Na Yaca O Na Vakatokai Kina

E vakavulica o Peresitedi Russell M. Nelson ni kevaka e vosa tiko vakadodonu vei iko na Turaga, na imatai ni ka ena vakadeitaka o Koya mo kila o cei dina o iko: eda luve ni Kalou, luve ni veiyalayalati, ka tisaipeli i Jisu Karisito. Ni dua tale na ka eda na vakatokai keda kina ena lai yaco me kauti keda sobu.

Au vulica oqo ena gauna e dua kina na imatai ni talevoni ni luvequ tagane ulumatua. Ena yalo mamarau, sa tekivu okoya me vakacuruma na yaca ni nona matavuvale kei ira nona itokani kina veitaratara. Dua na siga au raica ni sa qiriti koya o tinana. Ena sikirini e laurai na yaca “Tina.” Sa dua na digidigi vinaka ka rokovi—ka, au tusanaka, sa dua na ivakatakilakila ni vakarokoroko ni itubutubu uasivi e vale. Na ka dina, au vua kila saraga. Na yaca cava e solia vei au okoya?

Au raica na nona veitaratara, ka nanuma ni kevaka o Wendi e “Tina,” o au beka na “Tama.” E sega ikea. Au vakasaqara na “Tamaqu.” E segai. Na noqu nanamaki sa vuki ki na lomaleqa. “E dau kacivi au beka na ‘Corey’?” Sega. Ena iotioti ni sasaga, au nanuma, “Keitou dauqito soka—e rairai e kacivi au ena ‘Pelé.’” Tatadra beka. Ni oti, au qirita na nona naba, ka laurai mai e rua na vosa ena sikirini: “Sega ni Tinaqu”!

Kemuni na taciqu kei na ganequ, na yaca cava o vakatokai kina?

O Jisu e dau kacivi ira na dauvakamuri Koya ena yaca eso: Tisaipeli. Luvena tagane kei yalewa. Luve ni parofita. Sipi. iTokani. Na rarama kei vuravura. Yalododonu. O ira yadua e kauta vata na matalia tawamudu ka vakabibitaka e dua na veiwekani dina kei na iVakabula.

Ia ena veiyaca kece oqo, e dua e lamata mai vei ira na kena vo—na yaca i Karisito. Ena iVola i Momani, a vakamacalataka vakaukauwa o Penijamini na Tui:

“Sa sega tale na yaca e soli me rawa kina na veivakabulai; o koya, au sa gadreva kina mo dou taura matua ga na yacai Karisito.

Ia ena qai yaco ni ko koya yadua sa vakayacora vakaoqo ena kunei mai na liga imatau ni Kalou, ni na kila ko koya na yaca sa kacivi kina, ni na kacivi ena yacai Karisito.”

O ira era taura na yacai Karisito era sa Nona tisaipeli ka ivakadinadina. E na ivola i Cakacaka, eda wilika ni oti na Tucake tale i Jisu Karisito, o ira na ivakadinadina digitaki ka vakaroti me vakadinadinataka vei koya ga ena vakabauti Jisu, me papitaiso, ka ciqoma na Yalo Tabu me bokoci kina na ivalavala ca. O ira era ciqoma na cakacaka vakalotu tabu oqo ka soqoni vata kei na Lotu, era sa taisaipeli, ka kacivi me lotu Vakarisito. Na iVola i Momani e vakamacalataki ira na vakabauti Karisito me lotu Vakarisito kei ira na tamata veiyalayalati me vaka “na luvei Karisito, na luvena tagane, ka luvena yalewa.”

Na cava na ibalebale ni noda vakatokai ena yaca i Karisito? E kena ibalebale meda cakava ka maroroya na veiyalayalati, me dau nanumi Koya, ka maroroya na Nona vunau, ka “lomasoli … ka vakadinadinataka na Kalou ena veigauna kecega, kei na veika kecega.” E kena ibalebale me tu vata kei ira na parofita kei na apositolo nira kauta voli na itukutuku i Karisito e veiyasai vuravura—vata kei na vunau, veiyalayalati, kei na cakacaka vakalotu—e veiyasai vuravura. E kena ibalebale talega me vukei ira na tani me vakamamadataka na rarawa, mo dua na rarama, ka kauta mai na inuinui ni Karisito vei ira kece na tamata. E dina, oqo me ivakarau ni bula taucoko. E vakavulica na Parofita o Josefa Simici ni “oqo na vanua e sega ni yaco mai kina edua na tamata ena dua na gauna”

