Era Lewai Ira Ga Vakai Ira
Kevaka eda cakacakataka na vakabauti Jisu Karisito, cakava ka maroroya na veiyalayalati kei na Kalou, ka veivutunitaka noda ivalavala ca,ena qai ka talei kina na itikotiko ni veilewai.
E tini na iVola i Momani ena veisureti veivakauqeti mai vei Moronai meda “lako mai vei Karisito,” “ka vakataucokotaki Vua,” “vakuwai [keda] mai na veika kecega sa sega ni vakalou,” ka “lomana na Kalou ena [noda] igu, vakasama kei na kaukauwa kecega.” E ka taleitaki, ni namaka ruarua tu na Tucaketale kei na iOtioti ni Veilewai na iotioti ni yatuvosa ni nona ivakasala.
E tukuna, “sa voleka meu lako ka vakacegu ena parataisi ni Kalou, me yacova ni rau sa cokoti vata tale na yaloqu kei na yagoqu, ka’u na qai kau cake ena lagilagi, ka veirai kei kemudou ena itikotiko talei ni veilewai cecere i Jiova, na nodra Turaganilewa Tawamudu na bula kei ira na mate.”
Au kurabui ena nona vakayagataka o Moronai na vosa “talei” me vakamacalataka kina na iOtioti ni Veilewai. Era vakamacalataka vakakina na parofita tale eso ni iVola i Momani na veilewai me “siga lagilagi” ka dua e dodonu meda “rai tiko [kina] ki liu ena mata ni vakabauta.” Ia vakawasoma ni da namaka na siga ni lewa, eda dau vakasamataka na ivakamacala vakaparofita tale eso, me vaka na “madua kei na kila [noda] cala rerevaki,” “rerevaka ka domobulataka,” kei na “rarawa tawacava.”
Au vakabauta ni duidui levu ena vosa oqo e dusia ni ivunau i Karisito e rawa kina vei Moronai kei ira na parofita tale eso mera namaka na siga cecere oya ena gumatua kei na inuinui, ka sega ni rere era veivakaroti kina me baleti ira era sega ni vakavakarau tu vakayalo. Na cava beka a kila tu o Moronai ka gadrevi me daru vulica?
Au masuta na veivuke ni Yalo Tabu ni da vakasamataka na ituvatuva ni marau kei na loloma cecere i Tamada Vakalomalagi, na itavi ni veisorovaki ni iVakabula ena ituvatuva i Tamada, kei na sala eda na “saumi taro [kina] ena [noda] ivalavala ca ena siga ni veilewai.”
Na iTuvatuva ni Marau nei Tamada
Na inaki bibi ni ituvatuva nei Tamada sa ikoya me vakarautaka vei ira na Luvena vakayalo na madigi mera ciqoma edua na yago, ka vulica na “vinaka mai na ca” ena veika era sotava ena bula vakayago, mera tubu kina vakayalo, ka vakatorocaketaki tawamudu.
Na ka e volai ena Vunau kei na Veiyalayalati me baleta na“galalala nidigidigi” e usutu ena ituvatuva ni Kalou me vakavuna nodra tawamate rawa kei na bula tawamudu na Luvena tagane kei na yalewa. Na ivunau bibi oqo e sa vakamacalataki talega ena ivolanikalou me galala ni digidigi kei na galala mo lewa ka mo cakava.
Na vosa na “galala ni digidigi” e veivakararamataki. Na veivosa vakatautauvata eke ni vosa na “galala” e oka kina na “vinaka,” “lomadina,” kei na “bula dodonu.” Na veivosa vakatautauvata eke ni vosa na “digidigi” e oka kina na “cakava,” “vakaitavi,” kei na “cakacaka.” O koya gona, na “galala ni digidigi” e rawa ni kilai me rawaka kei na dodonu meda digidigi ka cakacaka vakaikeda ena veisala e vinaka, dina, dodonu ka rakorako.
