“ʻOku Foaki ʻe Siosefa mo Hailame ʻEna Moʻuí maʻá e Ongoongoleleí,” Ngaahi Talanoa ʻo e Tokāteline mo e Ngaahi Fuakavá (2024)
“ʻOku Foaki ʻe Siosefa mo Hailame ʻEna Moʻuí maʻá e Ongoongoleleí,” Ngaahi Talanoa ʻo e Tokāteline mo e Ngaahi Fuakavá
Māʻasi–Sune 1844
ʻOku Foaki ʻe Siosefa mo Hailame ʻEna Moʻuí maʻá e Ongoongoleleí
ʻOku pekia ʻa e Palōfitá, ka ʻoku kei hokohoko atu pē e ngāue ʻa e ʻEikí
Naʻe hohaʻa ʻa Siosefa Sāmita. Ko e hā e meʻa ʻe hoko ki he Siasí kapau ʻe mate? Naʻá ne loto ke fakapapauʻi ʻe kei hokohoko atu pē e ngāue ʻa e ʻEikí. Ko ia naʻá ne fakatahatahaʻi mai ʻa e kau ʻAposetoló ʻo foaki kiate kinautolu ʻa e ngaahi kī ʻo e lakanga fakataulaʻeikí kuo foaki ange ʻe Sīsū Kalaisi kiate iá. Naʻe mahino heni ʻe lava ʻa e kau ʻAposetoló ʻo tataki e Siasi ʻo e ʻEikí mo fakahoko ʻEne ngāué. Naʻe tokoni ʻeni ke ongoʻi fiemālie ange ai ʻa Siosefa.
Kau Māʻoniʻoní, 1:519–20
Ka naʻe tokolahi ha kakai naʻa nau ʻita kia Siosefa. Naʻe ʻi ai ha niʻihi naʻa nau loto ke tamateʻi ia. Naʻe ʻikai ke nau saiʻia ʻi he meʻa naʻá ne akoʻí. Naʻa nau tohi ʻi ha nusipepa ʻo kau kiate ia ke fakatupu ai ha ʻita ʻa ha kakai tokolahi kia Siosefa mo e Siasí. Naʻe loto hanau niʻihi ke ʻohofi ʻa Nāvū.
Kau Māʻoniʻoní, 1:526–28, 530–32, 533–34
Naʻe fakaʻauha ʻe Siosefa mo e kau taki kehe ʻi Nāvuú ʻa e mīsini pākí ke taʻofi e mafola ʻa e tāufehiʻá. Naʻe ʻita lahi ange ai heni ʻa e kakaí. Naʻe talaange ʻe he kōvaná kia Siosefa ke ʻalu ki he kolo ko Kātesí ke fakapapauʻi ai ʻe ha fakamaau pe naʻá ne maumauʻi ʻa e laó. Naʻe ʻiloʻi ʻe Siosefa kapau te ne ʻalu ki Kātesi, ʻe tāmateʻi ia ʻe he kakaí.
Tokāteline mo e Ngaahi Fuakava 135:4; Kau Māʻoniʻoní, 1:533–37, 539–41
Ka naʻe loto foki ʻa Siosefa ke malu ʻa e Kāingalotú. Kapau te ne ʻalu ki Kātesi, mahalo ʻe tukunoaʻi leva ʻe he kakaí ʻa e Kāingalotu ʻi Nāvuú. Naʻe fakakaukau ʻa Siosefa ke ʻalu. Naʻá Ne tāpuakiʻi ʻa ʻEma mo ʻene fānaú, pea feʻiloaki fakamāvae kiate kinautolu, pea mavahe leva ki Kātesi.
Kau Māʻoniʻoní, 1:542–44
Naʻe ʻalu ʻa Siosefa mo hono tokoua ko Hailamé. Pea pehē foki kia Sione Teila, Uiliate Lisiate, mo ha ngaahi kaungāmeʻa kehe. ʻI heʻenau mavahé, naʻe taʻofi ʻe Siosefa ʻene hōsí pea toe sio ki Nāvū. Naʻá ne pehē, “Ko e feituʻu fakaʻofoʻofa tahá ʻeni pea mo e kakai lelei taha ʻi he lalo langí.”
Kau Māʻoniʻoní, 1:543–45
ʻI heʻenau tūʻuta ʻi Kātesí, naʻe puke pōpula kinautolu. Lolotonga ʻenau ʻi he fale fakapōpulá, naʻe lau ange ʻe Hailame ʻa e Tohi ʻa Molomoná kiate kinautolu. Naʻe talaange ʻe Siosefa ki he kau leʻó ʻoku moʻoni e Tohi ʻa Molomoná.
Kau Māʻoniʻoní, 1:546
Naʻe hivaʻi ʻe Sione Teila ha foʻi himi kau kia Sīsū ke fakafiemālieʻi ʻaki hono ngaahi kaungāmeʻá. Naʻe fakaʻofoʻofa, pea kole ange ʻe Hailame ke ne toe hivaʻi ia.
Kau Māʻoniʻoní, 1:549
Kimui ange ʻi he ʻaho ko iá, naʻe feʻohofi atu ha kau tangata loto-ʻita mo ha ngaahi meʻafana ki he fale fakapōpulá. Naʻa nau tekeʻi ʻa e matapaá pea kamata ke nau fana ki he loki naʻe ʻi ai ʻa Siosefa mo hono ngaahi kaungāmeʻá. Naʻe lavea lahi ʻa Sione Teila. Naʻe mate ʻa Hailame mo Siosefa.
Tokāteline mo e Ngaahi Fuakava 135:1–2; Kau Māʻoniʻoní, 1:550–52
Naʻe loto-mamahi ʻaupito e Kāingalotú ʻi heʻenau ʻilo kuo pekia ʻa Siosefa mo Hailamé. Ka naʻa nau ʻilo he ʻikai ke taʻofi ʻa e Siasí ʻi hono tamateʻi ʻa e Palōfitá. Ko e Siasi ia ʻo e Fakamoʻuí, pea ʻe hokohoko atu ʻEne tataki iá. ʻE hokohoko atu e tupulaki mo hono tāpuakiʻi ʻe he Siasí e fānau kotoa ʻa e ʻOtuá ʻi he funga ʻo e māmaní.
Kau Māʻoniʻoní, 1:553–59