Vakaisulutaki vata na iTovo Savasava ni Yalomatua

Ena Me 2021, niu sikova tiko na cakacaka ni vakavinakataki ni Valetabu e Salt Lake, o Peresitedi Russell M. Nelson e qoroya na nodra sasaga na painia ni, yalani tu na iyau kei na vakabauta sega ni yavalati, era tara na vale tabu, cakacaka vakasakiti vakayago ka vakayalo ka donua na veigauna dredre. Ia, e raica talega okoya na mawe ni sisi ni qele, ka ena dede ni gauna e vakavuna malaqa na vatutuvai taumada ni valetabu kei na yavavala ni vatu, sa ivakatakilakila ni sa gadrevi me vakaukauwataki.

Na noda parofita lomani vakatavulici keda me vaka ni gadrevi me vakayacori e dua na cakacaka levu me vakaukauwataka na yavu ni valetabu me rawa ni vorata na cakacaka ni veika bula, e gadrevi talega meda taura eso na ivakarau bibi—e dina eso beka na ivakarau eda sega ni se taura taumada—me vakaukauwataka na noda yavu vakayalo vei Jisu Karisito. E biuta tiko okoya vei keda e rua na taro bibi meda vakasamataka: “E vakacava beka na tudei ni nomu yavu?” Kei na vakaukauwataki cava ni nomu ivakadinadina kei na kila vinaka na kosipeli sa gadrevi tiko?”

E vakarautaka vei keda na kosipeli i Jisu Karisito na veivakauqeti vakayalo vata kei na sala vinaka duadua me tarova na sisi vakayalo ni yaloda, e vaqaqacotaka na noda yavu ka vukei keda me kua ni lalaqa na noda vakabauta kei na yavavala ni noda ivakadinadina kei na noda kila me baleta na veidina tabu ni kosipeli. E dua na ivakavuvuli e sala vata ni kena rawati na inaki oqo e kune ena wase 12 ni Vunau kei na Veiyalayalati, dua na ivakatakila e soli vei Josefa Simici na Parofita vei Josefa Naiti, na tamata yalododonu ka vakasaqara vakaidina me kila na lewa ni Turaga, sega ga ni baleta na veisau e tuba, ia me tudei ena bula vakatisaipeli—tudei me vaka na duru mai lomalagi. Sa kaya na Turaga:

Raica, au sa tukuna vei iko, ka vakakina vei ira kece era gadreva me duri ka yavutaki na cakacaka oqo;

“Ia ena sega ni dua e rawa ni veivuke ena cakacaka oqo vakavo ga kevaka e sa yalomalumalumu ka sinai ena loloma, ka tu vua na vakabauta, na inuinui kei na loloma uasivi; io na yalomatua ena ka kecega, se na cava ga e nuitaki vua.”

Na veidusimaki ni iVakabula, e volai ena ivakatakilakila tabu oqo, e vakananumi keda ni yalomatua e dua na veivaqaqacotaki bibi ni yavu tudei i Jisu Karisito. E dua vei ira na itovo savasava gadrevi, sega ga ni vei ira era kacivi me veiqaravi ia vei ira kece era cakava na veiyalayalati tabu vata kei na Turaga ka duavata me muri Koya ena yalodina. Na yalomatua e vakaduavatataka ka vakaukauwataka na vei ivakarau Vakarisito e tukuni tiko ena ivakatakila oqo: yalomalumalumu, vakabauta, inuinui, loloma uasivi, kei na loloma savasava e drodro mai vei Koya. Me kena ikuri, na bucini ni yalomatua e dua na sala e vakaibalebale dina me taqomaka na yaloda mai na sisi vakayalo e malua ia e tomani tiko mai na idre ni vuravura ka rawa ni vakamalumalumutaka na noda yavu vei Jisu Karisito.

Vei ira kece na itovo ka vakaisulutaka na tisaipeli dina ni Karisito, na yalomatua e tu tani me ivakaraitaki ni iVakabula vakai Koya, e dua na vua talei ni Yalo, ka soli tu vei ira kece era dolavi ira ki na veivakayarayarataki vakayalo. E itovo savasava ka kauta mai na duavata kina lomada, ka tuvana na gagadre kei na lomada ena vuku kei na yalomalua. Ena volanikalou, na yalomatua e vakarautaki me dua na tiki bibi ni toso ki noda ilakolako vakayalo, e muataki keda kina yalovosota, ivakarau vakalou, kei na yalololoma ena gauna vata e vakavinakataka na lomada, noda vosa, kei na noda cakacaka.