Na ibulibuli ni Kalou e tiko ruarua kina “na veika me caka kei na veika me cakacakataki.” Ia na galala ni digidigi sa ikoya na ivakarau vakalou ni “kaukauwa ni cakacaka vakaikoya” ka vakaukauwataki keda ni da luve ni Kalou meda cakacaka ka sega ni cakacakataki.
A buli na vuravura me vanua ni nodra vakatovolei na luvena na Tamada Vakalomalagi me laurai se era na muria na “cakava na veika kece sa vakarota vei ira na Turaga na nodra Kalou.” Na inaki ni Veibuli kei na noda bula vakayago oya me laurai kina se eda na digitaka me cakacaka ka yaco me vakataka na tamata e sureti keda kina na Turaga meda vakataka.
A vakaroti Inoki na Turaga:
“Raici ira oqo na wekamu; sai ira na cakacaka ni ligaqu, kau a solia vei ira na nodra kila ka, ena siga au sa buli ira kina; ia ena Were ko Iteni au sa solia kina vua na tamata na nona galala ni digidigi;
“Ia vei ira na wekamu au sa kaya kina, ka solia talega na ivakaro, ni dodonu me ra veilomalomani, ia sa dodonu me ra digitaki au, na Tamadra.”
Na inaki taumada ni vakayagataki ni digidigi sa ikoya meda veilomani vakaikeda ka digitaka na Kalou. Ka rau sa salavata sara ga na inaki e rua oqo kei na imatai kei na ikarua ni vunau levu mo lomana na Kalou ena lomamu taucoko, yalomu, kei na nomu nanuma ka mo lomana na kai nomu me vakataki iko.
Mo nanuma tiko nida sa vakaroti—sega ni vosataki se vakasalataki, ia eda vakaroti—meda vakayagataka na noda digidigi meda veilomani vakai keda, ka digitaka na Kalou. Meu vakatura mada ni ena ivolanikalou, na vosa veisautaki na “galala” e sega walega ni dua na vosa‑ivakamacala ia e rairai dua talega na idusidusi vakalou me baleta na ivakarau meda digidigi kina.
Na serenilotu kilai levu me “Digitaka na Dodonu” e tiko na kena inaki. Eda sega ni vakalougatataki ena digidigi dodonu meda cakava na ka ga eda vinakata ena gauna ga eda vinakata kina. Ia, me vaka na ituvatuva nei Tamada, eda sa ciqoma na galala ni digidigi meda vaqara ka cakacakataka vakakina na dina tawamudu. Nida “vakatulewa ga [vakaikeda],” sa dodonu meda gumatua ena cakacaka vinaka, “vakayacora e levu na ka mai na [noda] kila ga vakataki keda, ka vakayacora na veika dodonu.”
Na inaki bibi tawamudu ni galala ni digidigi e tukuni tiko ena italanoa vakaivolanikalou ni matabose ena bula taumada. A saqata o Lusefa na ituvatuva nei Tamada me baleti ira na Luvena ka vakasaqara me vakarusa na kaukauwa ni vakatulewa ena galala. Vakabibi, na veisaqasaqa ni tevoro a vakanamata vakadodonu ki na ivakavuvuli ni galala ni digidigi.
A vakamacalataka na Kalou, “Raica, au sa lewa me vakasavi sobu mai ko Setani, ni sa vorati au, ka segata me voroka na galala ni digidigi ni tamata.”
Na nona ivadi ca na vunica sa ikoya me kauta tani mai vei ira na luvena tagane kei na yalewa na Kalou na isolisoli mera “vakatulewa vakai ira ga” mera caka dodonu kina. A nona inaki me soli ira yani na luvena na Tamada Vakalomalagi mera ka era rawa ga ni cakacakataki.
Cakava ka Yaco mo Vakakina
A vakabibitaka o Peresitedi Dallin H. Oaks ni kosipeli i Jisu Karisito e sureti keda tu meda kila e dua na ka, ka meda yaco me dua na ka ena kena cakacakataki vakadodonu ni galala ni digidigi. A kaya o Koya:
“E vuqa na tikina ena ivolanikalou kei na iVolatabu e tukuna me baleta na iotioti ni veilewai ka na saumi kina ki na tamata kecega me vaka na nodra ivalavala se cakacaka se na gagadre ni yalodra. Ia eso tale na ivolanikalou era vakalevutaka oqo ena kena tukuni ni da na lewai mai na ituvaki eda sa yacova.
