Rai vua na Kalou mo Bula

Ena June ni yabaki oqo, edua na vakacalaka vakadomobula a yaco ena matanitu o Lesoto ena ceva kei Aferika. Edua na basi lailai era vodo tiko kina e 20 na goneyalewa ena Tabana ni Lotu o Maputsoe kei na vitu na kena veiliutaki era a gole tiko kina koroturaga, o Maseru, ena dua na soqoni ni goneyalewa ni nodra tikina. Ni ra cici tiko e gaunisala wase rua ena mataka caca ni ika 21 ni June, edua na motoka ka cici tiko mai yasana kadua, ena nona via sivita edua tale na lori, a ciciva mai na sala ka tiko kina na basi. E sega na vanua se na gauna me levea kina na coqa mamaca, ka ena loma ga ni vica na sekodi erau coqa vata na lori, vakatoqiqi mai gaunisala, ka kama sara.

Era a lewe 15 kece na mate ena coqa, oka kina e ono na goneyalewa, rua na veiliutaki ena Goneyalewa, kei na peresitedi ni tabana kei watina. O ira na bula, lewe ni matavuvale, kei ira na itokani era vakaraitaka na veilecayaki ni yalo, na cudru, lomabibi, kei na veibeitaki. Dina ni vakilai tiko na veika oqo kei na taro sega na kena isau, era vakacegui ira vakai ira ka rai vua na Kalou ena sereivakatagi tabu, na ivolanikalou, kei na masu, era kunea kina na vakacegu. O Setso’ana Selebeli na goneyalewa yabaki a tusanaka, “O Jisu Karisito e lomani keda ka tiko vata kei keda, dina ga ni mosi tu na yaloda.”

Edua na goneyalewa kei na dua na iliuliu ka rau a curu i valenibula ena vuku ni kama erau dau vulica vata na iVola i Momani. Edua a kaya, “Wale tiko ga qo keirau a wiliwili tiko ena Moronai, ka tukuna vakavinaka sara o Moronai na ka au vakila tiko. Ni vosa o koya, e vaka e kaya tiko, ‘E dodonu mo vulica na vosa oqo baleta era volai vei iko me vukei iko mo vorata na ka oqo.’”

Ena lotu ni veibulu cokovata vei ira na vakaleqai, a vosa kina o Elder Siyabonga Mkhize na Vitusagavulu ni wasewase, “E dodonu meda gole kece vua na Turaga ena gauna oqo ka kerei Koya me vakaceguya na yaloda ka vakaseavutaka na mosi eda vakila.” Na peresitedi ni Goneyalewa o Mampho Makura, mai na Tabana veivolekati o Leribe, a uqeta mera: “Gole vua na Turaga, me kunea kina na kaukauwa me ciqoma kina na Nona lewa. O Jisu Karisito e ‘vakatekivuna ka na sauma talega na noda vakabauta’ [Iperiu 12:2]. Kua ni rai tani, ia mo rai ga vei Koya.”

Mo Rai vei Koya. Na nona vosa e vakavoqataka na ivakasala i Alama vua na luvena o Ilamani: “Mo rai yani vua na Kalou mo bula kina.” A cavuta o Alama na ka a sotava o Liai kei ira na na nona tamata kei na Liaona me iyaloyalo: “Ia raica, sa rawarawa sara me muri na vosa i Karisito, o koya ena dusia vei iko edua na sala dodonu kina marau tawamudu, me vaka sara ga vei ira na noda qase kevaka mera a muria na idusidusi oqo, o koya ena dusia vei ira edua na sala dodonu kina vanua yalataki.” A kaya o Alama: “Kevaka mera rai ga yani kina era na bula. Kevaka meda na rai yani eda na bula tawamudu.”

Dua tale na gauna, a cavuta o Alama na ivakaraitaki ni gata parasa a vakaduria o Mosese nira a laukata na Isireli makawa ena gata vakabukawaqa. A tukuna vei Mosese na Turaga me cakava edua na ivakatakarakara ni gata bukawaqa ka laveta cake ena dua na kau balavu, vata kei na yalayala “ia era na bula ko ira kecega sa laukata, nira sa raica.” A vakamacalataka o Alama ni gata parasa a ivakatakarakara se ivakatakilakila kei Karisito, o Koya ena mai rube ena kauveilatai. E vuqa era rai ka bula, ia eso, e kaya o Alama, era “yalokaukauwa” ka sega ni via raica ka ra mate kina.

