Meda Dau Veivakayaloqaqataki

Au se qai wilika ga edua na italanoa e tarai au sara vakabibi. E yaco ena sotasota ni veitaucici kei na qito ena USA Masters Track and Field National Championship—nodra veisisivi na qase.

E dua vei ira na a vakaitavi ena 1,500 na mita o Orville Rogers yabaki 100. A volai:

“Ni cabolo na dakai me tekivu, era tekivu cici, e toka sara yani i muri o Orville, e toka duadua ena itutu oya ena gauna taucoko ni cici, toso toka ga yani vakamalua. Ni vakaotia nona cici na ikarua ni iotioti, se vo toka vei Orville e rua veimama na wavoki me qai oti. Era dabe galugalu e voleka ni 3,000 na sarasara ka saravi koya ni sa cawiri yani vakamalua ena iwavoki—taucoko, vakadigagalu, sega ni logaloga vinaka ni okoya taudua.

“[Ia] ni tekivuna na iotioti ni nona wavoki, era tucake na sarasara, kaila ka vakasausau. Na gauna e yacova yani na iotioti ni dodo, era kaila na sarasara. Era kaila ni veivakayaloqaqataki na udolu na sarasara, a talaca mai tuba o Orville na iotioti ni nona igu. Era kaila ena marau na sarasara ni takosova na laini era mokoti koya na nona itokani daucici. E yaloyalo o Orville vei ira na sarasara ena yalomalumalumu kei na vakavinavinaka ka lako yani kei ira na nona itokani vou. ”

Oqori na ikalima ni cici nei Orville ena veisisivi oya, ena veitaucici kece oqori a taura talega o koya na iotioti ni itutu. Eso beka era na temaki mera vakalewai Orville, nira nanuma ni sega ni dodonu me veisisivi ena vuku ni nona yabaki—ni sega ni rauti koya na veitaucici baleta ni balavu kina na gauna ni veitaucici vei ira eso tale na tamata.

E dina ga ni dau otioti duadua, e voroka o Orville e lima na isausau ni vuravura ena siga oya. E sega ni dua vei ira na sarava tiko nona veitaucici e rawa ni vakabauta oya, ia e sega ni dua vei ira na sarasara se o ira na cici e vakatulewa kina. E sega ni voroka o Orville e dua na lawa, era sega ni tosoya sobu na vakailesilesi na itagede. A ciciva na cici vata ga ka sotava na veika vata e gadrevi me vakataki ira kece na veitaucici vata. Ia na levu ni dredre qo—ena vuku ni nona yabaki kei na malumu ni yago—a biuti koya ena itabayabaki ni 100-vakacaca. Ia ena iwasewase ni yabaki oya, a voroka kina e lima na isausau ni vuravura.

Me vaka ga na nona yaloqaqao Orville me veitaucici ena veigauna kece, e vakakina na yaloqaqa e dau rawa kina vei ira eso na ganeda kei na tacida mera kalawa yani kina buturara ni bula ena veisiga, era kila nira dau lewai cala, e dina ga nira solia tiko nodra vinaka duadua ena nodra muria na iVakabula ka rokova nodra veiyalayalati vata kei Koya.

Evei na vanua eda bula kina e vuravura, se cava ga noda yabaki ni bula, na gagadre ni tamata taucoko meda vakaitaukeitaki, meda vakila nida vinakati ka gadrevi ka ni vakainaki ka vakaibalebale na noda bula se cava ga na keda ituvaki se noda malumalumu.

Ena iotioti ni wavoki ni veitaucici, era kailavaki Orville na sarasara ka vakayaloqaqataki koya me toso tiko. Sega ni dua na ka kevaka e imurimuri. Vei ira na vakaitavi kei ira na sarasara, oqo e levu cake sara mai na dua walega na veisisivi. Ena vuqa na sala, oqo e dua na ivakaraitaki vinaka ni iloloma ni iVakabula e cakacakataki. Ni sa oti o Orville era reki vata kece.

Me vaka ga na nodra Veisisivi na Kenadau, na noda ivavakoso, kei na matavuvale e rawa ni vanua ni vakasoqoni vata ka veivakayaloqaqataki kina—itikotiko ni veiyalayalati ka kena ivakawaqa na loloma i Karisito vei keda yadua—vukei keda me vakadruka na bolebole cava ga eda sotava, eda veivaqaqacotaki, veivakayaloqaqataki ka sega ni veivakalewai. Eda gadrevi keda vakai keda. Na kaukauwa vakalou oqo e yaco ena duavata, qori na vuna e inaki kina nei Setani me tawasei keda.

