Era Tekiduru ena iCabocabo ni Soro na Yalo Malumalumu

Mai vei Elder Jeremy R. Jaggi

Ena Vitusagavulu

Nida cakava ka rokova na noda veiyalayalati, eda vauci keda vua na iVakabula, eda rawata na Nona loloma soliwale, veitaqomaki veivakasavasavataki, veivakabulai, kei na vakacegu.

Vinaka vakalevu, matasere, na nomuni ivakadinadina ena sere vou oqori.

Na serenilotu ni sakaramede vou na “Bread of Life, Living Water” e tara na yaloqu. Edua na qaqa ni serenilotu e vaqo, “Now I come before the altar, off’ring Him my broken heart.”

Noqu kila na ibalebale ni vosa oqori a vakalevutaki ni oti ga na neitou toki vakamatavuvale mai Newbury Park, California, me lai veiqaravi ena tabana ni kaulotu na Utah Ogden Mission ena 2015. Au ciqoma na veisureti me lai sarasara ena itikotiko ni mataivalu na Hill Air Force Base e Layton, Utah. Au se bera ni lesu mai ena dua na itikotiko ni mataivalu, se sotava na kena italatala se o ira na tagane kei na yalewa era cakacaka mera taqomaka ka maroroya na nodra matanitu.

O talatala Harp, me vakataki ira na udolu tale na italatala volodia kei ira era talatala saumi ni valeniveivesu, valenibula, kei na itikotiko ni mataivalu e veiyasai vuravura, era vakauqeti au. Na iotioti ni vanua keirau sikova oya na valenilotu. Au taroga na italatala se dau caka lotu vei ira na tamata kece era gadreva mera vakanananu titobu, masu, vakanomodi, ka sokalou. A gole o koya kina lalaga e liu ni valenilotu, ka ucuna mai edua na kauveilatai mai na daku ni latilati. A kaya o koya ni dau vakayagataka na kauveilatai vei ira na lotu Prorestant kei na Katolika. Au taroga na cava e vakayagataka vei ira tacida kei na ganeda na Jiu, ka qai gole o koya ki yasa kadua ni lalaga e liu ka ucuna mai kina edua na Kalokalo i Tevita.

Au a qai taroga, Na cava o dau cakava ena nodra lotu na Yalo Dodonu Edaidai?” A biligi rau tani na ivakatakilakila oya ka dusi kina icabocabo ni soro kau levu ena lomadonu ni valenilotu. A kaya o koya nio ira na lewe Ni Lotu i Jisu Karisito ni Yalododonu Edaidai era vakarautaka ka masulaka na madrai kei na wai ena icabocabo ni soro. Au taroga se dau kautani na icabocabo ni soro levu ka vaka me vakadeitaki tu ni bera nodra lotu na tacida kei na ganeda, Jiu, Musulimi, Katolika, kei na lotu vaKarisito. A tukuna o koya ni sega ni vakakina, ni vica vei ira na mata vakabauta oya era dau vakayagataka tale ga na icabocabo ni soro.

O Eparaama e tara e dua na icabocabo ni soro, vauci Aisake, ka vakarau me vakacabora na luvena e duabau ga, a tarovi na ligana, ka tukuna, me vaka a tukuna na Turaga, “Koi au oqo”! Sa vakavica beka me soli bula na iVakabula se dua vei ira na Nona parofita me kaya, “Koi au oqo”?

Ena Nona iVunau ena Ulunivanua, a sureti keda na iVakabula meda veivinakati rawa kei ira na tacida kei na ganeda ni bera nida torova na icabocabo ni soro. O Paula a vakavulica nida sa “vakasavasavataki ena icabocabo ni soro ena Veisorovaki i Jisu Karisito.

Na parofita o Liai “e biuta na nona kei na iyau talei. [Qai] tara edua na icabocabo ni soro ka cabora edua na isoro, ka vakavinavinaka vua na Turaga.”