O Alama a taroga:

“Kevaka e rawa nio vakabulai nio raica ga na ka e vakaraitaki vei kemuni, oni na sega li ni raica vakatotolo, se oni na vakaukauataka tiko ga na lomamuni ka sega ni vakabauta, se oni vucesa, ka sega ni via raica, moni qai mate kina?

“Veiraiyaki ka tekivu vakabauta na Luve ni Kalou, ni na lako mai me sereki ira na nona tamata, ka na mai kune ka rarawa ka mate talega me sorovaka kina na nodra ivalavala ca; ka na tucake tale mai na mate ko koya, ka yaco rawa kina na tucake tale mai na mate, ia era na qai tu e matana na tamata kecega, me lewai ira ko koya ena iotioti ni siga ni veilewai, me vaka na nodra ivalavala.”

E dina sara, ni ivakasala meda “rai vua na Kalou meda bula” e vakaibalebale vei keda sega ni baleta ga na tawamudu ia e vakayacoka kina itovo kei na ivakatagedegede ni noda bula vakayago. Nanuma na vosa ni goneyalewa o Sister Selebeli e Lesoto e tukuna—“O Jisu Karisito e lomani keda ka tiko vata kei keda, dina ga ni mosi tiko na yaloda.”

E ivakarau ni vuravura lutu—e kaukauwa kina na cakacaka ni tevoro ka se sega ni taucoko na tamata kece—e tiko kina na rarawa kei na veivakacacani, mosi kei na vutugu, guce kei na mate, veivakacacani kei na vakatulewa cala. Nida rai ga vua na Kalouna tamata yadua, matavuvale kei na matanitu ena tiko vinaka. A vakavulica o Peresitedi Russell M.Nelson, “Baleta ni sa vueti keda vakayadudua na iVakabula mai na malumalumu, caka cala, kei na ivalavala ca ena nona veisorovaki tawayalani, ka baleta ni a vakila o Koya na vei mosi kece, lomaleqa kei na icolacola bibi o sa sotava oti [raica na Alama 7:11–13], nio veivutuni vakaidina ka qara na Nona veivuke, ona rawa ni rawa na bolebole ena vuravura veilecayaki oqo.”

E sega ni dua na vosa ni yalayala e cavuti vakalevu cake ena iVola i Momani me vaka na: “Kevaka dou na muria na noqu ivakaro dou na tiko sautu ena vanua: ia kevaka dou na sega ni muria na noqu ivakaro dou na muduki tani mai na noqu iserau.” Na veika era lako curuma na tamata ni iVola i Momani ena vei senitiuri e vakadinadinataka na dina ni veivosa oqo. “Tiko Sautu” e kena ibalebale na marautaka na veituberi kei na veivakalougatataki ni lomalagi ena nodra bula. “Tiko Sautu” kena ibalebale na rawati ni itagede ni rawaka vakailavo me rawa kina nira wakawati, vakavuvale, ka veiqaravi ena veivuke me sotavi na nodra gagadre na vakaleqai tu. “Tiko Sautu” a oka kina na igu me vosoti ka vorati kina na dredre kei na veivakatovolei. Ena vuku ni loloma soliwale ni Turaga, “[a] veivuke na ka kecega [mera] vinaka kina,” vakavinakataki ira, ka vakatitobutaka na nodra veiwekani vata kei Koya.

