O Jisu Karisito kei na Nomu iTekitekivu Vou

O Jisu a “lako voli ka dau caka vinaka.” Eda wilika na itukutuku rawarawa oqo ena ivola ni Cakacaka. Sa qai dua na itukutuku tawa kauwaitaki vakalevu! A veilakoyaki dina o Jisu ka daucaka vinaka! Sai Koya na usutu dina—ka ivurevure—ni veika vinaka! A dinata na Nona bula vakayago taucoko ena caka vinaka. Sai Koya sa “yalololoma ka daulomasoli, sa vosota vakadede, ka levu,” na nona yalovinaka tawayalani ka tawamudu na nona loloma veivueti.

Ke tovolei me vakamacalataki se vakalekataki tu ga na Nona caka vinaka kei na loloma veivueti ena rawa me vosa tawa kauwaitaki. E dina, ni saga o Joni na Apositolo me vakamacalataka, kevaka meda saga meda vola na veigauna kei na ivakadinadina ni nona caka vinaka na iVakabula, “ni na oso ko vuravura e na veivola ena volai.“

Na ivakaraitaki matata eda sa tawayalana rawa ena ivolanikalou i Jisu ni sa veilakoyaki voli “ka caka vinaka“ sa veiuqeti titobu ka kurabuitaki, vakabibi ni da raica vakaidina ena vakacava beka ke meda a tiko e kea, meda vakadinadinataka na Nona cakamana, ciqoma na Nona veivakavulici, ka sotava na Nona veivakabulai. A veivosaki kei ira sa biu vakatikitiki, a tarai ira sa tauvimate kei na tawa savasava, a solia na vakacegu vei ira sa oca, a vakavulica na dina sa veisereki, ka sa kacivi ira na ivalavala ca mera veivutuni. Kivei ira na vukavuka, mataboko, yalewa dautagane, o lokiloki, o didivara, kei koya sa galu, vei tina sa yalorarawa, tama sa lomaocaoca, kei yada sa tagiyaso, vei ira sa vakacacani, na madua, kei ira sa rarawa, vei ira sa mate na yagodra eki mate na yalodra, na ka e cakava o Koya e qai cakava me solia e dua na itekiteki vou. Io, e dua tale na vosa tawakauwaitaki!

Na veika kece a kaya ka cakava o Koya a vakarautaka kina e dua na itekitekivu vou kivei ira yadua a vakabula o Koya, vakalougatataka, vakavulica, ka sereki ira mai na ivalavala ca. A sega ni lako tani o Koya maivei ira oqo, sa dina sara ni na sega ni lako tani mai vei iko. Raitayalotaka mada na gauna oqo mo rogoca e dua vei ira na vosa ni veivakabulai oqo mai Vua.

“Na luvequ, sa bokoci na nomui valavala ca.”

“Goneyalewa, au sa kaya vei iko, tu cake mai.”

“Mo savasava mai.”

“Au sa sega talega ni lewai iko mo cudruvi: mo lako, ka mo kakua ni valavala ca tale.”

“Na luvequ-yalewa, mo vakacegu: sa vakabulai iko na nomu vakabauta; mo lako e na vakacegu.”

Na vosa ni iVakabula kivei ira yadua oqo e lekaleka ga, ia kivei ira oqo a cokonaka e dua na mataka vou ni veivosoti, veivakabulai, veivakalesuimai, vakacegu, kei na bula tawamudu. Ia na itukutuku lagilagi oya ni sa solia o Koya na itekitekivu vou vata ga vei iko kei au. Sa rawa kivei keda yadua meda taura e dua na itekitekivu vou mai vua, kei na vuku ga, i Jisu Karisito. Vei iko sara ga. Na itekitekivu vou sa tiko ena uto ni ituvatuva nei Tamada baleti ira na Luvena. Oqo na lotu ni itekitekivu vou! Oqo na lotu ni tekivu bula vou!

Ena papitaiso ena wai kei na Yalotabu, eda sa “sucu tale” ka rawa ni “tekivu vou tale.” E vica beka na inuinui ena kauta mai na itekitekivu vou oqo ki vua e dua sa bikai voli ena icolacola ni ivalavala ca se mai na ca ni bula vakaleqai kei na veiwekani sa madra tu? E sega ni gadrevi vei Jisu na veivosoti ni ivalavala ca se na tekivu vou ni bula, ia a papitaiso o Koya, e vakaraitaka vei keda na sala vakacegu cecere ki na itekitekivu vou sa cakava o Koya vei keda yadua.

Kei na noda itekitekivu vou e sega ni tekivu vakadua ga. Eda dau nanuma ni noda papitaiso sa noda takete vakadua ga ni itekitekivu vou. E sega. E sega ni dua ga na noda madigi. Na veitekitekivu vou oqo e rawa ni yaco ena veisiga! Sa yaco kina ena veimacawa nida kania e dua na tiki ni madrai lailai ka gunuva e dua na bilo wai lailai me ivakananumi ni isolisoli ni noda iVakabula uasivi, a mate ena vuku ni inaki raraba me soli vei keda vakavuqa na veitekitekivu vou ni sa gadrevi vakakina! Sa solia vei keda o Jisu e vuqa na itekitekivu vou ni da sa gadreva vakakina.

