Mali Taʻengatá mo e Ngaahi Fāmili Taʻengatá

ʻI he taimi naʻe mali ai ʻa ʻEma mo Siosefá, naʻá na tui ʻe ngata pē ʻena nofo-malí ʻi he taimi te na mate aí. Ko e meʻa ʻeni naʻe hoko ki he mali kotoa pē. Ka naʻe fakahā ʻe he ʻEikí kia Siosefa ʻe lava ke tolonga ʻo taʻengata ʻa e nofo-malí mo e ngaahi fāmilí.

Kau Māʻoniʻoní, 1:413

Naʻe akoʻi ʻe he ʻEikí kia Siosefa ʻo kau ki he mali taʻengatá. ʻE lava ha tangata mo ha fefine ʻo fai ha fuakava mo e ʻEikí, ʻo fakafou ʻi he mālohi ʻo e lakanga fakataulaʻeikí. Kapau te na tauhi ʻena fuakavá, ʻoku talaʻofa e ʻEikí ʻe tolonga ʻo taʻengata ʻena nofo-malí. ʻOku ui ʻeni ko e silaʻi. Naʻe ʻikai fuoloa mei ai, kuo silaʻi ʻa Siosefa mo ʻEma ki he taʻengatá.

Tokāteline mo e Ngaahi Fuakava 132:7, 19–24; Kau Māʻoniʻoní, 1:413, 432–33, 481–82, 492, 502–3

Naʻe ʻilo foki ʻe Siosefa ko e taimi ʻe silaʻi ai ha tangata mo ha fefine, ʻe silaʻi leva mo ʻena fānaú kiate kinaua. Koeʻuhí ko e mālohi ʻo Sīsū Kalaisí, ʻe lava ke tolonga hona fāmilí ʻo taʻengata. ʻI he taimi naʻe fakahā ai ʻe Siosefa ki he Kāingalotú ʻa e tāpuaki ko ʻení, naʻa nau fiefia ʻaupito! Naʻe ʻikai ke nau faʻa tatali ke silaʻi fakataha kinautolu.

Tokāteline mo e Ngaahi Fuakava 131:2; 132:6–7; Kau Māʻoniʻoní, 1:492–93, 580

Naʻe akoʻi kimui ange ʻe he ʻEikí ʻoku totonu ke fakahoko ʻa e ngaahi silá ʻi he temipalé. Naʻe ngāue mālohi e Kāingalotú ke fakaʻosi e temipale Nāvuú kae lava ke silaʻi fakataha ai kinautolu. ʻI he taimi naʻe maau ai ʻa e temipalé, naʻe silaʻi ai ha ngaahi fāmili tokolahi. Naʻe aʻu ʻo silaʻi kinautolu ki he kau mēmipa ʻo e fāmilí kuo pekiá. Naʻa nau houngaʻia ʻi he tāpuaki ko ʻení!

Kau Māʻoniʻoní, 1:579–80