Lako ka Kitaka Vakakina
Au gadreva meu vakacaucautaki ira na daukaulotu era kacivi mera mai veiqaravi. Era sa ivakaraitaki vei keda.
Ena nona lako voli na iVakabula e Peciseita, eso era kauta mai Vua e dua na tamata mataboko. Era nuitaka mera raica e matadra e dua na cakamana. A taura na iVakabula “na liga ni mataboko, ka tubera kina bili ni koro” me vakabulai koya vakatikitiki. Taumada, a vaka me sega soti ni mana na veivakabulai. “A sa rai cake, [ko koya] ka kaya, au sa raica na tamata era vaka na kau, sa lako voli.” Ni sa yalololoma o Jisu “sa tabaka tale na matana [na mataboko] ka kaya me rai cake.” Ena ikuri ni veitabaki ni ligana na iVakabula, sa qai “rai vakavinaka.” na tamata mataboko.
Oqo na ivakaraitaki ni nona bula vakaivakarau na iVakabula ena kena tomani tiko ga kei na cakacaka ni veiqaravi ena yalomalua. E vakavotuya vei keda nio Koya “sa sega ni lako mai me qaravi, ka me dauveiqaravi ga” ka sureti keda meda muria na Nona ivakaraitaki ena noda lakova tale na ikarua ni maile, ka soli ka vei ira sa kerekere vei keda, ka lomani ira na kai noda. A qai tarogi, “Ko cei na kai noqu?” A wasea na Karisito na vosa vakatauvata ni kai Samaria dauloloma ena ilesilesi me “Lako, ka kitaka vakakina.”
Na daukaulotu ni Lotu i Jisu Karisito ni Yalododonu Edaidai era ivakaraitaki ni kai Samaria dauloloma ni gauna oqo ka sureti keda na Karisito meda ucua. Au gadreva meu vakacaucautaki ira na daukaulotu era sa kacivi mera veiqaravi. Era ivakaraitaki vei keda ni veiqaravi (1) e dolava na yalo kina kosipeli i Jisu Karisito, (2) vakatara vei keda kece meda veiqaravi se cava ga na keda ituvaki, ka (3) kauta mai na kaukauwa i Karisito kina noda bula.
iMatai, na veiqaravi e dolava na yalo kina kosipeli i Jisu Karisito.
Rauta na 91 BC, a vakatakilai koya o Amoni vei Tui Lamonai ka kaya, “Au via tiko vata mada kei ira na tamata oqo me dua na gauna; [ka] meu nomuni tamata ga.” Ena vuku ni nona veiqaravi cecere vua na tui, a soli vei Amoni e dua na gauna me “vosa vakayaloqaqa, ka kaya [vei Tui Lamonai] na kaukauwa cava” sa cakava kina na nona veiqaravi. Me dolea, e yalataka kina na Tui “na ka kecega sa gadreva [o Amoni] [na Tui ena] solia.” A qai kerea walega o Amoni me rogoca na Tui na nona itukutuku ni kosipeli i Jisu Karisito. Na veiqaravi nei Amoni a yaco kina me “udolu na yalo era sa [kau mai] ki na veivutuni.”
Nikua, na veiqaravi e muataki ira na tani ki na kosipeli. A veiqaravi taumada o Sister Bevan vaka qasenivuli daukaulotu a qai tauvimate, ka gadrevi me lesu ivale me laki qaravi vakavuniwai. A sega ni vakacegui, e tomana tikoga me daukaulotu veiqaravi mai vale.
Nirau gade voli, a vakauqeti o Sister Bevan kei nona itokani me rau vosa vua e dua na tina kei na va na luvena, erau vakatitiqa ka ratou sa mani lako talega na matavuvale oya. Ena siga e tarava, rau a lesu tale kina vanua oya, ka masu me ratou na tiko kina na matavuvale oya. E veivakurabuitaki, a dabe toka o tinadratou ena vanua vata ga ena siga nanoa. Ena gauna oqo rau gole yani o Sister Bevan kei nona itokani vei tinani gone, ratou veikilai, ka kila sara ni gadreva sara tu ga o tina me vukei ena nona leqa. Rau a qai vukei koya ka sureti koya me vulica na veika baleta na kosipeli.
