“Te Umwa ni Kaikain i Liberty,” Karaki man Reirei ao Berita aika Tabu (2024)
“Te Umwa ni Kaikain i Liberty,” Karaki man Reirei ao Berita aika Tabu
Okitobwa 1838–Maati 1839
Te Umwa ni Kaikain i Liberty
Kakaean te Uea n taai ni kangaanga
A mwaiti aomata ake a maeka i Missouri ake aki tangiriia Aomata aika Itiaki. E kananako te koowana nakoia Tautia bwa a na kanakoia man mwengaia. A kakioianako Aomata aika Itiaki tautia man mwengaia, a kimoai aia bwai man aia auti, ao n kaikoakiia aika a mwaiti ibuakoia.
Saints, 1:355–56, 362, 364
A kaburea te Burabeti Iotebwa Timiti ao tabeman taan kairiiri n te Ekaretia.
Saints, 1:357–58
E bubuti Iotebwa ngkana e kona n anganaki ana tai teutana ma ana utu. A aki kariaia tautia. A uotanako Iotebwa ma tabeman buure.
Saints, 1:366
N te tairiki teuana, a ongora Iotebwa ao tabeman buure ngke a ngare taan teiakiniia ibukin buakakan aroia ake a tia ni karaoia nakoia Aomata aika Itiaki. E aki kan manga ongo riki Iotebwa. E teirake ao e takarua, “Tai karongoa!” E taetae ma mwaakan te Atua. A maaku taan teiakiniia buure. A kabwaraa aia bure ao n katoka aia taetae.
Saints, 1:367–68
Rimwi riki, a kamatawarikaki Iotebwa ma raoraona n te kaawa ae arana Liberty. E rangi ni kamariri, e uarereke, ao n rotongtong te umwa ni kaikain. Bon ti te kie ae barekareka ae a kona ni matu iaona. E karako te amwarake, ao a aoraki iai.
Saints, 1:369–70, 374, 384–85
E tabetabe ana iango ibukiia Aomata aika Itiaki. E tangiriia. E raraoma ibukiia. Ma akea te bwai ae kona ni kaaoia ni buokiia.
Saints, 1:385–86
E tataro n taainako Iotebwa. E tuanga te Atua bwa E mena ia ao bukin tera E aki buokiia Aomata aika Itiaki. E a mwaninga taekana te Atua ao te Ekaretia?
Reirei ao Berita aika Tabu 121:1–6
E kaekai ana tataro Iotebwa te Atua. E taku, “Natiu, e na mena te rau n tamneim.” E tuanga Iotebwa bwa e na aki tiku nako ana kangaanga, a na riki bon ibukina. E kauringnga Iotebwa te Atua bwa e a tia te Tia Kamaiu n rinanon bwaai aika a kangaanga riki. E berita bwa E na mena iroun Iotebwa “n aki totoki.”