Na tisaipeli ni Karisito e sasaga me bucina na itovo Vakarisito era sa qai yalomalua tikoga ka sinai ena loloma. E dua na kaukauwa malua e tubu mai vei ira, ka sa rawa vei ira mera tarova na cudru, bucina na yalomalua, ka raici ira tale eso ena dau vosota, veirokovi, kei na rakorako, ena gauna madaga e kaukauwa kina na cagi ni veivakatovolei. Era saga mera kua ni veibeci ia me digitaka ga mera kitaka ena vuku vakayalo, dusimaki ena yalomalua kei na veivakayarayarataki malumu ni Yalo Tabu. Ena sala oqo, sa lailai na nodra ririkotaka ni sisi vakayalo baleta, me vaka e vakavulica na Apositolo Paula, era kila ni ra sa rawata na ka kecega ena vukui Karisito, o koya sa vakaukauwataki ira ena dela ni veivakatovolei ka rawa ni kurea na nodra ivakadinadina baleti Koya.

Ena ivola vei Taitusi, e solia o Paula na ivakasala tabu me baleti ira era gadreva me matataka na iVakabula ka cavaka na Nona lewa vata kei na vakabauta kei na yalodina. E tukuna okoya ni dodonu mera dauveivakacegui, dauloloma, yalododonu, kei na yalosavasava—e itovo e vakaraitaka vakamatata na veivakayarayarataki ni yalomatua.

Ia, e vakarota vei ira o Paula ni dodonu mera kakua ni domoqa, me kakua ni daucudrucudru, [kei na] me kakua ni dauveiba.” Na veituvaki vakaoqo e veibasai ki na vakasama ni iVakabula ka tarova na noda tubu vakayalo. Ena ivolanikalou, “kakua ni domoqa” e dua e sega ni via qaciqacia kei na dokadoka; “kakua ni daucudrucudru” sai dua e saga me levea na gagadre vakayago me kua ni dauvosota kei na vakatubu rarawa; kei na “kakua ni veiba” e dusi dua e besetaka na veivala, veivakacacani, kei na itovo kaukauwa mai na gusu, vakayago kei na lomana. Nida saga meda veisautaka na noda itovo ena vakabauta kei na yalomalumalumu, eda sa qai kele dei kina vatu dina ni Nona loloma soliwale ka mai savasava ka iyaya savai ena Ligana tabu.

Ni vakaraici na gagadre me bucini na itovo savasava ni yalomatua, au dau vakananuma na vosa nei Ana, na tinana na parofita o Samuela—e dua na marama dauvakabauta ka, ni oti na veivakatovolei dredre, ea solia e dua na sere ni vakavinavinaka vua na Turaga. E kaya okoya, “Dou kakua ni vakalevutaka na vosa viaviaturaga: me kakua ni lako mai na gusumudou na vosalevu: ni sa Kalou daukila ka ko Jiova, a sa lewa se sa vakaevei na nodrai valavala.” Na nona sere e sivia na masu—e veisureti vei koya me dau yalomalumalumu, bula vakaivakarau, ka vakarauta ga. E vakananumi keda kina o Ana na kaukauwa dina vakayalo e sega ni vakaraitaki ena ivukivuki sabalia se na vosa veibeci, ia ena lewa matau, ivakarau maqosa e salavata kei na vuku ni Turaga.

Me vakavuqa, na vuravura e dau vakacerecereya na itovo e sucu mai na veivakacacani, veibeci, yalotolotolo, kei na vakalevulevuya, ka vagauna edau vakadonui na ivakarau oqori baleta na dredre ni bula ni veisiga kei na muataki ki na veivakadonui kei na rogorogo. Nida moica na noda rai mai na itovo savasava ni yalomatua ka vakawalena na veivakayarayarataki malumu ni Yalo Tabu ena noda vosavosa kei na ivalavala, eda sikalutu rawarawa ki na icori ni meca, ka vakavuna meda tukuna na vosa ka tomika na itovo eda na veivutunitaka, ena noda veitokani, matavuvale, se veiwekani vakalotu. Na kosipeli ni Jisu Karisito e sureti keda meda cakacakataka na itovo savasava oqo ena gauna edau veibolei, baleta ena gauna oqori edau vakaraitaki kina na ivakarau dina ni dua na tamata. Me vaka e tukuna edua na gauna o Martin Luther King Jr, “Na tiki levu veidua na tamata e sega ni vanua e tu kina ni gauna ni logavinaka se vakarautaki, ia ena vanua e tu kina ena gauna ni ibolebole kei na duiduile.”

Nida tamata ni veiyalayalati, eda sa kacivi meda bula vata kei na lomada e yavutaki ena iyalayala tabu eda sa cakava vua na Turaga, vakamuria vakavinaka na ituvatuva e sa tauyavutaka o Koya ena Nona ivakaraitaki uasivi. Me kena isau, e sa yalataka o Koya, “E dina, e dina, au sa kaya vei kemudou, ni oqo na noqu ivakavuvuli, ko ira yadua sa tara na nodra vale ena yavu oqo sa tara cake ena dela ni noqu vatu, ia ena sega ni rawati ira na matamata kei eli.”

