Te Utu ae te Jackson

Imwiin nakoia nako Salt Lake Valley kain te moan kurubu irouia Aomata aika Itiaki, ngaa n aomata riki ake a nako naba. A mwananga n te kawai ae abwabwaki, ao e buokiia te Uea. Teuana te utu ake a mwananga naba bon te Utu ae Jackson. A kitana mwengaia i Engiran ao n rangi ni kukurei n nako ni buokiia Aomata aika Itiaki ni katea Tion.

Reirei ao Berita aika Tabu 136:1–11; Saints, 2:222–23

A rinanon marawa te utu ae Jackson i aon te kaibuke. Imwiina a toka n turein ni iteran mwanangaia nakon te Salt Lake Valley. A na riai n nakonako ni karokoia ni kawaia.

Saints, 2:222–23

A karaoa te aenikaa ae uarereke ni uoti iai kanaia, kunnikaia, ao aia bwai riki tabeua ake a tangiria n uotia. A mwaiti Aomata aika Itiaki ake a roko raoi nakon te tabo n te aro aei.

Saints, 2:223–26

A kokooka aia aenikaa aika tinebu Elizabeth ao Aaron. A nakonako natiia aika Martha, Mary, ao Aaron Jr. Bon te mwakuri ae kangaanga. Aia iangoia bwa tera ngke a roko n te valley i mwaain tain te kamwaitoro. Ma ngke e roko tain bwakan baanikai, e bon raroanako naba te tabo ae a na mwananga nako iai. E a moanna n roko te mwaitoro, ao a moana ni bane kanaia.

Saints, 2:223–26, 229, 231–32

E kunea taekaia Aomata aika Itiaki Brigham Young i Salt Lake City, ake a mwananga ni kaea te valley. E raraoma ibukiia. N te bong are i mwiina n tain te taromauri, e tuangiia aomata nako bwa a taonaki n te kangaanga Aomata aika Itiaki ake i aon kawaia n roko. E tuangiia bwa a na kaoni aia waekon ni bwaai ake a na bae ni kainnanoaki. E taku “Nako ao uotiia mai koraki akanne,”.

Saints, 2:229–30

Aine ake a mena n te boowi a butii nangoan aia kau aika a maten man abuee ao ni katokai i aon taian waekon. A anga tabeman kanaia, rabuna burangketi, taian kau, ao kunnikai. Uoua te bong i mwiina, e raka i aon 50 mwaane ao 20 waekon ake a kitana te valley n nako ni ibuobuoki.

Saints, 2:230

Ngke a tabe n nakonako te utu ae Jackson, e a moanna ni bwaka te tinoo. E a rangi n aoraki Aaron. E a kangaanga irouna bwa e na nakonako. Ma a riai Aomata aika Itiaki n toua nanon te karanga ae rangi ni mwaitorotoro, ao e a karika riki mamaaran aio Aaron. E mate Aaron n te tairiki anne. Ma nanokawakiia ana utu, a bon riai ni waaki nako n akea ngaia.

Saints, 2:232–34

N te bong are i mwiina, e a matenten riki te tinoo i aon tano. A kooka ao ni katika aia aenikaa ana utu Jackson ao tabeman riki rinanon te tinoo. A tataro ni katoa bong bwa e na buokiia te Atua.

Reirei ao Berita aika Tabu 136:29; Saints, 2:234–35

N te tairiki teuana, e rangi n raraoma Elizabeth ibukiia natina. A rangi ni baki man mariri. A na kona n roko n te Salt Lake Valley? E matunako ao e a mii bwa e noora Aaron. E taku Aaron, “Kakukureia nanom, Elizabeth.” E tuangnga bwa e a kaan roko te ibuobuoki.

Saints, 2:235–36

E bon koaua are e taku Aaron. N te tai ae tawe, ao a roko mwaane mai Salt Lake ma aia waekon. A anganiia Aomata aika Itiaki amwarake ao kunnikai. A kukurei ao n ngarengare Aomata aika Itiaki ao n irabwati ma mwaane akekei. A anenea te anene n taromauri ao ni karabwaa Tamaia are i Karawa ibukin kaekaan aia tataro.

Reirei ao Berita aika Tabu 136:28; Saints, 2:236

A bon roko raoi iai n te bong ae te Tabati. E tuangiia kaain te Ekaretia i Salt Lake City Brigham Young bwa a na aki moa nako n taromauri ma a na nako moa ni butimwaeia raoia ake a tibwa roko. A butimwaeia man kamauriia Aomata aika Itiaki aika a mariri ao ni kua bwa a na tiku ni mwengaia.

Saints, 2:239–40