E vakavulica vei keda na iVola Tabu kei na iVola i Momani meda sokalou vua na Luve ni Kalou ena icabocabo ni soro. Ena vuku ni cava?

O rau na imatai ni noda itubutubu, o Atama kei Ivi, rau a tara ka sokalou ena icabocabo ni soro. Ni oti nodrau vakasevi tani mai na Were o Iteni ka sokalou ena “vuqa na siga,” a siko yani edua na agilosi ka taroga edua na taro bibi e rawa ni tarogi tale ga vei keda yadua: “A cava ko sa vakacaboi soro kina vua na Turaga?”

A sauma o Atama, “Au sa sega ni kila.”

E sauma na agilosi kina vakatutusa malumu nei Atama e vakasakiti: “Na ka oqo sa ivakatautauvata ni nona vakacabori Koya na Le Duabau Ga nei Tamada. O koya, mo dau kitaka kina na veika kecega ko vakayacora ena yaca ni Luvena, ia mo veivutuni ka masuta tikoga na Kalou ena yaca ni Luvena me tawamudu.”

Na teveli ni sakaramede kei na icabocabo ni soro ni valetabu e vakatakarakarataka na solibula i Jisu Karisito kei na Nona Veisorovaki tawa yalani.

Nida cakava ka rokova na noda veiyalayalati, ciqoma na cakacaka tabu ni sakaramede e valenilotu kei na edaumeni kei na veivauci e valetabu, eda vauci keda vua na iVakabula, ka na vakarawarawataki na noda rawata na Nona loloma soliwale, veitaqomaki, veivakasavasavataki, veivakabulai, kei na vakacegu.

Loloma Soliwale kei na Taqomaki ena Veiyalayalati

Niu se cauravou yabaki-15, au nanuma na noqu a tarogi tamaqu seu rawa meu kua ni tiko ena soqoni ni sakaramede—me dua ga na Sigatabu ena Janueri me baleta edua na qito digitaki ni veicaqe polo vakaAmerika. A kaya o koya niu sa qasecake meu cakava na digidigi vakai au ka kerei au meu vakasamataka edua na tiki ni ivakasala. A kaya, “Kevaka o digitaka mo calata na sakaramede vakadua ga, ena rawarawa mo digitaka mo calata tale edua.”

Kevaka e dauniveisemati na iVakakabula, ia na meca e dau ni veitawasei. O Setani e temaki keda meda tawasei keda mai na noda veivanua ni sokalou tabu kei na veitaqomaki i Jisu Karisito. Nida sokalou vua na iVakabula, eda ciqoma na “kaukauwa meda vorata kina na idre ni vuravura sa matau tu.” Nida taura na gauna meda veitalanoa vata kei Koya, E noda na vosa ni yalayala meda na “sereki mai vei Setani.” “Ia, nida maroroya na noda veiyalayalati, ena solia vei keda o Koya na Nona kaukauwa veivaqaqacotaki.” Io, au dau vakamareqeta na gauna ni veitalanoa vata kei na iVakabula ena veiyalayalati ka vakayacori ena icabocabo ni soro tabu.

Na tarai cake ni kilaka me baleta na Veisorovaki tawayalani ni iVakabula ena vosa ena vosa, na ivunau ena ivunau, e solia edua na isasabai vakayalo mai na lawaki ni meca. Na cauravou o Elder Jaggi e Mekisiko, Zuster Jaggi e Belgium, kei ira tale na daukaulotu e veiyasai vuravura era rawa ni raica mera rawata na nodra itokani na veivakalougatataki ni papitaiso ka ciqoma na isolisoli ni Yalo Tabu kevaka era tiko na nodra itokani ena sakaramede ena loma ni imatai ni macawa.

