Mary ao Caroline Rollins

Ai 12 ana ririki Mary Rollins ngke a moan roko mitinare i Kirtland, Ohio. E ongo irouia n taekan ana Boki Moomon. N te tai anne, bon ti teuana katotongan te boki i Kirtland, ao te tia kairiiri n te Ekaretia ae arana Isaac Morley iai irouna.

E nakon ana auti te Tari Morley Mary ao e bubuti ngkana e kona n noora te boki. E anganna te Tari Morley bwa e na taua. E bubuti Mary ngkana e kona n uotia nakon mweengana.

Te Tari Morley e bon aki kan angan Mary te boki. E tuai ni bane ana wareware iai. E bubutia te Tari Morley Mary bwa e na anganna bwa e na tangoia.

E kariaia te Tari Morley. E taku bwa e kona n ana te boki Mary ngkana e na moantaai ni uotia n oki n te bong are imwiina. Ai aron ae e reke iroun Mary te kaubwai. E bwakanako ana tai n te tairiki anne ni wareware.

Ngke e kaoka te boki Mary, te Tari Morley e mimii ni mwaitin are e a tia ni warekia. “Natiu,” e taku, “uota te boki aei nakon mweengam ao kabanea warekia. I kona n tataninga.”

Ai tibwa te moan aomata Mary iaon Kirtland ni wareka ana Boki Moomon ni karokoa e bane. Bon imwiin are e bane irouna, e kaitibo ma te Burabeti Iotebwa Timiti. Ngke e kunea mwaitin tatangiran ana Boki Moomon iroun Mary, e tuangnga bwa e kona ni kawakina ana boki te Tari Morley. E na angan te Tari Morley ana boki teuana.

Imwiina n te ririki anne, Mary ma ana utu a mwaing nako Independence, Missouri. E rang kukurei ni mataku ngke taan kairiiri n te Ekaretia a waaki ni kabobonga te boki ae boou ae aranaki bwa te Boki n Tua. Te boki aei iai inanona kaotioti aika a mwaiti are e anga Iesu Kristo nakon Iotebwa Timiti.

Reirei ao Berita aika Tabu 67; 70:1–4; Saints, 1:178

Ma tabeman aomata i Independence a ririba te Ekaretia. A tangiriia Aika Itiaki bwa a na nako. N te bong teuana, a rin mwaane ake a un i nanon te kateitei are e boretiaki iai te Boki n Tua. A karenakoi bwaai ni boreeti i tinanikun te winto ao ni kamaenakoi baan te Boki n Tua nako nanon te kaawa.

Saints, 1:177–78

Mary ma tarina, Caroline, a mataku mai akuun te oo. Mary e tuanga Caroline bwa e tangiria ni kawakin baana i mwain ae a urubekeaki. Caroline e maakuia mwaane ake a un. “Ae ana tiringiira,” e taku. Ma Mary ao Caroline a ataia bwa iteraniba akekei iai ana taeka te Atua iaona.

Saints, 1:178

A tataninga taari aikai ni karokoa aki nooraki irouia mwaane. Imwiina a biri nako nanon te kaawa n rikoi baana n nakon are a kona. Ngke a kawaekoa n nako, tabeman mwaane a nooriia ao a takarua nakoia bwa ana tei. A kamatoai n taui beeba i baia Mary ao Caroline ao a kabirimwaakaia nakon te rua ni koon ae uakaan.

Saints, 1:178–79

Uoman mwaane a kaeia taari inanon te marae ni koon. A bon rang ririeta koon, a aki kona n noora te tabo ae a na nako iai Mary ao Caroline. A bwaka i aon tano Mary ao Caroline ao a karabai baan beeba iaaia. A kakauongo ni kainabwaabu ngkai uoman mwaane a nakonako rinnanon te koon ni kakaeia.

Saints, 1:179

N te tai ae aki maan ao a bwara nanoia mwaane. A mano raoi Mary ao Caroline. A tia ni kamanoi iteranibaan ana kaotioti te Uea n Ana Boki n Tua. Ni boong aikai kaotioti akanne a mena i nanon Reirei ao Berita aika Tabu.

Saints, 1:179