Mera Nanumi na Sipi

Na iVakatawa Vinaka o Karisito. E ka talei Vua na lewe ni qelenisipi yadua. A vakaraitaka o Koya na ivakarau ni vakatawa ka vakavulici keda ena vosa kei na ivalavala ni ivakarau ni dua na ivakatawa vinaka, oka kina na nomu kilai ira na nomu sipi ena yacadra, lomani ira, vaqarai ira era sa yali, vakani ira, ka, kena itinitini, muataki ira lesu tale ivale. E namaki keda o Koya meda vakayacora vakakina me vaka eda lesi me Nona ivakatawa.

Eda rawa ni vulica vakalevu me baleta na veiqaravi ena sala ni Turaga mai vua na parofita makawa—ka ivakatawa vakasakiti—o Moronai. A bula o koya ena gauna dredre sara, ni se sega tu kina na talefoni veikauyaki, kompiuta, kei na initaneti. Ia e rawa vua me qaravi ira na sipi. E cakava vakacava beka? Eda raica vakalekaleka na nona iwalewale ena Moronai 6. Eda wilika e kea nio ira na lewenilotu “era wili me lewe ni lotu i Karisito; volai na yacadra, mera daunanumi ka vakani ena vosa vinaka ni Kalou, mera tiko ga kina ena sala dodonu. “Era dau soqoni vata wasoma na lewe ni lotu, mera lolo ka masu, ka veivosakitaka baleta na tiko vinaka ni yalodra.” (Moronai 6:4–5; emphasis added).

O Moronai, e baleta kecega na tamata—na yacadra! A cakacakataka o koya na ivakavuvuli ni nodra “wili ka volai” me rawa nira daunanumi tiko ga. Era laurai oira era sotava na dredre se lakosese, mera veivosakitaka matabose na nodra tiko vinaka na Yalododonu. Me vaka na ivakatawa ka biuta tu na ciwasagavulu ka ciwa (taqomaki ka maroroi tu, au kila) ka lakova na dua ka a yali (raica na Luke 15:4–7), eda sa kerei meda qarauna talega na noda qelenisipi—meda raica ka daunanuma ka laki cakava vakakina.

Niu liuliu tiko ni kaulotu mai Idia, au nanuma na noqu a taroga e dua na peresitedi gone ni tabana me baleta nona lalawa ni yabaki vou: “E vica beka na turaga ona vakarautaki ira mera ciqoma na matabete i Melikiseteki?” E sauma mai vakatotolo e “Vitu!”

Au vakasamataka se vei na vanua e taura mai kina o koya na naba oya! Ni bera niu sauma yani, a vakaraitaka mai o koya e dua na tiki ni pepa era volai tu kina na naba dua kina vitu. Na imatai ni lima na laini a volai tu kina na yaca—ni tamata dina e ratou na sureta kei na nona kuoramu ni italatala qase ka vakauqeti ira mera ciqoma na veivakalougatataki ni matabete ena nodra bula. E dina, au taroga me baleta na laini ono kei na vitu ka se lala tu. “Oi, Peresitedi,”a kaya, ni kuretaka na uluna ena loloma, “keitou na papitaisotaka vakaidina e rua na tagane ke lailai ena itekivu ni yabaki ena rawa ni rau ciqoma na matabete ena mua ni yabaki.” Na iliuliu vakasakiti oqo a kila vinaka tu na ivakavuvuli ni wiliwili kei na volai.

E tauyavutaka o Karisito na Nona Lotu ena sala e rawa ni dredre kina me guilecavi e dua na yalo, ni oira yadua era bibi Vua. Na tamata yadua ena dua na tabanalevu, veitalia nona yabaki se tagane/yalewa, e vuqa tu na nona dauveiqaravi—ivakatawa—ra lesi me qaravi ira, ena veinanumi. Dua na ivakaraitaki, e dua na cauravou, na nona tiko vinaka e lesi vua na matabisopi, dauveiqaravi turaga, daunivakasala ni itabagone, qasenivuli ni semineri, mataveiliutaki ni kuoramu, kei na so tale—era veiqaravi kece me vaka na lawa ni tataqomaki, sa biriki dei tu e ruku ni itabagone oya me ciqomi koya ke lutu. Kevaka ena biriki vinaka na lawa, na cauravou oya ena taqomaki, raici, ka daunanumi tu. Ia, vakavuqa eda sega ni kunea nibiri tu na lawa. Era lakosese yani na tamata kina kabu—ka sega ni dua e kila. Ena rawa beka vakacava meda ivakatawa vinaka cake? Eda rawa ni vuli meda dau wilika ka vola.