Ena vuku ga ni veiqaravi oya kei na veisureti a tarava, rau a papitaiso o tina kei luvena ulumatua, ka tarava sara o qase e tarava ni oti e dua na yabaki. Nikua ratou se kaukauwa tikoga ena lotu. E kila o Sister Bevan ni ka oqo e veivakauqeti vakalou, ka “vakadeitaki ki [vua] ni tiko o [koya] ena vanua donu sa gadreva [vua] na Kalou me tiko kina.”
Me vakataki Amoni ga kei Sister Bevan, nida qaravi ira eso, eda sa “ivakaraitaki vinaka vei ira” era gadreva mera kila na “vu ni nuinui sa tu e [lomada].”
E sureti keda o Jisu meda “lako, ka kitaka vakakina.”
iKarua, na veiqaravi ena vakatara meda veiqaravi se cava ga na keda ituvaki.
Sa kaci kina o Peresitedi Russell M. Nelson “vei ira yadua na cauravou sa kilikili, ka rawa mera vakarau ka laki kaulotu” kei ira yadua na goneyalewa gugumatua mera “masulaka ke sa vinakata na Turaga [vua] me laki kaulotu.” E yalataka o Peresitedi Nelson ni “nomu sa lewa mo laki kaulotu, mo laki vunautaka se daukaulotu veiqaravi, o na kune kalougata kina kei ira e vuqa na tamata.” Na daukaulotu veiqaravi sa veisautaka na ibalebale ni vosa rawa. Nikua sa rawa vei ira na cauravou kei na goneyalewa kilikili era gadreva mera laki kaulotu tudei yani ena vuku ni Turaga, ka vica ga na kena vakatatabu.
Elder Holgado edua na kena ivakaraitaki ni rawa vua me laki kaulotu se cava ga na kena ituvaki. A sucu vata mai o koya kei na dua na mate duatani sara e sega kina ni rawa vua me daukaulotu veivakavulici. A qai kacivi o Elder Holgado me daukaulotu veiqaravi ka volodia ena ilololo nei bisopi, ka vukei ira kina e drau na tamata mera vukei ena veika era gadreva. A vakatawana na vatavata, tawana na kakana draudrau, ka serelaka na kateni.
Ni vosa o Elder Holgado ena soqoni ni sakaramede ni oti nona kaulotu, a wasea ni “Kalou e gadrevi ira na daukaulotu veiqaravi. E gadrevi ira na tamata mera veilomani ka qaravi ira na tamata. O ira oqo era tuva na pepa ni valelailai, tawa borokoli, mataitaki ni iyaya, ka dauvinaka vei ira na tamata.”
E sega ni gadrevi mo lesi kina dua na veiqaravi se dara e dua na itokaniyaca mo caka vinaka. Na cakacaka kece ni veiqaravi e raica na iVakabula. Eda rawa ni vukei ira eso mera lako mai vei Karisito ena noda veiqaravi ena yalololoma me vaka e cakava o Koya. Eda rawa ni veiqaravi taucoko ena yaca i Karisito vua e dua ena kaukauwa ni Yalo Tabu ka bula voli ena ivakaraitaki ni vakabauti Jisu Karisito. Na veiqaravi e vakatara meda ivakaraitaki nida isoro bula e ciqoma na Kalou.
E sureti keda o Jisu meda “lako, ka kitaka vakakina.”
iKatolu, na veiqaravi e kauta mai na kaukauwa i Karisito ki na noda bula.
E dua na daukaulotu gone a lesi mai na ilesilesi ni veivakavulici kina ilesilesi ni veiqaravi e Utah ni sotava eso na bolebole e gadrevi kina na kaukauwa ni veivakabulai i Karisito. Na veiqaravi solibula a kauta na kaukauwa oya kina nona bula. A kaya, “au vakila niu sasaga bula tiko, au vakila ni laveti au cake tiko na Karisito. E talei kina na veika baleti Koya nida raica ni vakalougatataki ira na tamata mai na ilololo ni kakana, ena valetabu, kei na Nona kosipeli.”
Sa tekivu me vakila o daukaulotu oqo na reki, kei na nona bula ni vakalougatataki koya kei na nona matavuvale. E curuma vakayauyau yani na nodratou vale na Yalotabu, ratou curu vakawasoma kina valetabu, ka ratou vakanamata vakalevu vakavuvale vei Karisito. E vakabauta o daukaulotu oqo ni o Karisito a vakabulai koya ka vakalougatataka na nona matavuvale ena veiqaravi.
