Na Kaukauwa ni Veiqaravi Vua e Dua

Kemuni na ganequ kei na taciqu, vinaka vakalevu na nomuni yalodina mo gole mai vei Jisu Karisito ena gauna veibolei oqo. O ni sa totoka, ni rairai vinaka, oni luvena yadua na Kalou. Sa noqu masu ni da na kila rawa na veivakauqeti ni Yalo Tabu ni da sa yaco meda veivukei meda tisaipeli yalodina i Jisu Karisito ka vakila na Nona reki ni da sokalou yani ena vale ni Turaga.

A vakaraitaka o Peresitedi Russell M. Nelson ni: “Oqo na gauna medaru vakarautaki kedaru me baleta na iKarua ni nona Lesu mai na noda Turaga ka iVakabula, ko Jisu Karisito. Oqo sa gauna me daru vakabibitaka kina na nodaru bula vakatisaipeli. Ena vuravura oqo sa vakasinaiti tu ena veivagolei tani meda wele, eda na cakava vakacava oqo?

Sa solia mai o Koya na kena isau: ”Na sokalou tudei ena valetabu ena vukei keda. Ena vale ni Turaga, eda vakanamata vei Jisu Karisito. Sa yaco meda kilai Koya. O ira yadua sa vakasaqarai Jisu Karisito vakaidina ena kunei Koya ena valetabu.”

Ena rawa vakacava ni yaco meda tisaipeli yalodina i Jisu Karisito ka vukei ira talega na tani mera yaco me vakakina? Eda veiqaravi yani vua na dua. Na veiqaravi ena ivakarau ni iVakabula e okati kina na loloma vakalou, yalovinaka, dau vosota vakadede, kei na loloma ka sega kina na vakalelewa. Nida qarava yani e dua, eda na sureti koya me lako mai vei Jisu Karisito ka laki sokalou ena vale ni Turaga me ciqoma na Nona kaukauwa veivueti. Ena dua tale na vosa; eda na veivukei vakai keda meda sa tisaipeli yalodina nida qarava yani e dua ena sala e veimuataki kina vale ni Turaga.

Eda vulica mai vua na Turaga o Jisu Karisito na kaukauwa ni veiqaravi ki vua e dua ena loloma sega ni vakalelewa. O ni nanuma tiko na yalewa ni Samaria ena tobu wai. Na yalewa oqo a vakila tu beka ni tawadokai, galili, yalolailai, ka sega ni laurai. E vakila beka o koya ni sega ni okati vata kei ira. Ena nona bula taucoko sa lima oti na watina, kei na tagane e rau tiko vata oqo e sega ni watina. Eso era na vakalewa beka vakatani ni ra sega tu ni kila na ituvaki ni nona bula. E dua beka na vuna a gole taudua mai kina ena tobu wai ni katakata sara tiko na siga oya. Ia, a dua talega vei ira na isevu a tukuna kina o Jisu Karisito nio Koya na Mesaia. Vua, na yalewa oqo sa luve ni Kalou.

A vakavulica o Jisu Karisito na yalewa oqo ni mai vei Koya ga sa rawa kina vua e dua me rawata na bula tawamudu ena nona gunuva na wai ni bula oqo. A kaya kina, “Ia ko koya sa gunuva na wai kau na solia ena sega sara ni viagunu ka tawa mudu; ia na wai kau na solia vua ena mata-ni-wai sa tovure kina bula tawamudu.”

Na yalewa ni Samaria a vakila na loloma ni iVakabula ka ciqoma na ivakadinadina ena Yalo nio Koya na Mesaia. Ni oti na ivakadinadina oqo, a lesu o yalewa kina koro, sureti ira eso mera lako ka raica, ka vuqa era sa vakabauti Jisu “ni sai koya dina oqo na Karisito, na iVakabula kei vuravura.” A veiqaravi o Karisito vua e dua ena loloma, e yaco kina, e vuqa mera Nona tisaipeli yalodina.

Eda sa vulica na kaukauwa ni veiqaravi vua e dua ena yalololoma maivei Pita kei Joni na Apositolo i Karisito. Oni nanuma tiko e dua na tamata, a sucu lokiloki mai, ka dau davo toka ena veisiga ena matamata ni valetabu me kere ilavo. Na tagane oqo a vakila tu beka ni tawadokai, galili, yalolailai, ka sega ni laurai. E vakila beka o koya ni sega ni okati vata kei ira.

“Sa qai kaya ko Pita, a siliva kei na koula e sega ni tu vei au; ia na ka ga sa tu vei au kau na solia vei iko, Ena yaca i Jisu Karisito na kai Nasareci mo tucake ka lako.”