“Na parofita o Nifai e vakamacalataka na iOtioti ni Veilewai me baleta na ituvaki eda sa yacova: ‘Ia kevaka sa dukadukali na nodra ivalavala, sa dodonu mera dukadukali tikoga; ia kevaka era sa dukadukali sa dodonu mera na sega ni rawa ni tiko ena matanitu ni Kalou’ [1 Nifai 15:33; vakabibitaki]. E vakaraitaka o Moronai, ‘Ko koya sa dukadukali ena dukadukali tikoga; ko koya sa ivalavala dodonu ena ivalavala dodonu tikoga’ (Momani 9:14; vakabibitaki).”
A tomana o Peresitedi Oaks: “Mai na ivakavuvuli vakaoqori eda sa tinia kina ni iOtioti ni Veilewai e sega walega ni mai dua na vakadikevi ni wiliwili taucoko ni caka vinaka kei na caka ca—na ka eda sa cakava. E sa dua na vakadinadinataki ni otioti ni revurevu ni noda cakacaka kei na vakasama—na ka eda sa yaco me vakataka
Na Veisorovaki ni iVakabula
Ena sega ni rawa ni vakabulai keda duadua ga na noda cakacaka kei na gagadre. “Ni sa oti sara na veika kece eda rawa ni cakava,” eda sa vakaduavatataki walega kei na Kalou ena loloma cecere kei na loloma soliwale e tu ena solibula veisorovaki tawa vakaiyalayala ka tawamudu ni iVakabula.
A vakaraitaka o Alama, “Ka tekivu vakabauta na Luve ni Kalou ni na lako mai me sereki ira na nona tamata, ka ni na mai kune ka rarawa ka mate talega me sorovaka kina na nodra ivalavala ca; ka ni na tucake tale mai na mate ko koya, ka sa na yaco rawa kina na tucake tale mai na mate, ia era na qai tu e matana na tamata kecega, me lewai ira ko koya ena iotioti ni siga ni veilewai, me vaka na nodra ivalavala.”
“Keimami vakabauta ni na vakabulai na tamata kecega ena Veisorovaki nei Karisito, kevaka eda sa talairawarawa kina lawa kei na cakacaka vakalotu ni Kosipeli.” E dodonu meda vakavinavinaka ni na sega ni tu me saqati keda na ivakadinadina ni noda ivalavala ca kei na caka cala kevaka eda “sucu tale,” vakaidina cakacakataka noda vakabauta na Dauveivueti, veivutuni ena “yalodina” kei na “gagadre dina,” ka “vosota me yacova na ivakataotioti.”
Rerevaka na Kalou
E vuqa vei keda e namaka beka ni noda rairai ena mata ni itikotiko ni veilewai ni Turaganilewa Tawamudu ena tautauvata ki na valeniveilewai vakavuravura. Ena vakatulewa e dua na turaganilewa. Ena vakaraitaki na ivakadinadina. Ena vakatauci na lewa. Ka eda na rairai veilecayaki ka rere tu me yacova ni da kila na kena macala e muri. Ia au vakabauta ni ivakaraitaki vakaoqori e sega ni donu.
E duidui mai kina ia e semati ki na rere eda dau sotava sa ikoya na ka e vakamacalataka na ivolanikalou me “rere vakalou” se “na rerevaka na Turaga.” Tawatautauvata na rere vakavuravura e vakavuna na taqaya kei na nuiqawaqawa, na rere vakalou e sureta ki na noda bula na vakacegu, veivakadeitaki, kei na nuidei.