Ena yalodina kei na rekitaka e dua na bula vou vei Karisito, sa rawa meda sa qai “buli vou,” ni sa takali na veika makawa ka sa vou na ka kecega. Na cava e kauta maii madigi vou oya kina yalo e sasaga tiko, ena tomani tiko me digitaka na vakabauta ena kaukauwa ni noda Dauveivueti me veivakabulai ka veivakavoui, se cava sara na veivakataotaki kaukauwa ena bula ni vuravura lutu oqo? Sa sega ni cakitaka na iVakabula na Nona dinata me vakayacora na lewa nei Tamana ka vakacavara na Nona ilesilesi vakalou ni veisorovaki, dina ga ni mosi e vakavuna me sautaninini, me tiri mai na dra ena veitiki ni yagona, me rarawa na yagona kei na yalona, ka qai masu me kau tani na bilo ni rarawa. A tomana tale, o Koya me vakaraitaka vei keda na cava na irairai ni gugumatua dina vata kei na Kalou.

Ena veiyalayalati yadua eda cakava kei na veisasaga yadua eda solia meda na maroroya, eda na rawa ni ciqoma e dua na “uto vou” kei na dua na ivakarau sinai ena “yalo vou.” Vakalalai, na levu ga ni noda sureta na Nona caka vinaka ki na yaloda ka biuta tani na domo ni vakarusai keda ena noda vakasama, sa yaco meda sa Nona tamata baleta eda sa cakava dina me sa Noda Kalou. Sa vinakata o Jisu me noda Tui ka noda iVakatawa ka Tui ni Sautu, ka dodonu meda digitaki Koya me noda ena yaloda kei na vakasama.

Na veivutuni e dolava na katuba ki na noda itekitekivu vou, tekivu tale, kei na ikarua ni madigi. Na veivakavulici nei noda Peresitedilomani o Russell M. Nelson e vagalalataka na vakasama cala baleta na isolisoli vakalou ni veivutuni, kau nanuma ni da sa tekivu ququmi tiko kina.

E ka taleitaki meda rogoci ira na noda itabagone mera vakamacalataka na ibalebale ni veivutuni kivei ira. Au rogoca walega oqo ni kaya e dua na goneyalewa, ena matadredredre, “Niu vakasamataka na veivutuni, na veivutuni ena veisiga, au a vakila na reki cecere kei na inuinui. Au a vakila na loloma kei na marau nei Tamaqu Vakalomalagi kei na noqu iVakabula. Au sega ni rere meu gole vei Tamaqu Vakalomalagi ena masu ka kerea na Nona veivuke ena veidredre cava ga au sotava tiko. Au kila ni Rau sega tiko ni saga me rau toboki au niu caka cala tiko. Sa dola raraba tu na Ligadrau. Vei au oqo na veivutuni,” a kaya o koya. Na goneyalewa oqo e kila vinaka ni ena vukui Jisu Karisito, ena rawa vua me tekivu vou!

O gadreva beka e dua na itekitekivu vou? Ena rawa beka mo na tekivu tale, iko mada ga? Vakasamataki ira na tamata a qaravi ira na iVakabula—o ira a vakavulica, vakabula, vakaturi ira cake, vosota, ka vakalesuamai. A digitaki ira tiko beka mai na dua na kalasi ni ikonomi se ituvaki? A tawasei ira tiko beka era sa valavala dodonu kei ira na valavala ca? A digitaki ira yadua tiko beka na tamata baleta ni sa dodonu me nodra se lomani vakalevu? Sega.

Eso era lako mai Vua ena vakabauta cecere, ka vakadinata na Nona kaukauwa me vakabula—na yalewa a turidra balavu, na turaga ni valu sa vakarau mate tiko o nona tamata, na vukavuka, Jairo, kei tamata mataboko o Patimeo. Me sa nodra dui bula ga na vakabauta, ka nuitaka ni nona caka vinaka kei na kaukauwa ni ivakavuvuli mai Nasareci ena veisautaka na nodra bula kei na nodra gugumatua. A cakava o Koya. A vakalaiva me yaco ga na Nona veivakabulai.

Ia o Jisu e vakabulai ira talega sa veilecayaki na nodra vakabauta, me vakataka na tamai koya na gone tauvimate a sa kaci yani, me vakataki iko beka, “Turaga au sa vakabauta, vukea na noqu tawa-vakabauta.” Ia sa qai sovaraka yani na yalololoma kivei ira era sa sega ni vakasaqarai Koya mada ga, me vakataka na yalewa a dautagane, na yada mai Neini, na tamata tauvimate ena tobu ni sisili e Peceseita, kei na tagane sa sucu mataboko. O sa vakila beka ni sa caka vinaka o Koya ena nomu bula ni ko sega mada ga ni bau vakasaqarai Koya se muri Koya?

