Susa Young Gates ao Joseph F. Smith

Susa Young Gates bon natin Brigham Young te aine. E bungiaki i Utah ao ni ikawairake ikekei. E tatangiria ni koroboki, ao e tatangira te beku n ana Ekaretia te Uea.

Saints, 3:9–10, 64

Ngke e a ikawai Susa, e rootaki n te aoraki ae rangi ni korakora. E bubuti te kakabwaia n te nakoanibonga. N te taeka ni kakabwaia, e tuanga Susa te Uea bwa E tangiria bwa e na karaoa te mwakuri n te tembora.

Saints, 3:193–94

I mwiin te kakabwaia, e a marurung Susa. E bane ana tai n reiakina taekan rongorongon ana utu. Ngke e kunea taekaia ana utu ake a tia ni mate ao n tuai bwabetitoaki, e nakon te tembora ni bwabetitoaki ibukiia. E tatangiria n tuangiia aomata taekan te mwakuri n rongorongoia utu. Ma te kananokawaki, a mwaiti aomata ake a aki tabe iai.

Saints, 3:194–95, 206

N te bong teuana, e kawara raoraona Susa ae Joseph F. Smith, te Beretitenti n te Ekaretia. E a maan n wene n aoraki i nanon wiiki aika a mwaiti Beretitenti Smith. E ataia naba Susa bwa e rangi n nanokawaki naba Smith ibukina bwa e a tia ni mate natina te mwaane. E nanokawaki naba ibukin bwaai riki tabeua ake a riki n te aonaaba, n aron te buaka ao taian aoraki.

Saints, 3:197–99, 205–6

Ma ngke e tekateka Susa ma Beretitenti Smith, e rangi ni kukurei ni marooro mangaia. E tuanga Susa bwa e a tia n anganna te mii ni burabeti ae onoti te Atua. Bon taekan te aonaaba n tamnei, are a nako iai aomata i mwiin mateia. E koreaki miina ni burabeti i aon te beebwa. E angan Susa te beebwa arei Beretitenti Smith ao n tuanga bwa e na warekia.

Saints, 3:206–7

E wareka te beebwa Susa. E taku taekana bwa e kawara te aonaaba n tamnei Iesu Kristo. E kanakoa Atam, Ewa, ao tabeman mwaane aika a kakaonimaki n reireiniia tamnei ake a tuai karekea te euangkerio i nanon aia tai ni maiu. A buokiia tamnei aikai ni katauraoia bwa a aonga aomata ni konaa ni bwabetitoaki ibukiia i nanon te tembora.

Reirei ao Berita aika Tabu 138:11–19, 29–48; Saints, 3:206–7

E rangi ni mimii nanon Susa ngke e wareka miin ni burabeti Beretitenti Smith. E wiingare nakoina Beretitenti Smith. E taku “Susa,” “e rangi n tamaroa am mwakuri.” E tuangnga bwa e rangi n tangiria ibukin ana onimaki iroun te Uea.

Saints, 3:206

E korea taekan te kaotioti n ana tienoo. E taku n ana taeka, “O, bon te bwai ae anganai te mwengaraoi!”. E aki kona n tataninga ma e a tuangiia raoraona ao tabeman kaain te Ekaretia taekan te bwai arei. E ataia bwa miin ni burabeti Beretitenti Smith e na buokiia Aomata aika Itiaki ni karekea te kukurei ni karaoa te mwakuri n te tembora ibukiia aomata ake n te aonaaba n tamnei.

Saints, 3:207