Na rere ni buladodonu e umani tu kina na yalo titobu ni vakarokoroko, veidokai, kei na qoroqoro vua na Turaga o Jisu Karisito, talairawarawa kina Nona ivakaro, kei na nanamaki ki na iOtioti ni Veilewai kei na lewa dodonu e Ligana. Na rere vakalou e tubu mai na kila matata donu me baleta na ituvaki kei na ilesilesi vakalou ni Dauveivueti, e dua na yalorawarawa ni kena soli na lomada ki na Lomana, kei na noda kila ni na tarogi na tamata yadua me baleta nona gagadre, nanuma, vosa, kei na ivalavala ena Siga ni Veilewai.
Na rerevaka na Turaga e sega ni dua na noda kau yani ena lomalomarua ki na Nona iserau meda lewai. Ia, sa ikoya na noda rawa ni ciqoma vakai keda na veika me vaka na kena ituvaki dina kei na ituvaki dina ni veika ena qai yaco mai.
Na tamata kecega e sa bula oti, se bula tiko oqo, se na qai mai bula e vuravura “era na kau ki na mataveilewai ni Kalou mera lewai vei koya me vaka na nodra cakacaka, se vinaka se ca.”
Kevaka eda a gadreva na buladodonu ka vinaka tu na noda cakacaka—kena ibalebale ni da a cakacakataka na vakabauti Jisu Karisito, cakava ka maroroya na veiyalayalati kei na Kalou, ka veivutunitaka noda ivalavala ca—ena qai ka talei kina na itikotiko ni veilewai. Me vaka a vakaraitaka o Inosi, eda na “tucake e matana [na Dauveivueti]; [eda] na qai raica kina na matana ena yalo marau.” Ka ena iotioti ni siga ena “soli vei keda na veika ni ivalavala dodonu.”
Kena veibasai, kevaka a tawadodonu na noda gagadre ka ca na noda cakacaka, sa na qai vakadomobula na itikotiko ni veilewai. Eda na “kila vinaka,” ka “nanuma vinaka,” ka na “vakayadrata na yaloda na [noda] cala.” “Eda na sega ni tovolea kina meda vakanamata cake vua na noda Kalou; ia eda na marautaka vakalevu kevaka meda vakarota na veivatu kei na veiulunivanua mera buluti keda meda vuni kina mai na nona iserau.” Ka ena iotioti ni siga eda na “taura me [keda] isau na ca.”
Kena itinitini, eda na dui lewai keda ga vakai keda. Ena sega ni gadrevi me dua e tukuna vei keda na vanua meda gole kina. Ena iserau ni Turaga, eda na ciqoma na veika eda sa digitaka meda yacova e vuravura ka kila vakai keda na vanua e dodonu meda tiko tawamudu kina.
Yalayala kei na iVakadinadina
Na kena kilai ni rawa ni talei na iOtioti ni Veilewai e sega ni dua na veivakalougatataki e maroroi tu me baleti Moronai walega.
A vakamacalataka o Alama na veivakalougatataki e yalataki vei ira kece na tisaipeli yalodina ni iVakabula. A kaya o Koya:
“Sa ibalebale dina ni malanivosa na veivakalesui ko ya me kau lesu ga na ca ki na ca, na veika vakayago ki na veika vakayago, kei na veika vakatevoro ki na veika vakatevoro—na vinaka ki na ka e vinaka; na dodonu ki na veika e dodonu; na lewa dodonu ki na lewa dodonu; kei na yalololoma ki na yalololoma.
“Mo caka dodonu, ka vakataulewa vakadodonu, io mo daucaka vinaka tiko ga; ia kevaka ko sa kitaka na veika kece oqo, ko na rawata vakaidina na kena isau; io, ena vakalesui tale vei iko na loloma cecere; ena vakalesui tale vei iko na vakatulewa dodonu; ka saumi lesu tale ga vei iko na nomu lewa dodonu; ia ena soli vei iko na vinaka me kemu isau tale.”
Au vakadinadinataka ena reki ni o Jisu Karisito e noda iVakabula e bula tiko. E dina na yalayala nei Alama ka sa baleti iko kei au—nikua, ni mataka, kei na veigauna tawamudu. Au vakadinadinataka vakakina ena yaca tabu ni Turaga o Jisu Karisito, emeni.