E kalouca, e eso vei keda, na gole i lotu e dau dredre ena so na gauna e vuqa na kena inaki duidui. E rawa ni dua e sasagabula tiko ena vuku ni so na taro ni vakabauta se dua ena vuku ni dredre ni bula veimaliwai se lomaocaoca. E rawa ni dua mai na dua na vmatanitu tani se matatamata, se dua e duatani na veika e sotava mai ena nona bula se sala e raica kina na ka ni sega ni veiganiti. E rawa sara mada ga nio ira na itubutubu moce vakaca se dredre ni bula vakaitubutubu vei ira na gonedramidrami kei na gonelalai se dua na dawai ena dua na ivavakoso sinai ena veiwatini kei na matavuvale. E rawa ni dua e sasaga tiko me lesu mai ni oti e vuqa na yabaki nona yali voli se dua e bikai voli ena yalo druka ni sega ni rauti koya ka na sega ni rawa ni mai vakaitaukeitaki.

E kaya o Peresitedi Russell M Nelson: “Ke dua na veiwatini ena nomu tabanalevu erau veisere, se vakasukai koso mai edua na daukaulotu gone, se dua na itabagone e vakatitiqataka na nona ivakadinadina, era sega ni gadreva na nomu vakalelewa. Era gadreva mera vakila na loloma i Jisu Karisito ni vakaraitaki ena [noda] vosa kei na ivalavala.”

Na veika eda sotava ena lotu e kena inaki me vakarautaki kina na isema bibi vua na Turaga kei keda ka gadrevi vakalevu kina noda tiko vinaka vakayago, vaka-vakasama, ka vakayalo. E umani ena veiyalayalati eda cakava kei na Kalou, tekivu mai na papitaiso, na noda itavi meda veilomani ka veikauwaitaki vakataki keda nida lewe ni nona matavuvale na Kalou, nida tiki ni yagoi Karisito, e sega ni dua walega na ka me caka.

Na loloma kei na kauwai Vakarisito e cecere ka vakalou cake. Na loloma savasava i Karisito sai koya na loloma cecere. Me vaka e vakatavulica o Peresitedi Nelson, “Na loloma cecere e tosoi keda meda ‘veivuketaka ni colata na noda icolacola’ [Mosaia 18:8] ka sega ni binia na icolacola vei ira vakataki ira.”

Me vaka a kaya na iVakabula, “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” E vakuria o Peresitedi Nelson: “Na loloma uasivi sai koya na itovo ni bula bibi duadua ka kilai kina ni dua sa daumuria vakaidina na Karisito. E matata na itukutuku ni iVakabula: O ira na Nona tisaipeli dina era veitarai cake, veilaveti, veivakayaloqaqataki, veivakayarayarataki ka veivakauqeti. Na ka eda tukuna vei ira vakakina ena vukudra na tani sa rui bibi sara”.

Nona ivakavuvuli na iVakabula ena ka oqo e rawarawa sara. E umani vata ena Lawa Koula: Cakava vei ira na tani na ka o vinakata me caka vei iko. Biuti iko ena vanua e tu kina na tamata oya ka cakava vua na ivakarau o vinakata me caka vei iko kevaka o iko oya.

Na ivakarau Vakarisito vei ira na tani e ulabaleta sara vakalevu na noda matavuvale kei na ivavakoso. Era okati kina na tacida kei na ganeda mai na vakabauta tale eso se sega ni dua nodra vakabauta. Era okati talega kina na tacida kei na ganeda mai na matanitu se itovo vakavanua tale eso, vakakina o ira e duiatani nodra vakabauta vakapolitiki. Eda lewe taucoko ni nona matavuvale na Kalou, ia o Koya e lomana taucoko na Luvena. E gadreva o Koya me ra lomani Koya na luvena ka veilomani talega vakataki ira.

Na Nona bula na iVakabula sa ivakaraitaki ni loloma, sokumuna, ka laveti ira era lewai ka biliraki mai vei ira na tamata nira tawasavasava. Na Nona ivakaraitaki eda vakaroti meda muria. Eda tiko eke meda taracake na itovo Vakarisito ka yaco me vaka na iVakabula. Na Nona e sega ni kosipeli ga me toqaia; e kosipeli me bulatakimeda yaco me vakataki Koya ka dauloloma me vaka ni sa loloma. E vinakata o Koya meda tamata ni Saioni.

Niu yabaki 20 vakacaca, au sotava e dua na gauna ni lomaocaoca levu, ena gauna oqori e vaka me yali na dina ni tiko na Kalou. Au sega ni rawa ni vakamacalataka sara na veika au vakila, au kaya ga ni vaka meu yali saraga. Mai na gauna au se gonelailai kina, au dau kila tu ga ni tiko na Tamaqu mai Lomalagi ka rawa niu vosa Vua. Ia ena gauna oya, au sa sega tale ni kila kevaka e tiko e dua na Kalou. Au se bera vakadua ni bau sotava e dua na ka vaqo ena noqu bula, ka vaka ni sa kavoro na noqu yavu.