A vakamacalataka o Alama ni rai vua na Kalou sai koya me muri na Nona ivakaro, tagica na Nona veitokoni e veigauna, vakarogotaki Vua na nomu sala kecega, ka vakasinaiti na lomamu ena vakavinavinaka Vua ena siga kei na bogi. Na ivakaro kei na ivakasala ni Kalou era na kunei ena ivolanikalou kei na nodra vosa na nona italai. Na veivakavuvuli kei na veivakasama ka cauraki tiko e “Na Matavuvale: Ai Vakaro ki Vuravura Raraba.” era ivakaraitaki uasivi. Edua tale sai koya na veidusimaki ka kunei ena ivolalailai ni Me iSakisaki ni iTabagone. Na itoko ni Cauravou kei na Goneyalewa ena yabaki oqo na “Rai vei Karisito,” ka tauri mai na veidusimaki veivakacegui ni Turaga kivei Josefa Simici kei Oliva Kauderi: “Drau vakararavi tiko mai vei au ena vakasama kece; kakua ni vakatitiqa, ka kakua ni rere.” Me iSakisaki ni iTabagone e tukuna baleta e vica na ivakaro bibi ni Kalou kei na ivakatagedegede ka vakavulica na sala meda rai kina vua na Turaga ka cakava na digidigi vinaka. E idusudusi yaga sega vei ira ga na itabagone ia vei keda kece sara.

Ena dua na ivakaraitaki bibi, na Me iSakisaki ni iTabagone e tiko kina edua na veidusimaki yaga ena iwase ka kena ulutaga na “Sa Ka Tabu Na Yagomu” E vakasalataka mo: “Qarava na yagomu—kei na yagodra na tani—ena vakarokoroko. Nio vakatulewataka na nomu isulu, ikotikoti, kei na kemu irairai, tarogi iko, “Au sa doka tiko beka na yagoqu ni sa isolisoli tabu mai vua na Kalou?”

Me iSakisaki ni iTabagone e tukuna tale: “Maroroya na veiyacovi kei na kena gagadre me ka tabu. Mera kua ni ulutaga ni veiwali se veivakamarautaki. E taudaku ni nodrau vakawati edua na tagane kei na dua na yalewa, e cala me tarai na veitiki ni yagona tabu vakatabui edua tale veitalia mada ga ke daramaka tiko na isulu. Na nomu digidigi baleta na ka o cakava, raica, wilika, vakarogoca, vakasamataka, biuta ena initaneti, se tex, levea edua na ka e nakiti me yaco kina na garogaro ca vei ira na tani se vei iko.”

Oqo e vakananumi au ena ivakadre nei Peresitedi Nelson wale tiko ga qo:

“Na voroki ni lawa vakalou [ni tiko savasava] ena totolo cake na kena vakadredretaka na nomu bula mai na dua tale na ka. Vei ira era sa caka veiyalayalati oti kei na Kalou, na bula ni veidauci edua vei ira na sala totolo me vakayali kina na nomu ivakadinadina.

“Na kaukauwa ni vakatubu kawa e dua ga na dodonu vakalou ka vakatara na Tamada Vakalomalagi vei ira na luvena vakayago mera vakayagataka. O koya gona, e vakamatataka na Kalou me baleta na bulataki, kaukauwa vakalou. Na veiyacovi e baleti rau ga edua na tagane kei na yalewa erau sa vakamau vakairau.

“Edua na iwase levu kei vuravura era sega ni vakabauta oqo, ia na nanuma ni lewevuqa e sega ni vakatulewataka se cava e dina. Na Turaga e vakaraitaka ni sega ni dua na tamata tawa savasava ena rawata na matanitu vakasilesitieli. Kevaka o tawa savasava tiko, au vakamasuti iko mo veivutuni. Lako mai vei Karisito ka ciqoma na Nona yalayala nio na vosoti vakataucoko nio veivutunitaka vakaidina na nomu ivalavala ca.[raica na Aisea 1:16–18; Vunau kei na Veiyalayalati 58:42–43].”

Nanuma ni ena yalayala ni iVola i Momani, na veibasai ni tiko sautu e sega ni dravudravua—ia na tamusuki mai na iserau ni Turaga. Na Nona iserau sai koya na veivakayarayarataki ni Yalona kina nona bula edua. Na tamata kece era sucu vata mai kei na Rarama i Karisito ki vuravura. Me kena ikuri, eso era digitaka mera papitaiso ka ciqoma na isolisoli kei na ikuri ni rarama ni Yalo Tabu. O Koya e kauta mai na veiuqeti kei na veidusimaki, vakatorocaketaka ka vakavinakataka na isolisoli kei na nona taledi edua, ka veivuke me levei na veivakayarayarataki ca, digidigi ca, kei na veisala tani.

