Mo kila O Cei Dina O Iko
Veitalia na vanua cava eda dui tiko kina ena salatu vakatisaipeli, ena veisau vakaidina na noda bula kevaka eda kila vakavinaka o cei dina o keda.
Vica na yabaki sa oti na luvei keirau yalewa e sotava edua na ka bibi ena nona kaulotu. Ena nona veivakadonui, au wasea na veika e vola mai vei keitou me baleta na macawa oya:
“Nanoa, edua na lewenilotu a kerei keirau me gole yani vakatotolo. Ni keirau yaco yani, keirau kunei koya ena fuloa, ka sega ni tarovi rawa na nona tagi. Ena wainimatana, keirau kila ni sa sega ni cakacaka, e sa vakatalai tani mai na nona itikotiko, sa na sega nona vale.”
E tomana na luvei keirau yalewa: “Au tekivu vakasaqara vakatotolo na ivolanikalou, meu kunea e dua—na ka—dua na ka me vukei koya. Niu vakasaqara tiko edua na tikina vinaka, au vakasamataka, ‘Na cava beka au cakava tiko? Oqo e sega ni ka ena cakava na Karisito. Oqo e sega ni leqa au rawa ni walia, ia oqo e dua na luvena dina na Kalou e gadreva na noqu veivuke.‘ Au sogota na ivolanikalou, tekiduru e yasana, ka tauri koya ka keirau veitagicaki, me yacova ni sa rawa ni tucake me sotava na nona veivakatovolei qo.”
Ni sa vakacegui rawa na marama oqo, sa qai vakayagataka na luvei keirau na ivolanikalou me vukei koya me kila na dina ni nona ituvaki vakalou ka vakavulica vua edua na dina bibi ni noda bula—nida luvena tagane kei na yalewa na Kalou, edua na Kalou e vakila na yalololoma uasivi vei keda ena gauna ni noda rarawa e tu vakarau me vukei keda meda tucake tale.
Sa dua dina na rai vinaka ni imatai ni vunau era vakatavulica na daukaulotu e baleta na Kalou na Tamada Vakalomalagi dauloloma. Na vei dina kece e tara cake ena kila e yavutaki ena o cei dina o keda.
E vakavulica o Susan H. Porter, Peresitedi Raraba ni Lalai: “Na gauna o sa kila vinaka kina na taucoko ni nomu lomani mai vua nomu itubutubu vakalomalagi, ena veisautaka na veika kece. E veisautaka na veika o vakila me baleti iko nio digidigi cala. E veisautaka na veika o vakila nio sotava na bolebole. E veisautaka na nomu rai ena ivakaro ni Kalou. E veisautaka na nomu rai baleti ira tale eso, kei na levu ni veika o rawa ni cakava me veiduitaitaki.”
Na veisau oqo e vakaraitaki nida wilika na veika e sotava o Mosese ni vosa tiko kei na Kalou ena matana votu. Ena veitalanoa oya, e vakananumi Mosese kina na Kalou ena nona ilesilesi vakalou, ni kaya, “Mosese, ko iko na luvequ.” E vakamacalataka na Kalou nio Mosese e tautauvata kei koya na Nona Le Duabau ga. E matata vei Mosese o cei o koya, kei na cakacaka me na cakava, e tiko e dua na Tamana Vakalomalagi dauloloma.
Ni oti na veika e sotava oqo, a lako mai na vunica me temaki koya ka kacivi koya ni kaya, “I Mosese, na luve ni tamata.” Qo e dua na iyaya vakarerevaki ka kilai ena nona yaragi na meca. Ni dau vakananumi keda ena loloma kei na veigauna na Tamada Vakalomalagi nida Luvena, na meca e dau tovolea me dau vakatokai keda ena noda malumalumu. Ia o Mosese e vulica oti nio okoya e sega walega ni “luve ni tamata.” E sauma vei Setani o Koya, “Ko cei ko iko? Raica, o au na luve ni Kalou.” Me vakatalega kina, na gauna eda sa sotava na veibolebole vakayago se na gauna eda vakila edua via vakatokai keda ena noda malumalumu, e dodonu meda dau tudei ena kilaka ni ocei dina o keda. Meda vakasaqara na veivakadonui icake, sega ni vakababa. Ka nida cakava vakakina, eda kacivaka ena doudou “Au luve ni Kalou.”
