Bwaeao ae Bati Bona

N te bong teuana, e roko temanna te mwaane i Kirtland ma taian mate aika niniraki mai Aikubita. Raon taian mate aika niniraki aikai bon tabeua beeba aika niniraki, ke roora ni beeba aika a rang maan. Iai koroboki mai Aikubita aika a korobokiaki iaona. E kaoti te mwaane aei nakon te Burabeti Iotebwa Timiti. E katikaki nanon Iotebwa n te koroboki.

Saints, 1:219–20

Tabeman raraona a buoka Iotebwa ni kabooi maate aika niniraki aikai n raonaki ma te niraniboki. Ngke e kamatebwai koroboki Iotebwa, te Uea e kaoti nakoina koroboki ake ngkoa mairoun Aberaam, te burabeti n te Baibara. Man aia ibuobuoki raoraona n aron Oliver Cowdery, Iotebwa e koroi bwaai ake e reireinna te Uea ibukin ana reirei Aberaam.

Saints, 1:220

Aberaam e a kaman noora te mii ni burabeti ni maiura ma Tamara are i Karawa imwain bungiakira. E nooria ngke e rineaki Iesu bwa e na riki bwa ara Tia Kamaiu. E reirei naba Aberaam taekan karikan te aonaaba. A kukurei Aika Itiaki ni karekei reirei aikai mairoun Aberaam. A rang kukurei bwa te Uea e tangiria n reireiniia ae mwaiti riki.

Aberaam 2:6–11; 3–5; Saints, 1:220

Ana koroboki Aberaam e riki bwa mwakoron koroboki aika a tabu ae e aranaki bwa te Bwaeao ae Bati Bona. Te boki aei iai naba ana koroboki iai Mote, te burabeti temanna man te Baibara. E reirei koaua ake a bua man te Baibara. E tangiriia aomata te Uea bwa a na atai koaua aikai, ngaia are E tibwaia ma Iotebwa Timiti.

Mote 1–8; Aberaam 1–5

Te Bwaeao ae Bati Bona iai naba iai ana koaua Iotebwa Timiti ao 13 Taekan te Onimaki. E korei bwaai aikai Iotebwa n tuanga te aonaaba te bwai ae a kakoaua Aika Itiaki ni Boong aika Kaitira. Te Bwaeao ae Bati Bona bon te boki ae uarereke, n aron te bwaeao e uarereke, ma e rang kakaawaki.

Iotebwa Timiti—Rongorongo; Taekan te Onimaki 1