E yaco, ni sa dredre vei au na lako i lotu. Au lako, ia vakatikina e baleta niu rerevaka deu vakatokai niu “luluqa vakalotu” se sa “malumu noqu vakabauta,” kau rere deu yaco me nona itavilesi e dua. Na ka dina au gadreva ena gauna oya meu vakila na loloma dina, na veiciqomi, kei na veitokoni mai vei ira era wavoliti au, sega ni vakalelewa.

Eso na nanuma au rere dera cakava ena vukuquna tamata, au dau cakava o au ena vukudra eso tale ena gauna era sega ni dau mai lotu kina o ira. Na ka mosimosi au sotava oyaniu vulica eso na lesoni yaga sara baleta na vuna eda sa vakaroti kina meda kakua ni dau vakalelewa vakatawadodonu.

Era tu beka eso ena keda maliwa era sotava galugalu tu na rarawa, era rerevaki nira na kila na tani na nodra leqa nira sega ni kila na cava era na cakava?

Na Turaga duadua ga e kila vakavinaka na itagede ni dredre eda dui ciciva tiko ena noda bula—na icolacola, na bolebole, kei na ivakatatao eda sotava ka vakavuqa nira sega ni dau raica na tani. O Koya duadua ga e kila vinaka na mavoa e veisautaka na bula kei na mosi ni yalo eda sotava oti ka se vakaleqai keda tikoga nikua.

Vakavuqa, nida dau vakalewai keda sara mada ga vakaukauwa, eda nanuma ni dodonu meda tiko i liu ena veitaucici. Na Turaga duadua ga e kila vakavinaka na noda iyalayala yadua kei na kaukauwa, ena vuku ni ka oqori, o Koya duadua ga e tu vua na taucoko ni dodonu me lewa na noda cakacaka.

Taciqu kei na ganequ, vakataki ira na sarasara ena italanoa, me ia na veivakayaloqaqataki vakataki keda ena noda ilakolako vakatisaipeli se cava ga na keda ituvaki! E sega ni namaki kina meda voroka na lawa se tosoya sobu na itagede. Sai koya na ikarua ni vunau levu—lomana na wekamu me vaka na nomu lomani iko. Me vaka e kaya na noda iVakabula, “Na ka kecega dou sa cakava vua e dua sa lailai vei ira oqo dou sa cakava vei au,” se vinaka se ca. Sa tukuna talega vei keda o Koya, “Kevaka dou sa sega ni duabau dou sa sega ni noqu.”

Ena so na gauna ena noda dui bula eda gadreva na veivuke kei na veivakayaloqaqataki. Meda yalataka nida na dau cakava e veigauna vei keda vakataki keda. Vakakina, eda na tara vakalevu cake na duavata ka vakarautaka na tikina vua na iVakabula me ia na Nona cakacaka tabu ni veivakabulai ka vakayaco veisau vei keda yadua.

Vei keda eda nanuma nida sa bera vakalevu sara ena veitaucici ni bula, ena ilakolako ni bula oqo, yalovinaka toso tikoga. Na iVakabula duadua ga e rawa ni lewa na vanua e dodonu mo tu kina, sa yalololoma ka dodonu sara o Koya. O Koya na Turaganilewa Cecere ena veitaucici ni bula, o Koya duadua ga e kila vinaka na itagede ni dredre o cici se o taubale se o sisi voli kina. . Ena vakasamataka o Koya na nomu malumalumu, nomu kaukauwa, veika o sotava ena nomu bula, kei na icolacola vuni o colata voli, vakakina na gagadre ni yalomu. O sa na voroka tale beka ga eso na isausau ivakatakarakara ni vuravura. Yalovinaka kakua ni yalolailai. Yalovinaka, toso tikoga! Yalovinaka kakua ni lako! O itaukei talega eke! Na Turaga e gadrevi iko, ka keimami gadrevi iko!

Evei ga na vanua o tiko kina e vuravura, veitalia ga na kena yawa, yalovinaka qai nanuma matua tiko nio Tamada mai Lomalagi kei na nomu iVakabula erau kilai iko ka lomani iko vakavinaka sara. O sega vakadua ni guilecavi mai vei Rau. Erau vinakata me rau kauti iko yani i vale.

Me dei tiko na matamu vua na iVakabula. O Koya na nomu ititoko kaukamea. Kakua ni laivi Koya. Au vakadinadinataka ni bula tiko o Koya ka rawa nio nuitaki Koya. Au vakadinadinataka talega ni vakayaloqaqataki iko tiko o Koya.

Meda muria taucoko na ivakaraitaki ni iVakabula ka veivakayaloqataki tiko vakataki keda na noqu masu ena yaca i Jisu Karisito, emeni.