Na Lotu e vakarautaka vei keda na ripote kei na iyaya ni cakacaka eso me qaravi kinai—meda daunanuma kina. Na Ripote Vakavulatolu e dua na kena ivakaraitaki bibi. E vakatara meda wilika ka volai ira yadua na lewenilotuka meda raici ira era sa yali se gadreva tu noda veivuke kei na loloma. Na lisi ni Veika me Caka kei na Veivakatarogi e dau vakatakilai ira era gadreva sara ga na noda veivuke, me vaka ga na ripote ni iTuvaki ni iVolatara ni Valetabu kei na so tale. Na iyaya ni cakacaka oqo ni wiliki kei na volai e vagolei keda meda vakanamata yani kina tamata. O cei beka e gadreva na veikacivi, e dua na veitabaki ni matabete se veivuke me kauta e dua na yaca ni matavuvale kina valetabu? O cei beka eda rawa ni vukea me vakavakarau kina kaulotu-tudei? O cei beka e yali tiko ena vula oqo? Na iyaya ni cakacaka oqo e vukei keda meda daunanumi ira na tamata.

Au kila e dua na matavuvale mai Amerika e taura e dua na ilesilesi i Aferika. Ena imatai ni nodratou Sigatabu, eratou taubale kina Valenilotu duadua ga ena vanua oya, ka ratou kidavaki mai ena marau. Ni cava na mataka oya, e kacivi na wati turaga oya me peresitedi ni Soqosoqo ni Veivukei ka kacivi o koya me iiuliu ni Cauravou! A taroga o koya vua na peresitedi ni tabana oya na kedra iwliliwili na cauravou e kea. Na iliuliu yalodina, se qai kacivi vakadua e dusi imuri ena olo ni sakaramede ka kaya, “O rau sara ga na rua oya.” E vakatitiqa na turaga oqo, a mani kauta ivale na ivolaniyaca ni tabana, ka mani raica kina nira le 20 na cauravou ena lisi oya. E lesu vua na peresitedi ni tabana ka kerea me rua na itabagone qasecake momoqaqa, kila e rua na vosa me veiqaravi vaka daunivakasala ka qai dabe vata kei rau na cauravou me ratou railesuva na veiyaca kece.

E ratou gole ka lai veiqaravi na cauravou yalodina oqo. Ena loma ni vica na vula, ratou kunei ira kece na gonetagane. Na veiyaca yadua, oira na sipi era yali tu era kidavaki mai vei ira na nodra itokani ka vakani vakayalo ka vakayago! Ena loma ni dua na yabaki, ena dua ga na Sigatabu, e rauta ni 21 na cauravou era tiko rawa. Vinaka vakalevu vei ira na cauravou era wilika ka vola.

E dua noqu itokani lomani, ni se gonevuli, a toki kei na nona matavuvale kina dua na siti levu e Amerika me laki tomana kina nona vuli. A kacivi sara me dabe vakatulewa ena kuoramu ni italatala qase. E ririko vakalailai me baleta na imatai ni nona veivakatarogi kei na peresitedi ni iteki, a nuidei nona vakavakarau me lako. A tukuna vei peresitedi ni iteki ni tolu na nona takete me baleta na yabaki tarava: (1) 90 na pasede na veiqaravi, (2) dua na lesoni ni kosipeli vakaibalebale ena veimacawa, kei na (3) dua na itaviqaravi tuvani-vakamatau ni kuoramu ena veivula.

E matadredredre vua na noqu itokani, a taroga yani na peresitedi ni iteki vuku oqo, “E rawa beka nio tukuna mai na yaca ni dua na lewe ni kuoramu luluqa o rawa ni vukea me lako kina valetabu kei na nona matavuvale ena yabaki qo?” E kurabui o noqu itokani. A vakasama vinaka o koya ka qai cavuta yani e dua na yaca. “Vola sara oqori,” tukuna o peresitedi ni iteki. Oti e qai taroga tale vakatolu—na iliuliu oqo ka sa mai cava na veivakatarogi. A gole tani na cauravou oqo mai na veivakatarogi oya ena nona vulica e dua na lesoni levu duadua ni veiliutaki kei na veiqaravi. A gole ena veivakatarogi vata kei na parokaramu, lesoni, kei na itaviqaravi. A qai lesu mai vata kei na yaca eso! Na yaca e va oya a qai yaco me tiki bibi ni nona veiqaravi ka vakakina nona kuoramu.

