Na Parofita ni Kalou

Kivei kemuni na itabagone, sa dua dina na soqoni ni koniferedi vakasakiti eda tiko kina qo! Eda sa rogoca oti oqo e tolu na Apositolo bula i Jisu Karisito. Sa dua na veivakalougatataki vakasakiti! Se vo tale tiko e dua meda rogoci, Elder Henry B. Eyring. Sa tomani tiko na kana magiti vakayalo!

Noqu vosa ena yabaki sa oti, eda vulica na kena sotavi tiko na ibolebole ni vuravura oqo mai na veika a lakocuruma o Tevita nona bolei Koliaci. Ni nanuma tiko na lima na vatu? Nikua au na via wasea e dua na italanoa mai na Veiyalayalati Makawa au a wilika noqu se dua na itabagone, ka vakavuna meu via daunivakamacala. E sega ni cavuta na iVolatabu na yacana, o koya tou na vakatokai koya kina me na marama ni Shunem baleta oya na yaca ni nona vanua.

Dua na siga, na parofita o Ilaisa lako voli siviti Shunem, ka da wilika ni a qai tiko voli ekea “e dua na marama qaqa ka qai [sureti] koya me kana madrai. Sa qai yaco tiko, ni veigauna kece e pasi ekea, ena laki vakacegu me kana madrai.” Vakasamata mada na nona marau na parofita o Ilaisa ena nona sureti voli me laki kana ena vnona vale na marama oya. Vuqa nona gade voli kina, qai taroga na marama kivei watina,“Au siqema oqo na tamata vakatabui ni Kalou.”

Tukuna na marama, “Qo, au siqema.“ E rairai ni sureti Ilaisa ki na nona vale ni se sega ni kila ni okoya e dua na parofita; e ciqoma na nona ivakadinadina mai vua na Yalo Tabu ena nona vakarorogo vakamalua ki na veika e vakavulica o Ilaisa. (Nanuma, na gauna oya a sega ni dua na ka se tabaki! Okoya e dredre kina me dau kilai na rairai ni dua na parofita.)

E sega ni cava ekeri nai talanoa. Dua na siga, a tukuna e dua na marama vei watina, “Me daru tara mada e dua na loqi lailai, ena dela ni baivatu, ka kauta kina e dua na nonai mocemoce, ka dua na tepeli, ka dua na itikotikoka dua na itutu ni cina, ia ni sa lako mai vei kedaru me qai curu kina ko koya.”

Na marama yalodina oqo sa tu vakarau me tara e dua na loqi ki nona vale me rawa ni tiko kina na parofita ni lako voli ena vei vanua!

Nikua eda vulica e dua na lesoni bibi ni veika a lakocurumi oqo.

E vakadinadinataka na Turaga vua na marama mai Shunem nio Ilaisa e parofita ni Kalou, ka vakayacoka o koya ena nona dolava na nona katuba ni vale me ciqoma na parofita.

E rawa talega meda ciqoma noda ivakadinadina vakayadua ni parofita ni Kalou ena siga nikua ka tadolava na yaloda kei noda vakasama—noda itikotiko— kina ivakaro me baleti keda mai vua na Tamada Vakalomalagi ena ivakataotioti ni gauna.

Vei kemuni na itabagone, au sureti kemuni moni taroga na taro oqo: “E tiko li na noqu ivakadinadina ni nona parofita bula na Kalou?“

Meda tekivu mada ena kena itekivu.

Na cava na parofita? Na parofita e dua e sa lesia na Kalou me vosa ena vukuna. Era bula tiko e vuravura na parofita nikua, me vaka ga era a bula ena gauna eliu.

Na Parofita era daurairai, ka dauvakatakila. Kena ibalebale era rawa ni raica eso na ka e sega ni da raica rawa ka rawa talega nira parofisaitaka na veika ena rawa ni yaco e muri. Era rawa ni vakarautaki keda me da sotava na dredre. Era ciqoma talega na Parofita na ivakaro kei na ivakatakila mai vua na Turaga. Na ika ciwa ni yavu ni vakabauta e cavuta talega ni da bula tiko ena ivakataotioti ni gauna ni tomani tiko ni vakatakila. E tukuna, “Keimami vakabauta na veika sa vakatakila oti na Kalou, na veika sa vakatakilai mai ena gauna oqo, ka keimami vakabauta ni na levu tale na veika cecere ka bibi ena qai vakatakilai mai me baleta tiko ga na Matanitu ni Kalou.”

Tukuna o Elder Gary E. Stevenson, “E tomana tikoga na Turaga na Nona vakatakila na Nona ivakaro kei na lewa vei ira na Nona parofita e dai baleta ni gadreva o Koya me kauti keda ki na marau ena bula oqo kei na lagilagi vakasilesitieli ena bula ka tarava.”

Era vakatetea talega na parofita na kosipeli ka ra qasenivuli veivakauqeti ni nona vosa na Kalou kivei keda kece e vuravura.

O iratou yadua na lewe ni Mataveiliutaki taumada kei na Kuoramu Le Tinikarua eratou parofita, daurairai, ka dauvakatakilai. Era veiqaravi ena matabose e dusimaka tiko na Turaga, ka tiko vei ira na kaukauwa me ra cauraka ka vakadewataka na lalawa sa virikotori me baleta na Nona Lotu. Era masulaka vakamatailalai ka qai cakacaka kina, baleta na vakatulewa ni kuoramu oqo e dodonu mera yalovata kece kina. Na sala oqo, e vakadeitaki keda kina na Turaga ni na yaco na Nona lewa.