Edua na itabagone qasecake e Tonga se Samoa e rawarawa cake me rau na vauci ena vale ni Turaga kevaka erau vakavakarau ka ciqoma na nodrau edaumeni ni oti ga nodrau taurivola mai koronivuli. Ena edaumeni, era sureti na lewenilotu mera bulataka, talairawarawa, ka maroroya na lima na lawa ka solia na kaukauwa kei na veitaqomaki. Nida cakava na veiyalayalati vata kei na Turaga, e buli kina edua na veiwekani yaga ena yasana ruarua. Eda vakaraitaka na noda yalodina kei na loloma vei Koya. Na noda igu kei na kaukauwa ena tubu vata kei na yalayala yadua eda cakava ka maroroya.

Railesu kei na Vakasavasavataki

Nida tekiduru ena yalomalumalumu ena icabocabo ni soro ni Turaga, oya edua na gauna ni railesu, “raica eda sa tarova na [noda] dokadoka, ka vakayalomalumalumutaki [keda] vua na Kalou.” Ni bera niu lako vata kei ira noqu itokani itabagone, e tukuna vakawasoma o tinaqu, “Nanuma se o cei o iko, ka yalovinaka dau mai tukuna nio sa yaco mai i vale.” So na bogi au dau calata-meu vakaraitaka niu sa yaco mai i vale baleta niu dau yaco bera mai. Au veivutuni niu dau calata na veigauna bibi oya ni veitalanoa vata kei Na.

Edai au nanamaki kina veitalanoa vata kei Tamada Vakalomalagi. Niu tekiduru ena masu, e yasa ni noqu idavodavo se vata kei na vuvale, au raitayaloyalotaki au niu tekiduru tiko ena icabocabo ni soro, railesuva ka vakadikeva tiko na noqu bula. Au vakasamataka na sakaramede, na tiki ni madrai lelevu, a dovi ka votai ena vukuda, ka ivakatakarakara ni yago ni Noda Dauniveivueti ka vakamavoataki. Au nanuma na ivakavuvuli nei Peresitedi Dallin H. Oaks ni “veitiki ni madrai yadua e duidui, ka sa duidui vakakina na tamata yadua era vakayagataka.” Niu tekiduru ena masu, au vakananuma na sala au rawa ni cabora kina vua na Kalou na noqu lewa.

A vakatavulica o Elder David A. Bednar “Na cakacaka vakalotu ni sakaramede e dua na veisureti tabu ka caka vakawasoma meda veivutuni vakaidina ka vakavoui vakayalo. Na noda kania na sakaramede, vakai koya ga, e sega ni bokoca na ivalavala ca. Ia ni vakavakarau na lomada ka vakaitavi ena cakacaka tabu vakalotu oqo ena yalo raramusumusu kei na yalo lokumi, ena yaco na yalayala me tiko ga kina kei keda na Yalo ni Turaga. Ena vuku ni kaukauwa veivakasavasavataki ni Yalo Tabu me noda itokani wasoma, ena rawa tiko ga meda rawata na bokoci ni noda ivalavala ca.”

Ena gauna keirau dikeva vakavoleka kina na neirau bula kei Amy, keirau marautaka na isolisoli ni loloma uasivi kei na solibula i Jisu Karisito. Keirau raica tale ga ni sereki na cudru nei Setani. E rawa vakacava meda uabaleta na vakalelewa, lomabibi, kenisa, mate ni suka, veivakacacani ena initaneti, butakoci ni ivakatakilakila, vakalutu, nona mate edua na gone, dua na tacida, kei na dua na tama? Baleta a gunuva o Jisu na bilo wiwi ni rarawa, na bilo ni cudru katakata—ena vukuqu, noqu matavuvale, ena vukuda kece!

Na “bilo wiwi” a gunuva o Koya ena Were o Kecisemani kei na “vakalevutaki” ni Nona rarawa ena kauveilatai e Kalivari e vakatarai keda meda kerea ena icabocabo ni soro na vakabulai mai na dredre; mai na sega ni veidokai, ivalavala kaukauwa, se cudru; mai na veika e rarawa kina edua ka “vakatabui ena ciqomi ni Yalo Tabu,” e veigauna kecega.

