Ana Mwakuri ni Mitinare Parley i Canada

Bon imwiin katabuan te Kirtland Tembora, a mwaiti taan kairiiri n te Ekaretia aika a nako n aia mition n tataekina te euangkerio.

Reirei ao Berita aika Tabu 88:81; 109:22–23; 112:28–29; Saints, 1:249

E tatangiria Parley Pratt n tibwaua te euangkerio. Ma e iangoia bwa e riai n tiku ni mweengana ibukina bwa kainnabana, ae arana Thankful, e aoraki. E bon aki naba tau mwaitin aia mwane.

Saints, 1:249

Heber Kimball, raraon Parley ao bon temanna te Abotoro, e roko ni kakawari. E kakabwaia Parley ao e taku bwa e na nako n tataekina te euangkerio i Canada. N te kakabwaia, Heber e berita bwa e na marurung Thankful. E berita bwa e na reke natina te mwaane ao te Uea e na buoka Parley ni karekea te mwane are e kainnanoia.

Saints, 1:249–50

A tia ni mareaki Thankful ao Parley inanon 10 te ririki. A tuai n reke natiia. Ma iai aia onimaki n ana berita te Uea. E ngae ngke e na bon kanganga te raroanako ma Thankful i Canada, Parley e nako n tibwa te euangkerio.

Saints, 1:250

I Canada, e taratarai taabo Parley ake e na kona iai n reireiniia aomata. E titiraki ngkana e kona n reirei inanon umwantabu ao ni kateitei tabeua. A rawa iai aomata.

Saints, 1:252–53

E kaitibo imwiina Parley ma John ao Leonora Taylor. A tangira Iesu Kristo ao te Baibara. John e titirakina Parley ngkana te bwai are e angareirei iaona e kaokoro ma te Baibara.

Saints, 1:252–53

E taku Parley bwa e reirei taekan Iesu, burabeti, te bwabetito, ao te Tamnei ae Raoiroi. Bwaai akanne ni kabane iai n te Baibara. E titiraki John, “Tera aron Iotebwa Timiti ao ana Boki Moomon?” E tuanga John Parley bwa e ataia bwa e koaua ana Boki Moomon, n ai aron te Baibara, ao Iotebwa Timiti bon ana burabeti te Atua.

Saints, 1:253

E kakoaua John te bwai are e taekinna Parley. E wareka ana Boki Moomon ao e ataia bwa e bon koaua. John ao Leonora a kaoia raoraoia aika Joseph, Mercy, ao Mary Fielding ao tabeman riki bwa a na roko n ongora n ana angareirei Parley. A mwaiti aomata ake a bwabetitoaki ao a kaina te Ekaretia.

Saints, 1:254–55

E kukurei Parley, ma e tangiria n okira mweengana n nakon Thankful i Kirtland. E kaboo ma raoraona aika a boou i Canada. Ngke e taubai ma ngaiia, a anganna te mwane ni buokia n tararuaia ana utu.

Saints, 1:255–56

Ngke e okira mweengana Parley, e kunea bwa e a rang namakina te marurung Thankful. E karekei katoton riki ana Boki Moomon Parley ao e oki nako Canada n reitanako tibwauaan te euangkerio. N te tai aei, Thankful e a iria.

Saints, 1:256

A waekoa Thankful ao Parley ni kunea bwa e nang reke natiia. A uringa te kakabwaia are e anga Heber nakon Parley. A namakinna bwa bwaai ni kabane ake e a tia ni berita iai te Uea n te kakabwaia a koro bukiia.

Saints, 1:256