Kivei ira yadua oqo ena ivolanikalou, kei ira kece era na vakarorogo ka gole mai, sa solia o Koya e dua na itekitekivu vou, a dua beka na bula vou a vosoti kina na ivalavala ca se dua na bula vou a vakabulai mai na mate veitauvi se bula vou vakaturi mai na mate.

Cava na kena ibalebale vei iko kei au? Na nona cakavinaka kei na loloma veivueti kei na yalololoma e sega ni yalani rawa. Na itekitekivu vou sa tiko ena uto ni ituvatuva nei Tamada! Na tekivu tale era sa ilesilesi ni Luvena! Na mataka vovou, wase vou, kei na veimadigi vou era sa usutu rawarawa ni itukutuku vinaka ni kosipeli!

Koya gona, o sa yali tu beka vakadede mai na nomu veiyalayalati mo ciqoma kina na itekitekivu vou? Sega. O sa cakava beka oqo se ena vuqa na gauna me soli kina e dua tale na madigi? Sega. O sa gole tani beka vakayawa mai vei Karisito me vukei iko mo vola e dua na italanoa vou eke ka lako yani. Sega. O vunimeca duadua ga ena vinaka vua na vakasama ni ko sa lutudromu tiko O iko o sega.

Na veitekitekivu vou era sa sega walega ni baleta na noda ivalavala ca se caka cala. Mai na caka vinaka kei na loloma soliwale ni iVakabula, sa rawa meda tekivu tale ena gutaka na veisau ena vakasama makawa, itovo ca, cudrucudru, vakasama vakatani, vakilai ni luluqa, ka dau beitaki ira eso ka cakitaka na nona itavi. Sa rawa mo veisautaka vakaidina na veika e baleti iko sa vakayabaki na kena tabaki iko sobu tiko. E rawa nio tekivu tale ena kaukauwa i iVakavuvuli ni itekitekivu vou. E sega vakadua ni wale me solia vei keda na tekitekivu vou.

Kivei ira era sa sasaga dredre tiko ena ivalavala ca vata ga se na veivakataotaki vata ga vakaveitaravi, saga tikoga yani. E sega ni birika tu o Koya e dua na bai e matamuni. E sega ni cakava o koya e dua na iyalayala ni nomu ikarua ni madigi Mo gu tikoga yani. Mo sasaga tikoga. Mo vakasaqara na veivuke maivei ira era tiko voliti iko. Ko sa nuitaka na itekitekivu vou sa tiko e kea me nomu ena veigauna o lesu kina vei Tamamu ena yalomu dina sara. Mo vakanadakua na caka ca, itovo ca, kei na dokadoka mai vei iko, biuta ena vanua e dodonu mera tu kina. E sega ni gadrevi mo vakataka na tamata e liu. Ciqoma na nomu sa tekivu tale, na kena ikarua se ikatolu se ikava—se ka dua na drau—ni madigi, e soli vei iko mai na dra ni veisorovaki i Jisu Karisito.

E vuabale na noqu vakavinavinaka ena itekitekivu vou e soli vei au kei na kena ena qai soli vei au.

A cavuta na noda iVakabula na iotioti ni vosa, ke sega o ya ena sega kina na inaki ni inuinui se reki ena siga nikua. Ni oti na rarawa levu e Kecisemani kei na icavacava ena kauveilatai veivakararawataki, a kaya ga o Koya, “Sa oti.“ Sa mai yaco na parofisai Vaka-Mesaia, kei na isau taucoko ni dinau baleta na ivalavala ca ni kawa tamata kei na rarawa sa mai saumi. A kaya o Koya sa “oti” na Nona solibula tawayalani ka tawamudu. Ia ena sega ni taucoko na Nona Veisorovaki me yacova o Koya Vakaikoya mena yaco vua e dua na bula vou enai katolu ni siga, na itekitekivu vou ni dua na yalo lagilagi, sa tucaketale ena kaukauwa nei Tamana.

Baleta ga ni sa dau cakava na veika oqori me lomavinaka kina o Tamana, kei na vuku ni sa “vakayacora na lomai Tamada ena veika kecega,” sa rawa ni nodaru na itekitekivu vou. Yalovinaka ciqoma na nomu itekitekivu vou, nikua sara ga, ena gauna oqo. O Jisu Karisito sa Tekivuna ka Sauma talega na noda vakabauta, e vola e vuqa na itukutuku viu vata kei keda. Sai Koya na iVakatekivu kei na iVakataotioti—e tinia na noda madua kei na rarawa ka itekivu ni dua na bula vou ki Vua, meda ciqoma na Nona loloma cecere, eda biuta kina na veika makawa ka tekivu tale ena dua na mataka vou ena kena levu ga eda gadreva. E dina ni na “muri [keda] na [Nona] yalovinaka kei na loloma ena veisiga kecega ni [noda bula].” Ena yaca i Jisu Karisito, emeni.