O Sisita Patricia Holland a kaya, “Noqu masu titobu baleti iko kei au edaidai, oya me daru na soli kedaru taucoko, cabori kedaru ena icabocabo ni soro ni veivosa ni yalayala kei na vakacegu ni Kalou se mani vakacava na vanua eda tiko kina kei na veika eda sa cakava oti.”

E Dua na Vanua ni Veivakabulai kei na Vakacegu

Nida yaco mai kina icabocabo ni soro, eda sega ni mai taura edua na icocovi; eda mai vulica na veika me baleti koya ka Solia na iLoloma. Ena vuli kei na veivauci kina veiyalayalati oya, e yaco kina na veivakabulai. O Nifai a kaya, “Sa vakasinaiti au ena nona loloma, ka sa caucaudre tu e yagoqu taucoko.” E sureti keda na noda iVakabula dauloloma, “Ko ni na sega li ni lesu mai vei au, ka veivutunitaka na nomuni ivalavala ca, ka saumaki mai, me’u vakabulai kemuni?”

Ni rau se ka lalai, na luvei keirau yalewa, Mackenzie kei Emma, edua na nodrau italanoa talei na The Chronicles of Narnia: The Lion, the Witch and the Wardrobe. Keitou taleitaka na laione levu, Aslan. Edua na bogi guiguilecavi dredre ni wili ivola, oya na gauna a solia kina na nona bula na laione levu ena vuku i Edmund. E guiguilecavi dredre baleta ni keitou a tagi na veiluveni ena nona vakamatei na laione ena Teveli Vatu mai vua na Buinigone Vulavula Ca. Guiguilecavi dredre baleta nia gumatua na inuinui, dina ga nia yaco na leqa, me yacova ni yaco na ka vakasakiti. A rogo na kaila ni reki ena rumu ni moce lailai oya nia tucake tale o Aslan ka kaya, “Kevaka a kila na Buinigone ca na ibalebale dina ni solibula, ena kila ni kevaka edua na tamata vinaka e lomasoli me mate ena vukuna edua na tamata ca, na Teveli Vatu ena kaca, ka na suka lesu o mate.”

O Jisu Karisito e vakabula na mavoa kece. O Jisu Karisito e vakavuna meda rawa ni bula tale.

Ena nona vosa ena koniferedi raraba ni Okotova 2022, a talanoataka kina o Peresitedi Russell M. Nelson edua na ilawalawa era sarasara ena na dola raraba ni valetabu. A tiko kina edua na cauravou gone. E vakavulica o Peresitedi Nelson:

“Ni ratou curu yani kina rumu ni edaumeni na sarasara tiko, e dusia sara na gonetagane na icabocabo ni soro, na vanua era dau tekiduru kina na tamata me veiyalayalati kei na Kalou, ka kaya, “O, sa totoka dina o ya. Oqo edua na vanua mera vakacegu kina na tamata ena nodra ilakolako e valetabu.”

“E sega beka ni kila o koya na nodrau semati vakadodonu na caka veiyalayalati vata kei na Kalou e valetabu kei na yalayala veivakurabuitaki ni iVakabula mo:

“‘Dou lako mai vei au, koi kemudou vakayadua ga sa oca, ka colata na icolacola bibi, ia au na vakacegui kemudou.

“Vakataqara vei kemudou na noqu ivua, ka vuli vei au; ka dou na kunea kina na vakacegu ni yalomudou.

“‘Ni sa rawarawa na noqu ivua, ka mamada’ na noqu icolacola’ [Maciu 11:28–30; vakabibitaki].”

“Sa sega na vanua me vakotora kina na uluna na Luve ni Tamata,” ia a sureti ira na Nona tisaipeli kina teveli ni sakaramede me vakacegu e kea vata kei Koya. Nira “tekiduru ena icabocabo ni soro na yalomalumalumu,” era na sinai ena vakacegu. Na liga ni iVakabula sa dodo tu; na Nona teveli sa Vakarau tu. Mai sokalou vua na Luve ni Kalou ena Nona icabocabo ni soro tabu. Ena yacai Jisu Karisito, emeni.