Na iSolisoli Tawamudu ni iVakadinadina

O Koya e kila na ka kecega, e vu ni kaukauwa kecega. Ena Rarama i Karisito kei na veiqaravi ni Yalo Tabu, sa tu kina na Nona veivakayarayarataki e veivanua kecega. E sa Nona itovo ni bula me vakalougatataki keda.

E raica tu o Koya na noda veigauna sa oti, edaidai, kei na icavacava tawamudu. E sa sega na ka e rawa ni vunitaki mai Vua.

Na veisureti nei Peresitedi Nelson meda “vakasama vakasilesitieli” e vakayaloqaqataki keda meda vakamurimuria na rai kei na ivakarau ni bula i Tamada Vakalomalagi.

Ena vuku ni Nona itovonibula vakalou, e solia kina vei keda na Tamada Vakalomalagi na veisolisoli vinaka kece sara, vakayadua kei na Nona ituvaki ni rai kei na raiyawa.

Sa ikoya talega na itavi meda digidigi vinaka.

A sauma o Jisu Karisito na isau cecere duadua ena Nona dra talei me baleta na dodonu oya.

Ena so na gauna eda dau nanuma beka ni galala ni digidigi e kena ibalebale meda cakava ga na veika eda vinakata. Ia na dina nida sa voli oti ena ivoli e kena ibalebale kina ni galala ni digidigi e dua na isolisoli tabu.

Eda lewai keda ga, ka tu na ka eda na saumitaro kina. Ena ka oqo, eda saumitaro me baleta na digidigi eda cakava ka yavutaki ena kila e tu vei keda kei na isolisoli eso e soli vei keda. Eda sega ni rawa ni cakava e dua na digidigi ka sega ni saumitaro kina.

Cava na vuna e tu kina na noda galala ni digidigi?

Meda digitaka kina na dodonu

Meda digitaki Karisito kina.

Meda digitaka kina na bula tawamudu—e veigauna kecega.

Na ivakadinadina mai na Yalo Tabu e cecere cake mai na veika raici. Sai Koya na ivakadinadina cecere duadua i Tamada kei na Luvena. A vakavulica o Peresitedi Nelson, “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.”

Taciqu kei na ganequ, oqo na vuna eda gadreva kina na kaukauwa ni Yalo Tabu edaidai.

Na ivakadinadina ni Yalo Tabu e rawa ni lako mai ena sala e vuqa. Me vaka na matanicina ena dua na rumu buto, e rawa ni lako mai vakasauri. E rawa ni ramase mai vakamalua me vaka na matanisiga ena vei gauna. E rawa ni lako mai vaka mata‑ni‑rarama, vakavotui vagauna kina vuku savasava. Se sala cava ga, e dau lako ga mai ena Yalo Tabu.

Au tubucake ena vanua rairai vinaka o Jamaica, e marautaki ka totoka. Ia, niu tekivu e koronivuli torocake, eso vei ira na lewenikalasi kei na itokani era sega ni kinoca rawa na noqu lewa meu lewena na Lotu i Jisu Karisito. “E rawa vakacava mo lewena na lotu oqori?,” era vakataroga. “E rawa vakacava mo vakabauta na italanoa oqori?”—nira vakaibalebaletaka tiko ki na iMatai ni Raivotu. “E rawa vakacava mo wilika na ivola oqori?”—ni ra vakaibalebaletaka tiko ki na iVola i Momani. “O vakabauta nakece oya?” Kei “Na cava o vakalusia tu kina na nomu bula?”

E mosi, vakabibi ni lako tiko mai vei ira na tamata au kauwaitaka.

Ia na ka era e sega ni kila soya qo: na veika au sotava kei na Yalo Tabu. Ni vakasinaita na yaloqu na ivakadinadina oya, a vakaseavutaka na mosi ni veisiga, ka “ko lomalagi sa rairai, [e] mataqu edaidai.”

De rairai o sa tarogi beka ena so na veitaro oqo. De rairai, ena gauna sara mada ga qo o sa vakasosataki tiko me vakataki au.

Na isolisoli kei na ivakadinadina ni Yalo Tabu e sa tu me baleta na tamata kecega.