Ena soqoni ni itabagone qase cake e vuravura raraba, e vakatavulica o Peresitedi Russell M. Nelson: “Se o cei mada o iko? Taumada ka bibi duadua, o iko o a luve ni Kalou, e dua na luve ni veiyalayalati, ka tisaipeli i Jisu Karisito. Nio vakamareqeta na veidina oqo, ena vukei iko na Tamada Vakalomalagi mo yacova na nomu inakinaki uasivi duadua mo laki bula tawamudu ena Nona i serau savasava.”
E sega beka ni vakidacala ni dau tukuni vakawasoma ena ivolanikalou, e vakananumi keda kina na Kalou ena noda veiwekani kei Koya Ena vei yaca kece e rawa ni kilaitani kina o Koya ena masu ni sakaramede, e kerea o Koya me kacivi ena “Kalou, na Tamai keimami Tawamudu.”
Na gauna eda kila vakaidina ocei o keda, eda na vakabauta ni na Tamada Vakalomalagi dauloloma e vakarautaka edua na ituvatuva vei keda meda lesu tale Vua. E vakavulica o Elder Patrick Kearon: “na ituvatuva totoka nei Tamada, na Nona ituvatuva ‘vakasakiti’ sara mada ga, e caka me kauti iko ivale, ka sega ni tarovi iko tu ituba. E vakasaqarai iko tiko ga na Kalou.” Taura dua na gauna mo vakasamataka mada—na Tamada dauloloma, ka kaukauwa e “vakasaqarai iko tiko.”
Veitalia na vanua cava eda dui tiko kina ena salatu vakatisaipeli, ena veisau vakaidina na noda bula kevaka eda kila vakavinaka o cei dina o keda. Meu na vakatura e rua na sala e rawa kina vei keda meda vakatitobutaka na kila oqo.
iMatai, Masu
Ni vakavakarau tiko na iVakabula kina Nona kaulotu vakayago, e kau kina lekutu me lai “tiko vata kei na Kalou.” E dina e dodonu meda veisautaka na noda vakasamataka na noda masu ka meda taura e dua na gauna meda veitalanoa vata ka “tiko vata kei na Kalou” e vei siga yadua.
Au raica ni vakavinakataka na ituvaki ni noqu masu niu taura e vica na miniti meu vakarau vosa vua na Tamaqu. Na ivolanikalou e vakaraitaka vei keda ni ituvatuva oqo e cakacaka. Se o Josefa Simici; Nifai, na luvei Ilamani; se o Inosi, oira kece e tiko e edua na ivakarau mera vakananuma ka raicalesu kina na nodra veitalanoa kei na Kalou. E kaya o Inosi ni sa waloloi na yalona ni sa lutu vakavinaka ki lomana na vosa nei tamana. Na ivakaraitaki oqo e vakavulici keda na bibi ni ivakavakarau vakayalo kina noda gauna e veisiga yadua me “tiko vata kei na Kalou.”
O ira na Nifaiti, e dusimaka na iVakabula, “Ni ko sa masu, curu kina nomu loqi, ia niko sa sogota na kena katuba, masu vua na Tamamu.“
Ke tiko ena loqi se e loma ni rumu, na ivakavuvuli mo kunea e dua na vanua mo rawa ni masu duadua, me vakatara na yalomu me tiko lo, ka me vakila na veivakauqeti ni “domo rogo lailai.” E rawa nida vakavakarau ena noda vakananuma na veika eda vakavinavinaka kina kei na taro se na vei lomaleqa eda na via kauta vua na Tamada. E dodonu meda saga me kua ni cavuta wale na noda masu, ia meda vosa vata kei na Tamada, i cake kevaka e rawa.