Baleta na ilakolako vakatisaipeli e taura na gauna kei na igu ka tarai ena “vunau ena vunau, kei na ivakavuvuli ena ivakavuvuli,” e rawarawa meda vesuki ena tutu e solia vei keda o vuravura. Qo e vakavurea vakalekaleka ga na kena yaga ka na sega ni veirauti vakai koya. Na veivueti kei na veika e tawamudu “e sa yaco na veivueti ena vukui koya na Mesaia Tabu.” O koya, na muria nai ivakasala vakaparofita meda vakabibitaka na bula vakatisaipeli e vuku ka yalomatua, vakabibi ena gauna sa rui levu kina na domo veisivisivi kei na veivakayarayarataki. Oqo e uto ni nona ivakasala na Tui o Penijamini ni a kaya, “Au gadreva mo ni nanuma mo ni dau maroroya na yaca [i Karisito] me volai tiko ga e lomamuni, mo ni rogoca ka kila na domo sa kacivi kemuni, kei na yaca talega ko ni sa kacivi kina.”

Au raica oqo ena noqu matavuvale. Na tamai tukaqu o Martin Gassner e veisautaki vakadua baleta ni a ciqoma na veikacivi ni iVakabula e dua na peresitedi ni tabana yalomalumalumu. Mai Jamani ena 1909, e gauna dredre sara ka dredre na ilavo. E cakacaka vakadaunisema kaukamea o Martin ena vale ni buli paipo. Ena nona vakatutusa, e levu na siga ni veisaumi e vakayagataki ena gunu, kana tavako, ka voli gunu ena vale ni mateni. E tukuna vua na watina ni kevaka e sega ni veisau, ena biuti koya.

Dua na siga, e dua rau cakacaka vata kei Martin e sotavi koya ena sala ki na vale ni mateni ka tu e ligana e dua na pepa. E kunea okoya ena gaunisala ka tukuna vei Martin ni vakila e dua na ka e duidui ni oti nona wilika na ivola lobi ka kena ulutaga Was wissen Sie von den Mormonen?, se Na cava o kila me baleta ira na Momani? Au kila ni sa veisau na yaca oya.

E dua na itukutuku ni itikotiko e tabaki tu e dakuna ka rauta ga me kilai kina na vanua e tiko kina na valenilotu. Sa yawa sara na vanua e tiko mai kina na valenilotu, ia erau yavalati ena veika rau wilika ka navuca me rau taura na sala qiqi me lai vaqaqa ena Sigatabu oya. Ni rau yaco yani, erau kunea na itikotiko e sega ni vaka na valenilotu e rau namaka ia edua na vale ni somate. E lomalomarua o Martin—baleta, e dina, na lotu kei na vale ni mate e rogorogo me vaka e rau waki vata.

Ia e cake, ena olo e redetaki, erau kunea e dua na ilawalawa lailai ni Yalododonu. Edua na turaga e sureti rau ki na lotu ni soli ivakadinadina. E tarai Martin na Yalotabu ka vakauqeti sara okoya ena ivakadinadina e rawarawa, ka gumatua ni wasea kina na nona ivakadinadina. Ka tiko mai kea, na vanua e sega ni namaka, ka tukuna kina okoya ni sa kila rawa ni dina.

Ni oti oya e vakamacalataki koya na turaga ni okoya na peresitedi ni tabana ka taroga kevaka erau na lesutale yani. E vakamacalataka o Martin ni tiko vakayawa sara ka sega vua na sede mena rawata na ilakolako ena vei Sigatabu. Tukuna vua na peresitedi ni tabana, “Muri au.”

Eratou taubaletaka e vica na yatu vale kina dua na vale nibuli yaya ka cakacaka tiko kina na nona itokani o peresitedi ni tabana. Ni oti e dua na veitalanoa lekaleka, sa soli vei rau o Martin kei na nona itokani na cakacaka. Na peresitedi ni tabana e sa qai liutaki iratou kina dua na vale ni tikotiko ka rawata na vanua me ratou tiko kina vata vakamatavuvale.

