Karaki man Booki Aika Tabu
Hawn’s Mill

“Hawn’s Mill,” Karaki man Reirei ao Berita aika Tabu (2024)

“Hawn’s Mill,” Karaki man Reirei ao Berita aika Tabu

Okitobwa 1838–Beberuare 1839

Hawn’s Mill

Te roko ni iowaawa ao te kakai

Willard Smith ao ana utu i Hawn’s Mill.

Ai bon 11 ana ririki Willard Smith. A maeka ana utu i Hawn’s Mill, Missouri, ma Aomata aika Itiaki tabeman. A tangiria ni botaaki ni waekoa ma Aomata aika Itiaki i Far West.

Reirei ao Berita aika Tabu 115:7–8; Saints, 1:347–48

A roko aomata ni iowaawa nakoia Aomata aika Itiaki i Hawn’s Mill.

N te bong teuana, Williard bon raona tamana ao tarina, aika Sardius ao Alma. N te tai ae waekoa, a ongo rebwen katii ao tatakarua. A roko aomata ni iowaawa nakoia Aomata aika Itiaki.

Saints, 1:348–49

A karabaia aomata mairouia taan iowaawa i Hawn’s Mill.

A bane ni biri aomata ni kakaea kamanoaia. A mwaiti mwaane ao ataei ake a karabaia n te tabo ni kabonakoi taian biti. A mena naba iai taman ao tarin Willard, ma e maenako ma ngaiia Willard. E karabaa i akuun bwariko ni kai. E ongo rebwen katii ni katobibiia.

Saints, 1:349, 353

E biri Willard.

E biri man te tabo teuana nakon teuana ni karaba iai. N tokina, e a toki te kakatii. A kitana Hawn’s Mill taan iowaawa.

Saints, 1:353

E roko n te tabo ni kabonakoi biiti Willard.

E roko n te tabo ni bobwai anne ni kakaeia ana utu. A tiringaki tamana ao Sardius. Ma e maiu tarin Willard ae uarereke are Aramwa.

Saints, 1:353

E uouota tarina Willard are Aramwa.

E teke bebeen Aramwa n te katii. E rangi ni kakaiaki ikoakina. E tabeka Aramwa ao n uotia nakon aia auti n rianna ana utu.

Saints, 1:353–54

E tataro Amanda Smith ibukin natina te mwaane are Aramwa.

E aki ataia Amanda, are tinan Willard bwa e na kanga ni buoka ikoakin bebeen Aramwa. Ma e ataia bwa e kona ni buokia te Atua. E tataro, ao e ongo te bwanaa ae tuangnga raoi arona bwa e na karaoia.

Saints, 1:354

E karaoa ikoakin Aramwa Amanda.

E teboka ikoakin Aramwa n taian mannang. Imwiina e ikiika tabeua wakaan aroka ao ni katokaa i aon ikoakina. E niira bebeena n te kunnikai. “Wene n arom anne, ao tai kakammwakuri,” e taku “ao e na manga anganiko bebeem teuana te Uea.”

Saints, 1:354–55

E tataro ibukin te buoka Amanda.

Rimwi, e taekinna te koowana i Missouri bwa a riai Aomata aika Itiaki ni kitana Missouri ao ngkana aki ao a na tiringaki. Ma e tuai raoiroi bebeen Aramwa. E tataro Amanda ao ni butiia te Uea ana ibuobuoki. E tuangaki n te bwanaa bwa Iesu e na bon aki kitana ana utu. E namakinna Amanda bwa bon akea te bwai ae kona n kaikoakia.

Reirei ao Berita aika Tabu 88:83; Saints, 1:372, 378–79

E nakonako Aramwa imwiin tokin ikoakin bebeena.

Imwiin ana tataro, e ongo takaruaia natina Amanda. E biri ni kakaeiia, ao ngke e nooria, e biriaitua Aramwa. E taku, “I a marurung, Tinau, I a marurung!”. E a toki ikoakin bebeena! Bon te kakai mairoun te Uea. A kitana Missouri Amanda ma natina ni kakaea te tabo ae mano ma Aomata aika Itiaki.

Saints, 1:379