Au kila ena osooso ni noda bula, ena gauna eda qaravi ira tiko kina na lalai se veiciciyaki ena vei bose, ena sega beka ni tiko na daqoba ni iloqi kei na vakarau vakavinaka—ia na masu lo, totolo ka bibi e rawa ni vakaibalebale sara kevaka eda sasaga me “tiko vata kei na Kalou” ena tekivu ni veisiga.
Ena tiko beka eso era sega ni masu tu ena dua na gauna balavu se eso tale era vakila ni sega ni saumi na nodra masu. Au yalataka vei iko na Tamamu Vakalomalagi e kilai iko, lomani iko, ka vinakata me rogoci iko. E vinakata o Koya me veivosaki kei iko. E vinakata o Koya mo nanuma o cei dina o iko
A wasea o Elder Jeffrey R. Holland: “Vakacava na levu ni nomu masu, masu tiko vakalevu. Me vacava na kaukauwa ni nomu masu, masu tiko vakaukauwa.”
Me ikuri ni noda masu vagumatua kei na veigauna, na vulici ni iVola ni Momani e veisiga ka sokalou ena valetabu ena vukea na vakavakarau ni noda vakasama kina ivakatakila. Nida sasaga meda vakavinakataka na noda veitaratara kei na Tamada Vakalomalagi, ena vakalougatataki keda o Koya nida Luvena.
iKarua, Lako Mai Mo Kila Ni Sa Karisito o Jisu
Na ivakaraitaki levu ni loloma ni Tamada Vakalomalagi vei keda nida luvena dina ni Nona tala mai na Luvena, na noda iVakabula yadua, me vukei keda me lesu ivale. Ia, e sa gadrevi kina meda kilai Koya.
Vica na yabaki sa oti, niu veiqaravi tiko vaka peresitedi ni iteki, au solia na veivakadonui ni dua na turaga me lai veiqaravi vakaliga ni cakacaka vakalotu ni valetabu. Ni oti na ivakamacala ni dua na liga ni cakacaka vakalotu totoka, au sega ni nakita noqu tabaka na “Kakua ni vakadonuia” ka vakauta na vola ni veitokoni. Ni oti na noqu sega ni rawata me vakasuka mai na itukutuku, au kaciva na peresitedi ni valetabu ka tukuna, “e cala na veika au cakava.” Sega ni wawa, na peresitedi ni valetabu vinaka oqo e kaya, “Peresitedi Eyre, e sega ni dua na ka o cakava e sega ni rawa ni vosoti ka vakadodonutaki.” Sa qai dua na dina cecere. E dina, o Jisu Karisito e “kaukauwa me veivakabulai.”
Ena 2019 e dua na veisau bibi ena veitarogi ni ivolatara ni valetabu. Taumada, e dua na taro e tarogi kevaka e tiko e dua na nomu ivakadinadina i Jisu Karisito na nodai Vakabula kei na Dauveivueti. E tarogi iko qo kevaka e tiko na nomu ivakadinadina ni Nona itavi vaka nomu iVakabula kei na Dauveivueti. Na Veisorovaki i Jisu Karisito e sega walega ni cakacaka vei ira na tani; e cakacaka vei iko kei au. E noqu iVakabula o Koya. E nomu iVakabula o Koya. Yadua. Ena Vukuna e rawa kina vei iko kei au meda lesu tale ka tiko vata kei na Tamada.
Ia, na taciqu kei na ganequ, meda vakasaqarai Koya. Meda vulica na Nona veiwekani vakalou vata kei na Tamada kei keda yadua. Meda vakila na sere ni loloma ni veivueti ka lako mai vei keda yadua nida veivutuni ena vuku ni noda Dauveivueti. Nida kilai “Koya sa kaukauwa me veivakabulai,” eda na mai kila nio keda, me vaka ni luve ni Kalou, na Nona reki, e vakanamata vakabibi kina o Koya, ka yaga me vakabulai.
Au vakadinadinataka ni tiko e dua na Tamada Vakalomalagi Dauloloma. Nida kila na dina tawamudu oqo ena masumasu vakaukauwa, ivakatakila yadua, ka lako vei Jisu Karisito, eda rawa kina ka tukuna vakawasoma, “Au luve ni Kalou.” Ena yacai Jisu Karisito, emeni.