Na kaulotu ni iVakabula e vuravura ea kilaitani ena itovo savasava ni yalomatua ena taucoko ni Nona ivakarau dei. Mai na Nona ivakaraitaki uasivi, e vakavulici keda oKoya “mo vosota sara na veika rarawa, io mo kakua ni vosa vakacacataki ira era sa vosa vakacacani iko.” Me vaka ni vakavulica oKoya meda kakua ni vakacudrui rawarawa baleta na veiba kei na veileti, e vakarota oKoya: “Mo ni veivutuni ka yaco me vaka na gonelailai.” E vakavulica talega o Koya vei ira kece era gadreva mera lako mai vei Koya ena lomadra taucoko ka sa dodonu mera duavata kei ira era cudruva se vei ira era veisaqasaqa. Na ivakarau ni bula kei na yalo dauloloma, e vakadeitaka vei keda o Koya ni gauna eda sotava kina na voravora, yaloca, viavialevu, se sega ni kauwaitaki, na Nona yalovinaka ena sega ni takali mai vei keda, kei na veiyalayalati ni Nona vakacegu ena sega ni kautani mai na noda bula.

Ena vica na yabaki sa oti, a neirau na madigi tabu o watiqu kei au me sotavi eso na lewe ni Lotu yalododonu e Mexico City. E levu vei ira, yadua se mai vei ira na nodra daulomani, sa vosota na veivakatovolei sega ni vakamacalataki rawa, oka kina batikadi, laba, kei na veileqa vakamosiyalo tale eso.

Ni keirau vakaraica na matadra na Yalododonu, keirau sega ni raica na cudru, veicati, se e dua na gagadre me sauma lesu. Mei sosomi, keirau raica e dua na yaloraramusumusu. Na kedra irairai, e kilaitani ena vutugu, e serauna edua na gagadre dina me vakabulai kei na logavinaka. Dina ga ni ramusu tu na lomadra ena veivakararawataki, era toso tiko ki liu na Yalododonu oqo ena vakabauti Jisu Karisito, era digitaka me kua ni vakaleqa na nodra vakabauta na veidredre era sotava se vakavuna me sega ni dei ena nodra ivakadinadina ni kosipeli.

Ena itinitini ni soqoni tabu oya, keirau sotavi ira yadua. Ena veilululu kece, vei mokomoko kece, sa mai dua na ivakadinadina malua ni veivukei ni Turaga, sa rawa vei keda meda digitaka meda sauma ena yalomatua na veivakalaboci kei na vei bolebole ni bula. Na nodra ivakaraitaki malua e vakarautaka e dua na veisureti malumu meda taubale ena sala ni iVakabula ena yalomatua ni veika kecega. Keirau vakila ni keirau a tiko ena tikotiko ni agilosi.

O Jisu Karisito, ko koya sa kaukauwa sara, e vakararawataki ena vukuda me yacova ni sa titiri na dra mai na qara kece ni yagona, ia e sega ni vakatara na cudru me vakatakatara na Lomana, vakatalega kina na veivakacacani, vosa e veilauti, se vosaca e lutu mai Gusuna, e loma ni veivakatovolei oya. Ena yalomatua cecere kei na yaloraramusumusu sega ni veisotari, e sega ni vakasamataki Koya vakai Koya ia o ira yadua na luve ni Kalou—mai liu, nikua kei na veigauna mai muri. Na Apositolo o Pita ea vakadinata nai vakarau ni bula ni Karisito ena Nona vakatakila: “Ni sa vakasewasewani ko koya, sa sega tale ni ia na veivakasewasewani; ni sa vakararawataki tiko sa sega ni vosavakacudrucudru; sa laivi koya ga vua sa lewa vakadodonu.” E dina ena loma ni Nona rarawa levu, e vakaraitaka na iVakabula ena yalomatua cecere ka vakalou. E vakarota o Koya, “Ia me vakalagilagi ga ko Tamaqu, au sa gunuva na bilo ka vakacavara na noqu vakavakarau vei ira na luve ni tamata.”

Kemuni na taciqu kei na ganequ lomani, au veisureti ena yalodina vei kemuni meda vakaisulutaka na noda vakasama kei na lomada ena itovo savasava Vakarisito ni yalomatua, me isau tabu kina nona kaci vakaparofita nei Peresitedi lomani Russell M. Nelson. Nida sasaga ena vakabauta kei na gugumatua me tali na yalomatua kina noda cakacaka kei na vosavosa, au vakadinata ni na vakaukauwataka ka vakelea na noda bula kina yavu dei ni noda Dauveivueti.

Au wasea na noqu ivakadinadina bibi ni kena sasagataki e veigauna na yalomatua e vakasavasavataka na vuniyaloda ka vakatabuya na lomada e mata ni iVakabula, ka dreti keda vakavoleka vei Koya ka vakarautaki keda, vata na inuinui kei na vakacegu, ena siga lagilagi oya nida sa na sotavi Koya ena iKarua ni Nona Lesu Mai. Au wasea na vosa tabu oqo ena yaca ni noda iVakabula ko Jisu Karisito, emeni.