O Jamaica vei au a vakataki Palmyra vei Josefa Simici. Sa ikoya na noqu Veikau Tabu. Au sega ni kila na vanua sara ga a tekiduru kina o Josefa me masu ena Veikau Tabu, ia au kila vinaka na vanua au tu kina ni yaco me dina na noqu VeikauTabu. E yaco e Four Grove Road, Mandeville, Jamaica, ena noqu valenisili, ena 6:00 ena mataka ena dua na siga Vukelulu tolu na yabaki ni oti noqu papitaiso. E yaco na veika sotavi vakalou oqo ena rua na macawa i liu a sureti au na daukaulotu sisita meu wilika na iVola i Momani. O Sisita Audrey Krauss e tiko sara ga oqo ena koniferedi nikua kei na nona matavuvale, au lomani koya vakalevu.

Na ka sotavi oya a veisautaki au.

Kemuni na taciqu kei na ganequ, na ivakadinadina e sega ni soli me vakayagataki vagauna ga. Na isolisoli oqo mai vua na Tamada Vakalomalagi dauloloma e nakiti me tawamudu baleta ni o koya e solia e tawamudu. Na ivakadinadina e sega ni dodonu me tiko na iotioti ni kena tikinisiga. E sega ni dodonu me malumalumu se lailai sobu baleta ni veisau e dua na ka ena noqu bula se e dua na ka e vuravura e veisau. E dodonu me kaukauwa baleta, me vaka na dauveiqaravi ena vosa vakatautauvata ni taledi, na noqu ivakadinadina vakai au e dua na isolisoli me vakalevutaki—sega ni buluti.

Niu raica lesu na veisiga dredre oya ni veivakatovolei kei na veivakacacani kau a lako curuma vaka gone sa vukei au me yacova na vanua au sa mai kila kina oqo vakai au. Au sega walega ni vakabauta, nuitaka, se vakadinata, dina ga nira tiki bibi ni vakabauta ena salatu kina dua na ivakadinadina tudei. Au qoroi iko ena nomu cakava ga vakai iko mo taroga na taro, vuli, masu, lolo ka vakasamataka vakatitobu. Yalovinaka kua ni guce. Era yaga kece na vei sasaga mo muria na salatu oqo kina ivakadinadina. O cei se na cava beka ona vakatara me kauta tani? “Ai vakadinadina uasivi cava tale ko rawa ni taukena me vakatauvatani kei na kena mai vua na Kalou?”

E rawa kina luvena tagane se yalewa kece sara na Kalou me rawata e dua na kila titobu cake, kaukauwa cake ka tudei cake me baleti ira vakai ira. Me vakataki Josefa Simici, e vakadeitaka nona ivakadinadina veitalia na veisaqasaqa, eda rawa ni kaya vakadoudou, “Au kila, au kila ni kila na Kalou, au sega ni rawa ni cakitaka, au sega sara ga ni via cakava.”

Kemuni na taciqu kei na ganequ lomani, laiva me cakacaka vei iko na sorenikau lailai ni ivakadinadina me yacova ni sa tubu cake kina dua na kila lagilagi tudei.

Kivei keda eda sa papitaiso ka vakadeitaki nida sa lewena Na Lotu i Jisu Karisito ni Yalododonu Edaidai ia se tovolea vakaukauwa tiko ena “Au sega ni vakadetaka keu sa kila,” yalovinaka nanuma na yalayala oqo ena masu ni sakaramede: “Me tiko ga kina kei ira na Yalona.” Ena vuku ni yalayala oqo, o keda yadua e rawa ni lakomuria na salatu kina ivakadinadina kei na dua na kila tudei.

Ia oqo e dua na dina cecere: Ena sala cava ga e soli kina e dua na ivakadinadina—se cila mai vaka na cabe ni siga se lako mai ena dua na raivotu lagilagi—e gadreva tiko ga e dua na digidigi me ciqomi na isolisoli talei oqo.

Na tukuni ni “Au digitaka meu vakabauta” e vakarawarawataka me ciqomi na ivakadinadina mai vua na Kalou. Kevaka eda raica ni malumalumu tiko na noda ivakadinadina, nanuma tiko na noda digidigi e vakalailaitaka na kaukauwa ni ivakadinadina. Ia sega ni lako kina dua na vanua na ivakadinadina. Eda gadreva ga meda veisemati vata kaya tale.

Nomu digitaka mo vakabauta e sala vuku ka kaukauwa mo vakayagataka kina nomu galala ni digidigi.

Au sega ni raica rawa e dua na sala vinaka cake meu vakayagataka kina noqu galala ni digidigi mai na kena taqomaki na noqu ivakadinadina.

