Na iSoro ni Loloma nei Jisu Karisito

Kevaka osa valavala ca bibi ka osa vevutuni tiko se tiko na gagadre mo veivutuni vakaidina ka vakila na reki sega ni tukuni rawa ni veivosoti, yalovinaka kila ni waraki iko tiko na cakamana oqo. E tomana tiko na iVakabula na kaci, “Dou lako mai vei au.”

Na vaqaqacotaka na nomu vakabauta na iVakabula, o Jisu Karisito, ena yavalata na gagadre ni yalomu mo kilai Koya, vakabauti Koya, ka solia na lomamu vei Koya. E taroga o Inosi me baleta na nona vosoti, “Turaga, sa caka rawa vakacava?” E sauma na Turaga, “Ena vuku ni nomu vakabauti Karisito, o koya ko sa sega mada ni bau rogoca se raica.”

Ka vakuria o Moronai, “Kevaka dou sa vakuwai kemudou mai na veika kecega sa sega ni vakalou, ka lomana na Kalou ena nomudou igu, vakasama, kei na nomudou kaukauwa kecega, sa na qai rauti kemudou na nona loloma soli wale.”

Na vukitani mai na ivalavala ca, ka mua vua na Kalou, ka vakaukauwataki na nomu vakabauti Jisu Karisito sa dua na itekitekivu vinaka. Nomu vakayalomalumalumutaki iko vua na Kalou e okati kina me tusanaki na ivalavala ca bibi vua na nomu bisopi se peresitedi ni tabana, ia na taucoko ni veivosoti ena lako mai vua na iVakabula. Na veivosoti e isolisoli vakalou ka soli ena loloma soliwale i Jisu Karisito.

Na gagadre dina ni lesu vua na Kalou e sala vata kei na nuidei mo dinata na Tamada Vakalomalagi, o iko, kei ira era sa mavoa, kei ira na nomu iliuliu ni matabete. Na Kalou e marautaka na gagadre ni lomamu na nomu lesu tale Vua ena yalo raramusumusu kei na yalo e bibivoro. Nio yalo bibivoro o biuti iko ena yalomalumalumu e liga ni Turaga; na yalo raramusumusu me vaka e vakamacalataka na Apositolo Paula e kauta mai na “rarawa sa vaka na loma ni kalou,” na gagadre dina ni yalo ni via lesu tale Vua ena isau cava ga.

Nomu gagadre e muataki iko mo vinakata mo vakavinakataka na veika o sa voroka. Ia, eso na ka o sega ni tiko vei iko na kaukauwa mo vakavinakataka, o masulaka vagumatua na Turaga, e na Nona loloma soliwale, me vukei ira era vakaleqai ena vuku ni nomu ivalavala.

Na revurevu ni ivalavala ca vei ira na tani e dau mosimosi ka dredre me uabaleti. O sa vakamuria tiko beka na nodratou ivakaraitaki ni luvei Mosaia, eratou “segata vagumatua sara me ratou vakavinakataka na veileqa era sa vakayacora” Vosa vei ira o rokova me baleta na veika o na sega beka ni raica rawa.

Niu vakarautaka tiko na vosa oqo, au ciqoma e dua na imeli mai vei dua e cakacakataka tiko na nona veivutuni ka gadreva me lesu tale mai ki na Lotu. Na watina e liu se rarawa tiko ga ena ka e yaco na “[nodrau] vakamau tawamudu, [dredre baleti ira na gone], leqa vakailavo, ka sega ni [rawa] ni sauma na bula e veisiga, [kei na] yalobibi ni a cakitaki.”

E wasea okoya vei au na sala na nona iliuliu ni matabete “e vakauqeti me [kerei koya] me vakasamataka ena masu se cavatale [e rawa ni cakava vei watina eliu kei ira na luvedrau].” Ena nona veivakadonui au na wasea na tiki ni nona imeli.

“Matai, au nanuma na [ilavo] au solia ena gauna ni veisere ni veirautai vinaka, ia na noqu peresitedi ni tabana e vakauqeti au meu lolovaka ka masulaka. …

“Taumada, e dredre vei au meu vakasamataka meu vakuria na veivakataucokotaki. Dina ni noqu ivalavala ca e sega ni vakailavo, au vakasamataka na cava na ibalebale dina ni veivakataucokotaki … [ia] Au sa qai mai kila ni sega ni baleta ga na ilavo.

“Ira na noqu iliuliu ni matabete e sotavi [watiqu eliu] kei iratou na gone ka kila ni ratou se sasaga tikoga ka se bera ni vakabulai.

