Ko e Feʻiloaki ʻa Niueli mo ʻAna Uitenī mo e Palōfita ko Siosefá

Naʻe ʻi ai ha falekoloa ʻa ʻAna mo Niueli Uitenī ʻi Ketilani, ʻOhaiō. Naʻe ʻikai tupu hake ʻa ʻAna ʻo ʻalu ki ha lotu pe ako fekauʻaki mo e ʻEikí, ka naʻá ne fie ʻilo kiate Ia. Hili ʻene mali mo Niuelí, naʻe tā tuʻo lahi ʻena lotu ʻo kole ki he ʻEikí ke tataki kinaua.

Kau Māʻoniʻoní, 1:121–22

ʻI ha pō ʻe taha lolotonga ʻena lotú, naʻe mamata ʻa ʻAna mo Niueli ki ha meʻa-hā-mai. ʻI he mata meʻa-hā-maí, naʻe tuʻu ha konga ʻao ʻi hona funga falé. Naʻe fakafonu kinaua ʻe he Laumālie ʻo e ʻOtuá. Naʻe ʻātakaiʻi kinaua ʻe he konga ʻaó. Naʻá na fanongo leva ki ha leʻo mei he langí. Naʻá ne tala kiate kinaua, “Teuteu ke maʻu ʻa e folofola ʻa e ʻEikí, he ʻoku haʻu ia.”

Kau Māʻoniʻoní, 1:121

Hili ha kiʻi taimi siʻi, naʻe haʻu ʻa Paʻale Pālati ki Ketilani. Naʻá ne akoʻi mo hono ngaahi hoá ʻa e ongoongolelei ʻo Sīsū Kalaisí. ʻI he fanongo pē ʻa ʻAna ki he meʻa naʻá na akoʻí, naʻá ne ʻiloʻi naʻe moʻoni ia. Naʻá ne foki ki ʻapi ke vahevahe ʻa e ongoongó mo Niueli. Naʻe ʻikai fuoloa kuo papitaiso kinaua.

Kau Māʻoniʻoní, 1:121–22

Hili ha māhina ʻe ua mei ai, naʻe haʻu ha tangata mo ha fefine ki he falekoloa ʻo Niuelí. Naʻe ʻikai ke ʻiloʻi kinaua ʻe Niueli, ka naʻe lulululu ʻa e tangatá mo Niueli ʻo ne ui ʻa Niueli ʻaki hono hingoá. Naʻe talaange ʻe he tangatá, “Ko Siosefa au ko e palōfitá.” Naʻá ne fakamatalaʻi ange naʻe tali ʻe he ʻEikí ʻa e ngaahi lotu ʻa Niuelí. Kuó Ne fekauʻi mai ʻa ʻEma mo Siosefa ke fetaulaki mo ʻAna mo Niueli.

Kau Māʻoniʻoní, 1:123

Naʻe ʻiloʻi ʻe Niueli mo ʻAna naʻe hoko ʻo moʻoni ʻena vīsoné. Naʻá na kole kia Siosefa mo ʻEma ke nau nofo mo kinaua ʻi honau ʻapí. Naʻe ʻofa ʻa ʻAna mo Niueli ʻia Sīsū mo ʻEne ongoongoleleí. Naʻá na foaki ʻa e meʻa kotoa pē naʻá na maʻú ki he Kāingalotú pea ki he Siasi ʻo e Fakamoʻuí.

Tokāteline mo e Ngaahi Fuakava 38:23–27, 34–42; Kau Māʻoniʻoní, 1:124