʻe papitaiso ha kakai ʻe toko 17. ʻI he ngaahi ʻaho siʻi hono hokó, naʻe toe omi ha kakai ʻe toko 50 kehe ki he faama Moalií ke fanongo ki he kau faifekaú, pea naʻa nau kole ke papitaiso kinautolu. Naʻa mo e kaungāmeʻa ʻo Lusi ko ʻApikale Tanielá, naʻe liliu ʻene fakakaukaú fekauʻaki mo e kau faifekaú. Naʻá ne fakakaukau mo hono husepānití ke na kau ki he Siasí.

Kau Māʻoniʻoní, 1:105; Tokāteline mo e Ngaahi Fuakava 20:25, 37