Niu se iliuliu ni kaulotu, au sikova e dua vei ira tabana ena dua na mataka ni Sigatabu. Au raica nio peresitedi ni tabana taura tiko mai e dua na pepa mai na nona taga ka volavola tiko kina. Au nanuma meu tarogi koya ni oti na masu ni suka. Ia ni oti ga na soqoni, ni bera niu taroga yani me baleta na pepa, e vakusakusa na iliuliu ni kaulotu ni tabana kina tevale, ka lai soli vua na pepa. Au muri koya yani na iliuliu vinaka oqo kina nona bose ni veivakacokotaki vakamacawa ni daukaulotu. Ni bera ni ratou tekivu, a taura mai na pepa mai na nona taga. A sinai tu ena yacadra na lewenilotu era yali tiko mai na soqoni ni sakaramede. Ena loma ga ni vica na miniti, era digitaka yadua na lewe ni matabose e dua se rua na yaca, ka yalataka me sikovi ira ena siga oya me raica nodra tiko VINAKA ka mera kila nira nanumi vakalevu. Sa ikoya oqori na wiliki ka volai.

Au nanuma edua na tikina, e vica toka na auwa ena waqavuka mai na valetabu voleka duadua, e vakabibitaki na kena vakadeitaki na ivolatara, dina ga ni sega beka ni na vakayagataki vakadua. Ena imatai ni Sigatabu ni veivula, era vakayagataka na iliuliu na nodra iyaya ni wiliwili mera volai kina na lewenilotu vaka edaumeni. Kevaka era raica ni voleka ni cava e dua na ivolatara, ena tuvana na sekiriteri liu na veivakatarogi ni kena vakavoui. Era vakasalataki ni sa oti na kaukauwa ni nodra ivolatara, era vakasaqarai ka vukei mera lesu kina salatu ni veiyalayalati. Au taroga se vica vei ira nodra lewenilotu vaka edaumeni e bula tu nodra ivolatara. E kena isau e veivakurabuitaki e 98.6 na pasede. Ni tarogi me baleti iratou na ono sa mai cava nodratou ivolatara, e rawa ni vakatakilai ratou na iliuliu ena yacadratou ka vakamacalataka vei au na sasaga eso sa caka tiko me kauti irau lesu mai!

Ena vica na yabaki sa oti, e toki lesu na noqu matavuvale i Amerika. Keitou marautaka na lai Lotu ni oti e 26 na yabaki ena vei tabanilotu lalai, e veiyawaki na tabananilotu. Au kacivi vaka dua na daukaulotu ni tabanalevu. E totoka vakaoti na neitou iliuliu ni kaulotu ni tabanalevu ka keitou cakava e vuqa na veika vinaka ka vakavulici ira na tamata totoka. Au kerea meu tiko ena dua na bose ni matabose ni tabanalevu meu vakaraica ka rawata kina nodra veivuke na itokani keitou a cakacaka vata tiko. Au kurabui ni veika ga a veivosakitaki sa ikoya e dua na itaviqaravi ni tabanalevu a roro tiko mai. Au raici iliuliu ni kaulotu ni tabanalevu ka vakaraitaka ni sega ni dua nona madigi me lesu ka ripotetaka me baleti ira na tamata. Nona isaunitaro? “Oi, au sega vakadua ni dau ripote.”

Au vakatauvatana vata kei na bose ni matabose ni tabana mai Lahore, Pakistan, au tiko kina ena vica ga na macawa sa oti. Na ilawalawa lailai oqo a dabe vata wavokita e dua na teveli lailai, era veivosakitaka na ka kecega e baleta na tamata. Na yaca eso. Era ripotetaka yadua na iliuliu na nodra veiliutaki kei na tamata yadua kei na matavuvale era kauwaitaka. A soli kece vei ira na gauna mera solia nodra nanuma ena sala vinaka me rawa nira vakalougatataki ira kina o ira era veivosakitaki tiko. Tuvani na ituvatuva ka lesi na itavi. E dua dina na lesoni vakasakiti ena wiliki kei na volai ni yaca mai vei ira na tacida kei na ganeda ni iliuliu vou.

Ena Lotu i Jisu Karisito, eda dusimaki ena sala meda veiqaravi kina, mai vei ira na parofita e liu kei na parofita edaidai, kei na ivakarau a vakaraitaka na noda iVakabula—ni veiqaravi dina. Eda vola na yaca, meda daunanuma, eda veivakasalataki me baleta na tiko vinaka ni yaloda. O ira na iliuliu era cakava oqo ena sega vakadua ni oti rawa na veika era veivosakitaka ena nodra bose ni matabose! Na ivakavuvuli ni wiliki ka volai e cakacaka dina. Sa ikoya na sala ni Turaga. Eda rawa ni cakava vakavinaka cake. Kivua na Kalou, o Koya a bulia na vuravura ka vakatulewataka kece sara, na cakacaka oqo—Nona cakacaka kei na lagilagi—e sa nona sara ga. Ia e dodonu me vakakina vei keda, vaka iyaya ni cakacaka e Ligana ena Nona cakacaka ni veivakabulai kei na bula vakacerecerei. Ena yaco dina kina na cakamana ena nodra bula na tamata. Ena yacai Jisu Karisito, emeni.