Vakadinadinataki ka Vaqaqacotaki vei Karisito

Kemuni na taciqu kei na ganequ, au vakila na loloma ni Kalou nida mai sotavata. Au rokova niu na vosa vei kemuni. Au masuta Yalotabu me kauta kina yalomu na ka e vinakata na Turaga moni rogoca, ka uasivita na veika au na tukuna.

Dua na gauna sa oti, au vinakata meu vulica na fisiki kei na fika niu se vuli torocake. Au vakadrukai. Sa tekivu meu vakila niu tovolea tiko meu vulica e dua na ka e uasiviti au. Na levu ga ni noqu vakadrukai, na lailai ni noqu vakila na igu meu tovolea tikoga. Na noqu yalolailai e vakavuna meu vakila ni voleka me sega ni yaga na noqu sasaga. Au nanuma meu sa tinia, meu cakava e dua na ka rawarawa.

Au vakila niu malumalumu. Niu masu, au vakila na veivakadeitaki ni Turaga. Au vakila ni vosa kina noqu vakasama, “Au svakatovolei iko, ia au tiko talega vata kei iko.”

Au sega ni kila na ibalebale taucoko ni vosa oya. Ia au kila na ka meu cakava—au tekivu cakava sara.

Ena noda vakasama vakatitobu ka cakacaka tiko ena veiyabaki e muri, sa yaco meu kila mai vakavinaka na itukutuku ni veivakauqeti oqo ena ivolanikalou: “Au sa rawata na ka kecega ena vuku i Karisito o koya sa vakaukauwataki au.”

Au vulica ni kena dredre vei au na fisiki e isolisoli mai vua na Turaga. E vakavulici au tiko o Koya ena Nona veivuke, e rawa meu cakava na veika e kena irairai me sega ni rawa kevaka e tu vei au na vakabauta ni tu o Koya me vukei au. Mai na isolisoli oqo, a cakacaka tiko na Turaga me vakatovolei au ka vaqaqacotaki au.

Na vosa vakadinadina e levu tu na kena ibalebale. Me vakadinadinataki e dua na ka e sega walega ni vakatovolei. Me vakalevutaki cake na kena kaukauwa. Me vakadinadinataki na tiki ni kaukamea me laveta e dua na ka bibi. E vakuri na katakata, bibi, kei na kaukauwa, me yacova ni sa votu mai na kena ituvaki kei na irairai dina. E sega ni vakamalumalumutaki na kaukamea ena kena vakatovolei. Ia, e yaco me dua na ka e rawa ni nuitaki, e kaukauwa vinaka me colata na icolacola lelevu.

E vakatovolei keda na Turaga me vakaukauwataki keda. Na veivakatovolei oqori e sega ni yaco mai ena veigauna rawarawa se vinaka. E yaco mai ena gauna eda vakila kina nida vakatovolei me sivia na vanua eda rawa ni yacova. E vakatavulica na Turaga meda tubu tikoga ka kua ni guce ena noda sasaga, meda kua ni soro, meda tovolea tikoga.

Nida vakabauti Jisu Karisito tikoga—ena gauna mada ga e sega ni rawa kina ena gauna oya—e yaco meda kaukauwa cake vakayalo. E vakadinadinataki na dina oqo na itukutuku tabu vakaivolanikalou.

Na parofita mada ga o Moronai, e vakatovolei ka vaqaqacotaki vakaoqori. A bula duadua voli ena iotioti ni nona veiyabaki. A vola ni sega na nona itokani, ni sa vakamatei o tamana, ka ra vakarusai na nona tamata. Era vakasasataki koya voli na tamata era vinakata me ra vakamatea.

Ia e sega ni guce o Moronai. Ia, e ceuta na nona ivakadinadina baleti Jisu Karisito ena peleti ena vukudra na tamata ena sega ni raica ni se bula tiko, okati kina o ira na nodra kawa na tamata era a gadreva me ra vakamatei koya. A volavola me baleti keda o Koya.” E kila ni so era na vakalialia na nona vosa. E kila ni so era na besetaki ira. Ia a volavola tikoga.

Ena nona vakatovolei, a vakasavasavataki ka vaqaqacotaki. Sa qai savasava vakalevu cake. E kauta na nona vosa na kaukauwa vei ira era vosota ena yalodina me yacova na vakataoitoti. E rawa nida vakila na mana oya nida wilika na nona ivakadinadina:

“Oqo koi au ko Moronai; au sa vola na veika e vinaka vei au; ka’u sa volavola kina vei ira na wekaqu na Leimanaiti; ka’u gadreva me ra kila ni sa oti yani e va na drau ruasagavulu na yabaki mai na gauna a vakaraitaki kina na ivakatakilakila ni nona lako mai na Karisito.

“Kau sa na tukuna mada vei kemudou na noqu vosa ni tatau kau na qai dregata na ivolatukutuku oqo.

“Raica au sa kaya vei kemudou, kevaka sa loma ni Kalou mo dou wilika na itukutuku oqo, dou na wilika ka kila kina na nona loloma na Turaga vei ira na luve ni tamata, me tekivu mai vei Atama ka yacova ni dou sa taura na itukutuku oqo, ia ni dou sa taura mo dou vakananuma sara e yalomudou.

“Ia ni dou sa ciqoma na veika oqo, au gadreva meu vakamasuti kemudou, mo dou kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko koya ena kaukauwa ni Yalo Tabu ni sa dina.

“Ia ena kaukauwa ni Yalo Tabu dou na kila kina na dina ni veika kecega.”