“Mai noqu lalawa tarava meu toso i liu ena vakabauta. Au vakaraitaka noqu gagadre meu veivuke ka sega ni lavaka e dua na ka. Au lewa meu [vakauta vei watiqu eliu edua na wase ni ilavo] ni vei saumi, ka e dua na tikina levu ni kequ isau. Ni sebera niu sauma na imatai ni sausaumi, na Turaga e [uqeta na noqu vakasama ni gadrevi] meu sauma [me vakaruataka na iwase ni ilavo].

“Au vulica ni veivakataucokotaki e sega ga ni baleta na ilavo. E baleta na noqu vakatabuya ena yalomalua na noqu bula vua na Turaga. Na ilavo me vukea na kena sosomitaki na veika au taura mai vei iratou na noqu matavuvale ena vuku ni noqu digidigi cala. E baleta na kena caka ka maroroi na iyalayala ka sega ni lavaka e dua na ka kei na nona vukei me kakua ni leqataka na bili ka sa rawa vei koya me vakasaqara na Yalotabu.”

Na nomu sasaga mo vakataucokotaka na veika o voroka e sega beka ni baleta na ilavo, ia ni ko masuta na Turaga ena yalomalua, ona kunea ni levu tale na veika o rawa ni cakava.

Nio vakasaqara na veivosoti ni Turaga, mo vosota ena nomu waraka na Nona veivakadonui taucoko. Vakasamataka mada na ivolanikalou oqo.

“Era vakayalomalumalutaki ira ena yalomalumalumu titobu sara; ka tagi vagumatua sara vua na nodra Kalou; io, ena siga taucoko. [Ia] a sa berabera ni rogoca na Turaga na nodra tagi ena vuku ni nodra caka ca.”

“Ia sa qai rogoca na Turaga na nodra tagi ka vakamamadataka na nodra icolacola; ka … yaco ni sa tekivu mera sautu tale tiko mai vakamalua.”

Mo dauvosota me vaka e solia vakamalua vei iko na Turaga na Nona veivakalougatataki kei na veivakadonui.

Ena gauna ni Turaga, ona vakila na Domona ni tukuna vei iko, “Me kakua tale ni vakaleqa tiko na lomamu na veika oqo.” Dua na siga, ena nomu tomana na nomu vuki vua na iVakabula, na Tamamu Vakalomalagi ena “bokoca tani mai [yalomu] na nomu cala, ena vuku ni nona vinaka na Luvena.”

Vei iko ko sa vakaleqai ena ivalavala ca ni dua tale, au gadreva meu wasea na loloma kei na yalololoma ni iVakabula, Nona veitaqomaki kei na vakacegu.

Na rarawa o vakila, na mosi ni yalo, na veika sa yali, na yalo ni veiveretaki, na veisau e yaco ena nomu bula—au solia vei iko na noqu veivakadeitaki, na iVakabula e kilai iko ka lomani iko. Dodoliga yani vei Koya. O Koya na nomu vakacegu kei na kaukauwa; ena tala mai o Koya na Nona agilosi me tuberi iko cake. Na gauna cava ena yali na rarawa, na yalobibi, na vakanananu sega ni vinakati me guilecavi? Au sega ni kila. Ia au kila qo: E tu vei Koya na kaukauwa me sosomitaka na nomu leqa ka kauta mai na sala vakaiukuuku me isosomi ni dravusa ni nomu rarawa.

Kemuni na taciqu kei na ganequ mai Grand Blanc, Michigan, ena nodra vakabauta tawayavalati vei Jisu Karisito, ena nodra yalodei kei na veinanumi, era ciqoma ka ena, lomani nimacawa kei na vula sa tu mai liu, era na ciqoma vakalevu na nona loloma kei na loloma cecere ni iVakabula.

Ena nomu tomana tiko na nomu nuitaki Koya, na nomu o ni butobuto kei na nomu tagi ni rarawa e veibogi ena veisautaki ki na savu ni wainimata ni reki kei na vakacegu ni rarama ni mataka. “Noda rarawa ni lomamudou ena vuki me reki. Ena qai reki na lomamudou, a sa sega e dua ena kovea na nomudou marau.” Ena lako mai na gauna oya. Au vakadinadinataka ni na lako mai.

