“Te Koraki ake Iteraera,” Karaki man Reirei ao Berita aika Tabu (2024)
“Te Koraki ake Iteraera,” Karaki man Reirei ao Berita aika Tabu
Nobembwa 1833–Beberuare 1835
Aia Kaembwa Iteraera
Reiakinan onimakinan te Uea
A kainnanoa te ibuobuoki Aika Itiaki ake a maeka i Independence, Missiouri. A tia n mwakuri korakora ni katea Tion n aron are e tua te Atua. Ma aomata tabeman n te tabo anne a bon aki tangira tikuia ikekei. A karaoi waaki are a na kitana iai mwengaia Aika Itiaki.
Saints, 1:195
E maeka Iotebwa Timiti i Kirtland. E ongo te bwai ae riki nakoia Aika Itiaki i Missouri, ao e nanokawaki iai. E tataro bwa e na ataia bwa tera ae e na karaoia. E tua te Uea nakon Iotebwa bwa e na kakaeia aomata bwa raona n nako Missouri. Aia kantaninga bwa e na kona ni buokiia te tautaeka ni kaoka mwengaia Aika Itiaki.
Reirei ao Berita aika Tabu 103:1–2, 11–20, 30–34; Saints, 1:195–96
E nakon te mwaiti ae 100 aomata ake a anga nanoia bwa a na raonna. E arana te kurubu aei te Burabeti bwa te Koraki ake Iteraera. A rangi ni kukurei n nako ni buokiia Aika Itiaki i Missouri.
Saints, 1:197–99
Bon kaain naba te kurubu aei Brigham Young ao raoraona ae Heber Kimball. E roko man te tabo ae raroa ae New York te ataeinimwaane ae Wilford Woodruff bwa e na ibuobuoki.
Saints, 1:197–98
A mwaiti aomata ake a raoniia. A nakonako inanon teuana te namwakina ao n rinanon te karanga ae rababa nako Missouri. A kua ao man rootaki rabwataia. E karika naba te un ae korakora te rianna ae abwabwaki aei irouia tabeman aomata. E bon rangi n raroa te kawai ni karoko n te kawa ae Independence.
Saints, 1:200–201
Ngke a tabe n rianna, e weteiia te aine. E taku bwa a roko tabeman mwaane bwa a na tiringiia.
Saints, 1:203
A tiku i aon te tabuki i etan te karanga te Koraki ake Iteraera n te tairiki. Ngke a katei aia umwa n rianna, a roko niiman mwaane ake a toka i aon aia aoti. A taetae ni kamoamoa bwa 300 riki mwaane ake i aon kawaia n roko n buakaniia. A mwaiti mai buakoia te Koraki ake Iteraera ae a rangi n raraoma. E tuangiia Iotebwa bwa a na onimaki bwa e na buokiia te Atua.
Saints, 1:203
E aki maan ao e onrake karawa n naang aika a rooro. E moana bwakan te karau ae rangi ni korakora. E a iabuti te karanga. A bwaka aroka man karen te ang ae korakora. E otamwaaka te iti i karawa. A kunea te umwantabu ae uarereke Iotebwa ma raona are a kona ni mano iai. A anenei anenen taromauri i nanon te tairiki anne. “E mena te Atua inanon te angibuaka aei!” E taku Joseph.
Saints, 1:203–4
Te angibuaka e totokoia aomata ake a na roko ni iowawa nakoia. A mano kaaina. Ma e taku te tautaeka bwa aki kona ni buokiia Aika Itiaki. E tuanga Iotebwa te Uea bwa a riai n okira mwengaia te Koraki ake Iteraera. A riai Aika Itiaki ni katea Tion man kawakinan ana tua te Atua. E berita E na “buaka n ana buaka Tion.”
Reirei ao Berita aika Tabu 105:1–19; Saints, 1:204–5
A un nanoia tabeman kaaina ngke a ongo aio. A nanokawaki ngke a aki kaaina te buaka ibukin Tion. A taku tabeman bwa e aki koro nanon tibwangaia te Koraki ake Iteraera. Ma tabeman n aron Brigham Young, Heber, ao Wilford, a karabwarabwa ibukin reken aia tai ni mena irarikin te Burabeti ae Iotebwa ao n reiakinaki mai Rouna.
Saints, 1:205–6
Rimwi riki, e tuanga Iotebwa Timiti te Uea bwa e na weteia Tengaun ma Uoman Abotoro bwa a na buoka kairan Ana Ekaretia. A na riki Abotoro bwa taan kakoaua aika a onoti n aran Iesu Kristo n te aonaaba ni kabuta. Waniman mai buakoia Abotoro ake Tengaun ma Uoman bon ngaiia ake a rianna Ibuakoia te Koraki ake Iteraera. Aia ibuobuoki ma Iotebwa e buokiia ni katauraoiia ibukin te wewete ae kakaawaki aei.
Reirei ao Berita aika Tabu 18:26–27; 107:23; Saints, 1:214–17