Kitanakin Nauvoo ao n Nako Maeao

E a tia ni mate Iotebwa Timiti. Ngkai ao a kaira te Ekaretia Brigham Young ao Abotoro tabeman. E ataia Brigham bwa a bon aki mano Aomata aika Itiaki i Nauvoo. A na riai ni kitanna. Ma, e tangiria moa te Uea bwa a na katiaa katean te tembora. E tangiriia bwa a na karaoi berita aika tabu ma Ngaia ao ni kabaeaki bwa utu.

Saints, 1:571, 579–80

Tabeua te namwakaina i mwiina, e a tauraoi te tembora ibukiia aomata ni karaoi berita aika tabu iai. Ngaa Aomata aika Itiaki ake a roko nakon te tembora. E tikunako i nanon te tembora n te tairiki Brigham ni buokiia ni karaoi berita aika tabu ma te Uea. N kabaneana, e tuangiia aomata ni kabane Brigham bwa a riai ni kitana Nauvoo.

Saints, 1:582

Ngke e uti n te ingabong are i mwiina Brigham, a mwaiti riki Aomata aika Itiaki ake a tataninga n te tembora. E tuangiia Brigham bwa e aki mano te tiku i Nauvoo. A riai ni kakaea mwengaia ae boou i Maeao. E berita nakoia bwa a na kona ni katea te tembora ae boou ngkana a roko ikekei.

Saints, 1:582–83; 2:13–14

Ma a rawa ni kitana ikekei Aomata aika Itiaki. A tangiria ni karaoi berita aika tabu ma te Uea i mwaain ae a moana mwanangaia nakon mwengaia ae boou.

Saints, 1:583

E noora ubuia ao e bita ana iango. E kabanea te bong arei ao te bong are i mwiina ni buokiia Aomata aika Itiaki ni karaoi berita aika tabu i nanon te tembora.

Saints, 1:583

Ngkai a tia ni karaoi aia berita aika tabu Aomata aika Itiaki ma te Uea, e boo tain kitanan Nauvoo. E ataia Brigham bwa e a tia ni katauraoa te tabo te Uea ibukiia. E a tia n nooria n te mii ni burabeti. A moana mwanangaia. E kamariri, ao e bokaboka aontano. A rootaki aomata n te aoraki. Ao a bane kanaia.

Saints, 2:16–18, 20–21

E a abwabwaki te kawai ibukiia Aomata aika Itiaki. E iangoia Brigham bwa a na kanga n rinanon te mwananga ae abwabwaki man kangaanga. E tataro ibukin ana ibuobuoki te Atua.

Saints, 2:46

E anga te kaotioti te Uea nakon Brigham. E reireia Brigham arona ni kairiia Aomata aika Itiaki. E taku bwa a riai ni ibuobuoki i marenaia n tabeakiniia ake a kainnano.

Reirei ao Berita aika Tabu 136:1–8

E taku te Uea bwa a riai Aomata aika Itiaki ni ururingi taian berita aika tabu ake a tia ni karaoia ma Ngaia. Ngkana a ururingnga, E na kakabwaiaia ao ni buokiia i nanon aia tai ni mwananga.

Reirei ao Berita aika Tabu 136:4, 11, 42; Saints, 2:47

E teimatoa ni matoatoa aron te mwananga. A mate tabeman aomata. Ma ibukin aia berita aika a tabu n te tembora, a ataia Aomata aika Itiaki bwa a na manga nooria kaain aia utu.

Tabeua te namwakaina i mwiina, a roko taan moan mwananga irouia Aomata aika Itiaki n te Salt Lake Valley n 1847. Ngke e noora te tabo arei Brigham young, ao e taku, “Aei raoi te tabo.” Bon te tabo raoi are e a tia n nooria n te mii ni burabeti. Aio bon te tabo ae a na mano iai Aomata aika Itiaki. A kona ikai n tataroa te Uea ao ni karaoa Ana mwakuri i nanon te rau.

Saints, 2:17, 64–67

I nanon te ririki anne, a mwaiti riki n roko Aomata aika Itiaki. A katei tembora aika mwaiti riki, ike a kona iai ni karaoi berita aika tabu aomata ma te Uea. A kanakoia mitinare ni kabuta te aonaaba n reireia ana euangkerio Iesu Kristo. E reitinako n rikirake ana Ekaretia te Tia Kamaiu, ni kakabwaiaia natin Tamara are i Karawa n taabo nako.