Na isoro ni loloma ni Jisu Karisito e rawa ni kunei ena ituvaki dredre sara, ia eda gadreva keca e veigauna na isoro ni loloma soliwali ni noda iVakabula. E vakavulica o Peresitedi Oaks: “Baleta na veika e sotava na veisorovaki ni bula oqo, sa rawa kina vua na noda iVakabula me vakaceguya, vakabula, ka vaqaqacotaka na tagane kei na yalewa ena veivanua kecega, ia au vakabauta ni na vakayacora ga vakakina vei ira era vakasaqarai Koya ka kerea na Nona veivuke. E vakavuvulitaka na iApositolo o Jemesa: ‘Dou vakamalumalumutaki kemudou ena mata ni Turaga, ka na laveti kemudou cake ko koya’ (Jemesa 4:10). Eda na vakadonui ki na veivakalougatataki oya ni da vakabauti Koya ka masuta na Nona veivuke.”

Au ciqoma na veivakadonui mai vua na noqu itokani lomani ka dua na iVakaitutu Raraba vakacegu, o Elder Robert E. Wells, ka sa yabaki 97, meu wasea na veika e sotava ena 60 na yabaki sa oti.

Ni bula voli mai Paraguay ena 1960 ka cakacaka tiko vaka daunibaqe ni vei matanitu, o Robert Wells, sa qai yabaki 32, kei na watina, o Meryl, ka rau pailate ni rua na waqavuka, ka vuka tiko ivale mai Uruguay ki Paraguay Ni sotava na o vavaku, rau sega ni veirai ka veitaratara rawa o Robert kei Meryl. Mai ro vakatotolo o Robert, ka kila ni voca na waqavuka nei watina. Eratou sega ni bula o watina kei rau na nona itokani. Na luvena, e tiko mai vale e Asunción, eratou yabaki vitu, lima kei na rua.

E tukuna o Elder Wells ena nona yalobibi:

“Na vosa e sega ni rawa ni vakaraitaka na mosi ni yaloqu, e curuma na noqu rarawa ka vakanunutaka na veika kece baleti au. Na wainimata ni rarawa e sega ni rawa ni tarovi. Me qai vakavuna me ca sara, na noqu vakasama e tovolea tiko me sotava na kavoro niu kila ni sa yali na watiqu, au vakila e dua na yalo luvuci ena noqu nanuma ni bale vei au na vakacalaka.”

E beitaki koya o Robert ni sega ni vakadikeva vakavinaka na waqavuka ka sega ni vakavulici watina vakavinaka ena idusidusi ni igacagaca ni vuka. E bilitaki koya vakaikoya ni a vakawelewele.

A kaya o Robert:

“Mai vagolei na noqu vakasama kina dua na ituvaki butobuto. Au mai bula voli—[me baleti iratou na luvequ] ka sega tale ni dua na vuna.”

“Sega vei au na gagadre meu tomana tale.”

Dua na gauna, e sotava o Robert e dua na veivakalougatataki bibi vakayalo. A nanuma lesu o koya:

“Dua na bogi, ni oti e dua na yabaki, au tekiduru ena masu, e yaco e dua na cakamana.” Niu vakamasuta tiko ka kerea na Tamaqu Vakalomalagi, au vakila ni lako mai yasaqu na iVakabula au rogoca e dua na domo vosataka tiko na vosa oqo kina lomaqu kei na daligaqu: ‘Robert, na noqu veisorovaki e sa sauma na nomu ivalavala ca kei na nomu cala. E sa vosoti iko na watimu. E sa vosoti iko o iratou na nomu itokani. Au na laveta na nomu icolacola.’

“Mai na gauna oya, na icolacola ni cala [kei na taqaya] sa laveti tani mai vei au. Au sa vakabulai! Au sa qai kila vakasauri na kaukauwa ni Veisorovaki ni iVakabula … ka ni cakacaka saraga vei au. Au vakila na rarama kei na reki au se sega vakadua ni se bau vakila. E soli vei au e dua na isolisoli sega ni cakacakataki—na isolisoli ni Turaga ni loloma soliwale. Au sega ni namaka—au se sega ni cakava e dua na ka meu rawata kina, ia e solia ga vei au o Koya.”

Taciqu kei na ganequ, meda “vakatabui vei Karisito ena loloma soli wale ni Kalou ena kena dave na dra i Karisito [me yaco me] tabu, ka savasava sara.”

Au vadinadinataka na loloma, loloma veivueti, kei na loloma soliwale ni noda iVakabula kei na Dauveivueti. E bula tiko o Koya. Eda sa Nona; eda sa gone ni veiyalayalati. Nida vakabauti Koya, muri Koya, ka nuitaki Koya, ena laveti keda mai na noda rarawa kei na noda ivalavala ca. Ka, ni sivi na bula oqo, ena Nona vale nei Tamada, eda na bula vata kei Koya me tawamudu ka tawamudu Ena yacai Jisu Karisito, emeni.