Me vakataki iko, au kila edua e marautaka ena dua na gauna na isolisoli ni Yalo Tabu, ia ena vuku ni nona sega ni dau maroroya na ivakaro ni Kalou sa mai yali na veivakalougatataki oya. Au nanuma edua na tamata e vakasukai na nona itutu vakalewenilotu ena vuku ni talaidredre. A kaya ni matai ni ka a via cakava sai koya me vakaduiduile. A nanuma sega ni taucoka na nodra lewa na iliuliu. A kila o koya ni cala na ka a cakava, ia e ulubaletaka na nona dusia na nodra cala kei na malumalumu na tani. Ni oti edua na gauna, a vakila vinaka vua na ivakarau ni bula ena taudaku ni Lotu ni sega na itavi se veikacivi, nanamaki me tiko ena sokalou kei na veiqaravi ve ira na tani.

A toso tiko me dua na gauna, sa tekivu vakila o koya ni sega ni tiko na Yalo Tabu—na iserau ni Kalou—ena nona bula. Na veika e sotavi, e kila o koya se ena vakacava me tiko, e veisiga na veivakacegui, veidusimaki, kei na nuidei e solia na Yalotabu, ka calata vakalevu. E muri, e cakava o koya na ka a gadrevi me veivutuni kina me rawa tale vua me papitaiso ena wai kei na Yalo.

E vaka me sega ni oti rawa na veivurevure duidui era rai kina na tamata me kunei kina na ibalebale, na marau, kei na veivuke ena bula. E vuqa era “sa raibaleta tiko na maka.” Ia e gadrevi meda kua ni “vagonegonea tiko, ka veitosoyaki, ka veikauyaki ena cagi kecega ni vakavuvuli [se isulusulu].” Nida rai vua na Kalou, eda na kunea na vakacegu ena gauna dredre ka tubu na noda vakabauta ena gauna mada ga ni noda vakatitiqa kei na bolebole vakayalo. Eda ciqoma na kaukauwa nida sotava na veisaqasaqa kei na galili. Eda na kila na kedrau duidui na ituvaki dina kei na kena e tiko e vuravura nikua. E sega ni dua dina tale na sala mai na kena sa lesia tu na Kalou vakai Koya: “Dou golevi au mai, mo dou vakabulai na iyalayala kei vuravura: ni sai au na Kalou, ka sa sega e dua tani tale.”

Na rai vua na Kalou e kena ibalebale nio Koya e sega ni dua ga na ka me vakaliuci; ia, o Koya na ka duadua ga me vakaliuci taumada. Au vakananumi keda tale ena vakacalaka mai Lesoto ena June sa oti. Mai na nona loga e valenibula, edua vei ira na veiliutaki ena Goneyalewa ka bula, ka sega ni vakabauta na Kalou ni bera ni Lotu, a kaya ni nona inaki me kila se cava a sega ni mate kina. “Meu qarava e veigauna na Kalou ena sala meu na kila kina na kena isau, keu na kunea edua,” a kaya o koya. “Au a dau nanuma tu de au lomana na Kalou, ia oqo au sa qai lomani Koya vakaidina sara. Qo o Koya na [naba dua] ni ka au vakaliuca ena noqu bula.”

Au vakadinadinataka na Tamada, Luvena, kei na Yalo Tabu ka ratou duavata ena vosa, vakanananu, inaki, kei na ivalavala ka ratou Kalou edua bau ga, eda rawa ni rai kina me baleta na veika vinaka kecega. Au vakadinadinataka na Veisorovaki i Jisu Karisito, e lako mai kina na kaukaua me vakayacori kina na yalayala talei: “Moni muri au, ka vosota me yacova na ivakataotioti, moni bula kina; ia ko koya sa vosota me yacova na ivakataotioti, au na solia vua na bula tawamudu.” Ena yacai Jisu Karisito, emeni.