Na veika kece oqo e yaco ena loma ni rua na auwa. Ena macawa ka tarava e ratou toki o Martina kei na nona matavuvale. Ni oti e ono na vula eratou sa qai papitaiso kece. Na turaga a kilai tu e liu me dua na daumateni sa dua e daugugumatua ena nona vakabauta vou ka sa qai kacivi koya na tamata ena tauni, ka sega beka ena loloma “me bete.”

Me vaka na peresitedi ni tabana, au sega ni rawa ni tukuna na yacana—sa yali ki na gauna okoya. Ia au kacivi koya me dua na tisaipeli, mata, Vakarisito, e dua na kai Samaria dauloloma, kei na itokani. Na nona veivakayarayarataki e sa vakilai tikoga ni 116 na yabaki sa sivi, ka au duri ena tabana ni nona bula vakatisaipeli.

“E dua na ivosavosa e va oqo ni rawa nio wilika na sore ni dua na apolo, ia e sega ni rawa nio wilika na levu ni apolo e vua mai na dua na sorena.” Na sorenikau e tea na peresitedi ni tabana e sa vuataka na vua e sega ni wiliki rawa. E sega beka ni kila ni oti e 48 na yabaki, e vica na tabatamata ni matavuvale nei Martin ena yasa ruarua ni ilati era mai vauci vata ena Valetabu e Bern Switzerland.

E dina na ivunau levu duadua sai koya o ira eda sega ni rogoca ia eda raica na nodra cakacaka sega ni namaki ka laurai ena nodra bula na tamata ka, era tovolea tiko mera vakai Jisu, era lako voli ka daucaka vinaka. Na veika e cakava na peresitedi ni tabana dauloloma oqo e sega ni tiki ni dua na jekelisi. Okoya a bulataka tikoga na kosipeli me vaka ni vakamacalataki tiko ena ivola ni Alama: “Era sa sega ni vakatalai ira tani ko ira sa viakana, se ko ira sa viagunu, se ko koya sa tauvimate, era sa lomasoli kina vei ira na tamata kecega, vei ira na qase kei ira na gone, vei ira na tagane kei ira na yalewa” Ka, e dua na tikina meda kakua ni rai sivita, era sega ni talai ira tani, “se mai na taudaku ni lotu se loma ni lotu.”

O ira era taura na yaca i Karisito era kila me vaka e tukuna o Josefa Simici ni “tamata e sa vakasinaiti tu ena loloma ni Kalou, e sega ni tiko vakacegu ni vakalougatataka duadua ga na nona matavuvale, ia e rai yani ki vuravura taucoko ka maqusa me vakalougatataka na kawatamata taucoko.”

O Jisu e bula vakaoqo. E dina, e cakava e levu na ka o Koya ka ratou sega ni rawa ni vola kece na Nona tisaipeli. E vola na Apositolo Joni: “Sa vuqa talega na ka tani sa cakava ko Jisu, ia kevaka sa volai kecega, au nanuma ni sa oso ko vuravura e na veivola ena volai”

Meda sasaga meda muria na ivakaraitaki i Karisito, daucaka vinaka, ka vakabibitaka na bula vakatisaipeli me rawa kina vei keda meda veimaliwai vata kei ira na tani, mera vakila na loloma ni Kalou kei na kaukauwa ni veivakadeitaki ni Yalo Tabu. Ena rawa meda na sema kei tamai tukaqu kei na milioni na turaga kei na marama era vakaraitaka, me vaka na Tisaipeli o Adriu, “Keitou sa kunea na Mesaia.”

E na icavacava, na noda ivakatakilakila e sega ni lewa o vuravura. Ia na noda bula vakatisaipeli e yavutaki ena cakacaka vakalou eda ciqoma, na veiyalayalati eda maroroya, kei na loloma eda vakaraitaka vua na Kalou kei ira na wekada ena noda daucaka vinaka Vaka e vakatavulica o Peresitedi Nelson, eda luvena dina na Kalou, luve ni veiyalaylati, tisaipeli i Jisu Karisito.

Au vakadinadinataka ni bula tiko o Jisu Karisito ka sa vueti keda. O Koya ea kaya, “Au a kacivi iko ena yacamu; ko sa noqu.” Ena yacai Jisu Karisito, emeni.