Era parofisaitaki Karisito na Parofita—Nona bula, Nona Veiqaravi, kei na Nona iTutu vaKalou.

Da wiika mada eso na ivakadinadina ni parofita mai na Vola i Momani.

Vosa tiko o Apinatai:

“Na lako sobu mai na Kalou vei ira na luve ni tamata, ka na mai sereki ira na nona tamata.

“Ia me vaka ni sa mai bula vakatamata sa vakatokai kina me Luve ni Kalou“

Vakadinadinataka o Samuela na Lemanaiti ni “ko Jisu Karisito, na Luve ni Kalou, na Tama ni lomalagi kei na vuravura, na Dauniveibuli ni veika kecega mai na ivakatekivu.”

Tukuna na parofita o Moronai, “Niu a sa raici Jisu, ka keirau a veivosaki e matana votu.”

Nona sikovi ira na Nifaiti na Karistio, matai ni ka a cakava ni kacivi iratou na Tinikarua na Apositolo. Tukuna o Koya vei ira na tamata, “Kalougata kevaka ko ni na muria na nodratou vosa na tinikarua kau sa digitaka.”

Au via wasea e vica na ka vei kemuni na itubutubu se o kemuni na dauniveisusu. E vakavulici Atama kei Ivi na Turaga na dina ni yavu ni veivakabulai. Tukuna o Koya vei rau, “O koya au sa solia kina vei kemudou e dua na ivakaro, mo dou vakatavulica raraba yani na veika oqo vei ira na nomudou kawa.”

Cava na kena ibalebale meda veivakavulici ena galala? Na noda vulica na dina ni kosipeli, taukena e dua na ivakadinadina bula me baleti ira ka veiwasei taki ni kilaka oya kei ira na luveda. Oqo ena vakabibitaka na vakavuvuli ena gauna se ituvaki cava ga. Na noda bulataka tiko na noda kilaka kei na noda ivakadinadina.

E vakamacalataka na iVola i Momani e 2,060 na gonetagane sotia era “tamata dina ka yalomatua, ni ra sa vakavulici mera muria tikoga na ivakaro ni Kalou ka lako vakadodonu e matana.” O ira na gonetagane yadina oqo era muria na vosa i Ilamani, na nodra iliuliu ni mataivalu ka nodra parofita talega, era liaca ni a vakasinaiti e yalodra na vakabauta kei na itukutuku dina na tinadra.

Kemuni na itubutubu, na vuravura e levu kina na duidui domo ka eso na gauna e levu sara na butobuto, na Kalou esa vakaroti keda me da susugi ira na gone ena rarama kei na dina. E niutaki keda o Koya ena itavi bibi ni nodra tuberi na gone na dina ni kosipeli koya e veivakabulai. Kevaka eda sega ni vakayacora, ena sega ni vakayacora talega o vuravura.

Kemuni na noqu itokani, edua na noqu veisureti vei kemuni: Ena vica na siga mai qo, au sureti iko mo tekiduru, dolava na yalomu ka masu ena vakabauta vua na Tamada Vakalomalagi. Kerei Koya me vakadeitaka e yalomu me vakadeitaka e yalomu o Koya e sa digitaka o Koya me parofita e gusuna tiko na Kalou e vuravura nikua.

Vakavulica na marama mai Shunem ni rawa me da vakadinadinataka na veika oqo mai Vua na Yalo Tabu. Au yalataka ni gauna eda kila nio ira oqo na ilumuti ni Kalou, ena vakamamadataki na icolacola ni noda bula se mani vakacava na ibolebole, nida muria ka nuitaka na nodra vosa ena vakabauta. Nida vakarorogo ka vakamuria na domo ni parofita e bibi ena noda sasaga ena noda tautauri matua ena veika Vinaka kece yacova na iKarua ni Lesumai ni iVakabula.

Sa tubu tikoga na valavalaca i Vuravura, ia na Lotu I Jisu Karisito kei na Nona matanitu e qai tubu ga na kena kaukauwa. Ko Saioni e na tokara ga na nona isulu totoka, ka na sega ni kasura na matanitu nei Karisito. E nuitaka na Turaga vei keda me vakaqaqaco na noda vakadinadina, sinai ena vakabauta ka veivutuni e veisiga. Nuitaki keda tiko ena veisiga na noda iVakabula o Jisu Karisito me da veivuketaka na Nona cakacaka.

Tukuna na Parofita Josefa Simici, “Kemudou na veitacini, e dodonu beka meda kua ni lako ena inaki vinaka?“ Ia, me vaka ni vosa oqo e vakatabakidua vei kemuni, na itabagone, au via vakayagataka na vosa itabagone Sega ni taciqu. Vakarau?

“Oi kemudou na wekaqu, meda kakua beka ni tomana tiko na inaki cecere vakaoqo? Me toso ki liu ka kakua ni suka ki muri. Na yaloqaqa, kemudou na wekaqu; ka toso tikoga ki liu, kina qaqa! Me reki na lomamudou, ka marau vakalevu sara”

Au vakavinavinakataka na veidusimaki kei na veisasaga vakasakiti ni parofita bula. Au wasea na noqu ivakadinadina tabu, ni era kacivi mai vua na Kalou mera cuqena, tauyavutaka, ka liutaka na Nona mataniku e vuravura nikua. Ena marautaki sara. Na Turaga duadua ga ena digia na Nona iTalai. Ena yacai Jisu Karisito, emeni.