A vakasavasavataki na ivakdinadina nei Moronai ni tiko duadua voli, ia e serau na kena rarama me tuberi ira na veitabatamata kecega me ra vakasaqara na Tamada Vakalomalagi kei na iVakabula o Jisu Karisito.

E dua tale na parofita ni iVola i Momani, o Jekope, a vakatovolei ka vaqaqacotaki ni se gone ni sotava na veika rarawa kei na yaluma levu. Ia na tamana, Liai, e vakavulici koya ni na vakalougataki koya na Kalou ena nona vakatovolei.,

“Ka raica, nio se gone, ko a sota kaya na leqa kei na veika rarawa e vuqa, ena vuku ni nodratou itovo ca na tuakamu.

“Ia, Jekope, na imatai ni luvequ ka sucu ena lekutu, ko sa kila na cecere ni Kalou; ka na vakatabuya ko koya na nomu rarawa mo rawata kina na vinaka.

“O koya, ena vakalougatataki kina na yalomu, ia ko na bula sautu tiko kei na tuakamu, ko Nifai; ia, ko na qarava na nomu Kalou ena nomu veisiga taucoko. O koya, au kila kina ni ko sa vueti, ena vuku ni nona yalododonu na nomu Dauveivueti; nio sa raica ni na yaco vakaidina ni ena taucoko ni gauna ena lako mai kina ko Koya me kauta mai na veivakabulai vei ira na tamata.”.

A sotava na Parofita o Josefa Simici na veivakatovolei kei naveivaqaqacotaki vaqo ni tiko voli ena Valeniveivesu mai Lipati. Ena yaluma ni nona rarawa, e tagicaka yani na Parofita o Josefa:

“Oi kemuni na Kalou, ko ni sa tiko evei?

“A cava na kena dede oni na tarova tiko kina na ligamuni?”

A raica na Turaga ena loma ni nona vakararawataki o Josefa na revurevu veivakasavasavataki ni nona vosota voli mai ena Nona sauma:

“Ia na luvequ, me vakacegu na yalomu; raica sa lekaleka walega na gauna ni nomu rarawa kei na vutugu;

Ia, kevaka ko sa vosota rawa, ena vakacerecerei iko cake na Kalou; raica ko na vakamalumalumutaki ira kecega na nomu meca.”

Na ivakaraitaki cecere duadua ni vakadinadinataki ka vaqaqacotaki e yaco ena nona Veisorovaki na iVakabula. E taurivaka vakai Koya na ivalavala ca ni vuravura. A colata o Koya na noda mosi kei na yaluma. O Koya sa gunuva oti na bilo wiwi. A yalodina tiko ena veigauna kecega.

Ena vuku ni Nona Veisorovaki lagilagi, sa rawa vei Jisu Karisito me vaqaqacotaki keda ena noda gauna ni vakatovolei. E kila o Koya na ivakarau me maroroi keda baleya nisa sotava otinabolebole kece eda na sotava ena bula oqo. “Ena colata na mosi kei na nodra tauvimate na nona tamata me rawa ni kila kina ena veika ni bula vakayago na ivakarau me maroroi ira kina na nona tamata me vaka na nodra malumalumu.”

Eda vulica ni tiko voli ena Were o Kecisemani, a taroga na Tamana na iVakabula ke rawa ni lako siviti Koya na veivakatovolei—ia a qai kaya talega o Koya kevaka oya na lomai Tamana, ena vakayacora ga na iVakabula. Ena dua tale na kena vosa, e yaco mevakatitiqa ka veilecayaki na iVakabula, ia e vakabauta tikoga na Tamada Vakalomalagi.

Taciqu kei na ganequ, na nomu vakatovolei kei na vaqaqacotaki ena sega ni vaka na nei Moronai, se Jekope se na Parofita o Josefa Simici. Ia ena yaco mai. Ena rawa ni yaco vakamalua mai, ena vakatovolei ni bula vakamatavuvale. E rawa ni yaco mai ena tauvimate se na veika vakatubu rarawa, se ena yaluma se na galili.

Au vakadinadinataka ni gauna oqori e sega ni ivakatakilakila ni sa laivi iko na Turaga. Ia, era sa ivakatakilakila ni nona lomani iko na Turaga sa rawa kina Vua me vakadinadinataki iko ka vaqaqacotaki iko. E vakaukauwataki iko o koya me rawa kina nio colata na icolacola ni bula tawamudu.

Kevaka eda yalodina tikoga ena noda veiqaravi, ena vakasavasavataki keda na Turaga. Ena vaqaqacotaki keda o Koya. Ena dua na siga eda na qai railesu ka raica ni veivakatovolei sara ga oqori na ivakadinadina ni Nona loloma. Eda na raica ni a siviraki keda tiko me rawa kina ni da tucake vata kei Koya ena lagilagi. Me vaka e cavuta na iApositolo ni Turaga ko Paula ena icavacava ni nona bula, “Au sa vala oti ena ivalu vinaka, au sa ciciva oti na cere, au sa taura matua na vakabauta.”

Au vakadinadinataka ni kilai iko na Kalou. E kila o koya na veivakatovolei o sotava. E tiko vata kei iko o Koya. Ena sega ni laivi iko o Koya. Au vakadinadinataka nio Jisu Karisito na Luvena na Kalou Bula. O Koya na noda kaukauwa, na noda iVakabula, na noda inuinui. Kevaka eda vakabauti Koya, ena cakava o Koya na noda kaukauwa vakayalo me veiraurau keina veivakatovolei eda sotava. Au vakadinadinataka ena yaca tabu i Jisu Karisito, emeni.