A vakavulica o Peresitedi Nelson: “Au vakamasuti kemuni moni lewa na nomuni ivakadinadina. Cakacakataka. Taukena. Karona. Susuga me na tubu kina. Vakania ena dina.”

Vei au, na veivosa e taurivaka, cakacaka, qarava, taukena, susuga, ka vakania e rogo vaka e dua e lewa ka soli vua na ilesilesi me baleta e dua na ka talei ka bibi.

Ena Lotu e liu, o Parley P. Pratt a sega ni taleitaka na Parofita o Josefa Simici ka digitaka me vakalewai koya kei na Lotu. Ni lako mai tauni o John Taylor, o koya a vakavulica kina na kosipeli o Parley, a kauti koya vakatikitiki o Parley ka vakasalataki koya me kua ni vakamuri Josefa. E tukuna o John Taylor veiParley:

“Ni bera nio biuti Kenada mai, iko a wasea e dua na ivakadinadina kaukauwa vei Josefa Simici nio koya e parofita ni Kalou, ka o kaya nio kila na veika oqo mai na ivakatakila kei na isolisoli ni Yalo Tabu.”

“Sa tu qo vei au na ivakadinadina vata ga o a rekitaka oya. Kevaka a dina na cakacaka ena ono na vula sa oti, e dina tiko edaidai. Kevaka a parofita o Josefa Simici ena gauna oya, e parofita tiko oqo o koya.”

Au vakadinadinataka ni o Josefa Simici e parofita ni Kalou kei na itavi vakaparofita a ciqoma o koya e tomani tiko edaidai. E dusimaka tiko na cakacaka oqo o Jisu Karisito.

Au sureti iko mo vakasamataka na nomu salatu kina dua na ivakadinadina tudei i Jisu Karisito kei na Nona kosipeli. Mo lewa na nomu ivakadinadina; vakayagataka vakavuku na nomu galala ni digidigi ka tusanaki koya e solia kei na Nona itovonibula lagilagi kece. Au vakadinadinataka ni tiko vei iko na kaukauwa. E sega ni dua ena rawa ni digidigi me baleti iko. E sega ni dua e rawa ni kauta tani na isolisoli oqo. O rawa ni digitaka mo vakabauta.

Au yalataka nio cakava oqo, na nomu ivakadinadina ena yaco me dua na “ivurevure ni wai bula, ena tovure tiko kina bula tawavakaiyalayala.” Ena yaco me dua na ikelekele kei na dua na dauveivakayarayarataki, ena dau tokoni iko ena veigauna dredre. Ena vakavuna mo taracake na isolisoli vakayalo eso. Ena vukei iko ena nomu ilesilesi kei na veiqaravi vakai iko. Ena yaco me dua na iyaragi me saqati Setani kei ira na nomu meca. Na nomu ivakadinadina ena yaco me dua na ka rekitaki nio raica nira vakatotomuria na luvemu, makubumu, kei na makubumu-vakarua kei ira o lomana ka qarava. Ena yaco me kaukauwa nio wasea ka vakayagataka mo vakadinadinataka.

Kevaka o kila, o sa kila. Au kila niu sa kila. Eda gadreva e levu tale na ivakadinadina tudei i Jisu Karisito kei na Nona kosipeli. Mo Yacova! Vakasaqara! E gadrevi vakatotolo! Oqo na iotioti ni tabagauna—na tabagauna ni taucoko ni veigauna.

O Jisu Karisito a vakaraitaka na dina oqo: “Ena takali ko lomalagi kei vuravura, ia na noqu vosa ena sega ni takali.”

Kemuni na taciqu kei na ganequ, na ivakadinadina i Jisu Karisito a sega vakadua ni kena inaki me isolisoli vagauna ga. Sega ni dua ka e baleta e vagauna ga—sega nio koya e solia, sega ni isolisoli sara ga, sega nio koya e talaucaka na isolisoli, sega nio koya e baleti koya na isolisoli. Me yaco me vakamacalataki mada ga na nomu ivakadinadina ena sala vata oqo. Dina ga “ena takali ko lomalagi kei vuravura,” na nomu ivakadinadina ni kosipeli i Jisu Karisito ena sega ni takali. Oqo na gauna mo taura matua na isolisoli talei oqo. Ena yacai Jisu Karisito, emeni.