E Kateaki Ana Ekaretia Iesu Kristo

E tuai boretiaki Ana Boki Moomon, ao mwaakan Ana nakoanibonga te Atua e a manga oki nako aon te aba. Te Uea e tuanga Iotebwa Timiti bwa aio te tai are e na katea Ana Ekaretia Iesu Kristo.

Saints, 1:84

N Eberi 6, 1830, e kaniia 40 aine ao mwaane ake a roko nakon mweengaia te utu ae Whitmer ni katea te Ekaretia. E a tia te Uea ni wetea Iotebwa ao Oliver bwa a na kaira Ana Ekaretia. E tuangiia aomata Iotebwa ao Oliver bwa a na katei baia ni kaota ae a boutokaiia bwa aia tia kairiiri.

Reirei ao Berita aika Tabu 20:1–3; Saints, 1:84

Imwina, a kakabwaia te toa Iotebwa ao Oliver. A kabutia nakoia aomata ni buokiia ni uringa Iesu Kristo. Imwina a katokai baia Iotebwa ao Oliver i aon atuuia aomata ake a tia ni bwabetitoaki. A kamatoaia bwa kaain te Ekaretia ao n anganiia ana bwaintituaraoi te Tamnei ae Raoiroi.

Reirei ao Berita aika Tabu 20:75–79; Saints, 1:85

Te Uea e angan Iotebwa te rongorongo ibukin te Ekaretia ae boou. E tuangiia bwa a na korea te bwai ae riki n te Ekaretia. E taku bwa Iotebwa Timiti bon te burabeti. E berita nakoia kaain te Ekaretia bwa ngkana a irira te tua are E angan Iotebwa, E na kakabwaiaiia. A na akea korakoran te riaboro i aoia.

Reirei ao Berita aika Tabu 21:1–6; Saints, 1:85

A kukurei aomata ngkai iai Ana Ekaretia Iesu Kristo! Imwin te bootaki, a mwaiti aomata aika a bwabetitoaki, ni ikotaki ma tinan ao taman Iotebwa. Ngke e otirake tamana man te ran, e inga ma ngaia Iotebwa. “I a tia ni maiu n noora tamau ni bwabetitoaki nakon Ana ekaretia Iesu Kristo” e taku.

Saints, 1:86

Imwina n te tairiki anne, e nako Iotebwa n te buakonikai n tiku n tii ngaia. E kaonaki nanona n te kimwareirei. Ai bon 10 te ririki man te tai are e noora iai Tamara are i Karawa ao Iesu Kristo. A mwaiti baika a riki imwiin te tai anne. E rangi ni kakaitau Iotebwa ngkai e kona ni buoka kaokan, ke ni karekea okin Ana Ekaretia Iesu Kristo!

Saints, 1:86