A vakavulica o Peresitedi Nelson, “Na lomasoli mo veiqaravi ka vaqaqacotaki ira eso sa yavudei ivakatakilakila ni sa vakarau tu e dua me vakabulai” ena kaukauwa ni veivueti ni iVakabula.
E sureti keda o Jisu meda “lako, ka kitaka vakakina.”
O ira na daukaulotu veiqaravi era sa ivakaraitaki ni tisaipeli solibula i Jisu Karisito.
Ni sa vakalougatataki o iko se dua na nomu lewe ni matavuvale ena veikacivi ni daukaulotu veiqaravi, oqori na gauna ni marau. Ena tiko ena nomu matavuvale ena gauna oqo e dua sa tabaki me matataka na Turaga o Jisu Karisito. Oqo ena veisautaki kemudou kece mo dou vinaka. E sega ni dodonui me leqataki na veikacivi ni veiqaravi. Eda lagata, “Au lako ke ko ni lewa” ka “Meu dina tu vei kemuni.” Oqo e dua na madigi talei meda vakaraitaka nida dinata na ka eda tukuna!
Kivei kemuni kece sa veiqaravi, vakabibi vei kemuni na 4,000 vakacaca na daukaulotu veiqaravi, keimami lomani kemuni. Kevaka o kemuni na daukaulotu sa lesi mo ni veivakavulici sa gusu ni Turaga, o kemuni, na daukaulotu veiqaravi, ko ni sa liga ni Turaga, o ni sega ni ikarua ni daukaulotu. Oi kemuni yadua sa ka bibi ena kena sokumuni o Isireli. E vakavulica o Peresitedi Nelson ni “gauna yadua eda cakava kina na ka e vukea e dua me cakava ka maroroya na nodra veiyalayalati kei na Kalou, eda sa vukea tiko me sokumuni o Isireli.”
O kemuni na daukaulotu dauveiqaravi oni sa sokumuni Isireli tiko ena veisiga ena vuqa na sala, kei na nomu veiqaravi e veisautaka na bula. E vakavuqa o sega tu ni kila o cei ena kune vinaka ena nomu veiqaravi, ia e kila ga na Kalou. Me nanumi tiko “ni kemuni a [qarava] e dua sa lailai vei ira oqo, ni sa [qaravi Koya].” Keimami rogoca na domomuni nio volodia ena vale ni veiqaravi ni Lotu; keimami raica nomuni matadredredre nio veivuke ena isoqosoqo ni itikotiko raraba; ka vakila na nomuni rarama nio veiqaravi e valetabu e vuravura raraba. Oni sa vakani ira sa viakana, vakaisulutaki ira sa luvawale, ka vagunuvi ira sa karamaca.
E gadrevi taucoko meda lako ka kitaka vakakina.
Na Veiqaravi sa iVakarau ni Bula Dina Vakatisaipeli i Karisito.
Na veiqaravi sa tiko kina na kaukauwa me dolava na yalo ki na kosipeli ka vakatara vei keda kece meda solia na yaloda taucoko vei Karisito. E veisautaka na yaloda meda vakataki Koya cake, ni yaco oqo, eda laveti ira tiko eso. A kaya kina o Peresitedi Nelson, “Na vuravura oqo sa ravuti tu vakayalo, e rawa beka kina tamata yadua me vakavinakataka? E sauma o Koya, Ïo! ‘O ira na tamata veiyalayalati ni Turaga, vakaiyaragi ena kaukauwa ni Kalou ena lagilagi cecere’ e rawa nira laveta cake nodra bula na kawatamata kece.” Ena veiqaravi eda na veisautaka na yalo—vata kei vuravura.
Na Karisito e “lako voli ka daucaka vinaka.” Ea veiqaravi vei ira na tauvimate, vakavuna me rai na mataboko, ka sikovi ira na lolovira. A vakasaqa na kakana,v eivuke ena kakana ni vakamau, ka vakani ira e udolu na tamata era viakana. Nida veiqaravi ena yaca i Karisito vua e dua, eda na bula vakalou ka kilikili cake me noda na isolisoli ni bula tawamudu. O Jisu Karisito e bula. O Koya na noqu iVakabula e nomu talega. O Koya na noda Dauveivueti. Sai Koya na noda ivakaraitaki cecere ni veiqaravi. Au sureti keda yadua meda lako ka kitaka vakakina. Ena yacai Jisu Karisito, emeni.