Katean ana Tembora Kirtland

Te Uea e tuanga Iotebwa Timiti bwa aio aia tai Aika Itiaki ni katea ana auti te Uea ae onoti i Kirtland. E na riki te auti aei bwa te tembora, te tabo are e na kawariia iai Ana aomata te Uea ao ni karaoi berita ma ngaiia. E na anganiia te bwaintangira ae onoti n Ana tembora. E arana te bwaintangira bwa karekean te mwaaka.

Reirei ao Berita aika Tabu 88:119; 95:8; Saints, 1:205

A aki waekoa ni katea te tembora Aika Itiaki n te tai naba arei. Tabeua te namwakaina imwiina, e kauringiia te Uea bwa te tembora e bon rang ni kakaawaki. E biri nakon aia auti ana karo Hyrum Smith bwa e na rikoi bwaai ni mwakuri. Ngke e titirakinna tinana bwa e na nakea, e taku bwa e tangiria n riki bwa te moan aomata ni mwakuri iaon ana auti te Uea.

Reirei ao Berita aika Tabu 95:1–8

A waaki ni katea te tembora aomata Aika Itiaki i Kirtland. E rang bobuaka ao e kainnanoa te mwakuri ae mwaiti. Membwa n te Ekaretia n ai aron Sidney Rigdon a anga te mwane ae mwaiti ibukin katean te tembora. A kukukrei n ira ana tua te Uea ao ni karekei Ana kakabwaia n Ana auti.

Saints, 1:209–211

Ngke a mwakuri Aika Itiaki iaon te tembora, a bon bane aia mwane. Sidney ao taan kairiiri ake tabeman a raraoma. Sidney e tataro nakon te Atua ibukin ana ibuobuoki.

Saints, 1:210–11

Kain te ekaretia ae arana Caroline Tippets ma ana utu a tia ni kawakina te mwane ae mwaiti. E angan te Ekaretia Caroline bwa e na tangoa aia mwane ni buoka katean te tembora.

Saints, 1:211–13

A mwaiti Aika Itiaki i Kirtland ake a mwakuri korakora ni katea te tembora. Tabeman a katiki aenikaa aika onrake n atibu nakon te tembora. Tabeman a karaoi kunnikai ao amwarake ibukiia taan mwakuri. Ataei a rikorikoi kiraati ake a maibi bwa a na kamantaki ao ni katokaaki iaon oon te tembora bwa aonga n raneanea ao n takiakia n otan taai.

Saints, 1:210, 219, 221

E tia te tembora n te tai ae waekoa! A rang kukurei Aika Itiaki n nakon ana auti te Uea ni karekei kakabwaia ake E a tia ni berita iai nakoia.

Saints, 1:221