Sa qai taura o Pita na ligana imatau, ka tuberi koya cake, ka sa vakabulai sara na tagane oqo. Ni oti ga na cakamana oya, sa laki curu kina valetabu na tagane oqo vata kei Pita kei Joni, “a sa lako, ka rika, ka vakarokorokotaka na Kalou.“ Rau a veiqaravi o Pita kei Joni vua e dua ena sala e veimuataki kina vale ni Turaga, sa yaco kina na tagane oqo me tisaipeli yalodina i Karisito.

Noqu itokani, so na gauna ena noqu bula au vakila talega na tawadokai, galili, yalolailai, ka sega ni laurai. Au sa vakila talega niu sega ni okati vata kei ira. Au papitaiso ka vakadeitaki me dua na lewe ni Lotu i Jisu Karisito ni Yalododonu Edaidai niu sa yabaki 19. Ni oti e dua na yabaki, au ciqoma na veikacivi meu daukaulotu tudei, ia se levu tu na ka meu vulica baleta na itukutuku makawa ni Lotu.

Ena tekivu ni noqu veiqaravi ni kaulotu, au a vulica ni dua na gauna era a sega ni vakatarai vei ira na kawa tamata loaloa kei Aferika mera marautaka taucoko na veivakalougatataki ni sokalou ena vale ni Turaga. Na noqu kila oqo ena imatai ni gauna a yaco kina vei au na cudru, veilecayaki, lomalomarua, kei na rere. Na veiyalo vakaoqo a kaukauwa vei au ka vakavuna me yali kina vei au meu kila na Yalo Tabu ena dua na gauna.

E ka marautaki, ni tiko na noqu itokani vinaka ni kaulotu, o Kevin Vick, a qaravi au ena loloma, vosota, kei na yalololoma. Ena veibogi kece ni raica o koya niu vakila na lomatarotaro kei na veilecayaki, a dau kaya ga mai, ”Elder Johnson, au lomani iko.” Ni oti toka e rua na macawa, au a vakatara meu vakila na loloma nei Kevin. Au a vakayaloqaqataki meu masu vua na Tamada Vakalomalagi ena yaca i Jisu Karisito. Niu sa masu, au sa vagolei kina wase 6 ni Vunau kei na Veiyalayalati, tikina e 21-23, e tukuna:

”Raica, koi au ko Jisu Karisito na Luve ni Kalou. Koi Au na rarama sa cilava na butobuto.

“Mo nanuma lesu ga na bogi ko a tagi mai kina vei au ena yalomu, mo kila kina na dina ni veika oqo.

“Au sega li ni vakaceguya na nomu vakasama me baleta na ka oqo? Ai vakadinadina uasivi cava ko rawa ni taukena me vakatauvatani kei na kena mai vua na Kalou?”

Niu wilika, au vakananuma. Na siga au a lolo ka masumasu kina meu kila ni iVola i Momani sa vosa ni Kalou kei Josefa Simici sa Parofita ni Veivakalesuimai. Au nanuma kina na veiyalayalati a caka ena loma ni vale ni Turaga e semati au vei Jisu Karisito ena sala me e voleka kina vei au. Au vakila na loloma ni iVakabula, na Nona loloma veivueti, kei na Nona veivakadeitaki ni Lotu i Jisu Karisito ni Yalododonu Edaidai sa Nona matanitu ena vuravura oqo ka sa kena inaki me vakarautaki keda kina iKarua ni Nona Lako Mai. Baleta niu nanuma, au sa rawa ni kila tale na Yalo Tabu ka kila vinaka vakalevu nio Jisu na Karisitoniu sa Nona tisaipeli.

Ena so na gauna e sega ni saumi mai na noda taro ka vakila ni da sega ni dokai, yalolailai, galili, ka sega ni laurai. Ia, noqu itokani, meda sa gu ki liu ena vakabauti Jisu Karisito ka nanuma tiko na Nona vosa.

“Me kakua ni rarawa na lomamudou.”

”Dou na kunea e vuravura na rarawa: ia mo dou vakacegu; au sa vakamalumalumutaki vuravura.”

Au sa ivakadinadina ni dina oqo kei na veivakalougatataki yalataka na iVakabula.

Ia, cava eda na cakava me vakadeitaki na noda veiqaravi vua e dua ena ivakarau ni iVakabula me mana sara? Na bulataka na vunau i Karisito ena vukei keda. Na bulatakana vunau i Karisito,” me vaka e vakamacalataka o Peresitedi Nelson ni “sa rawa me vuataka mai na wirini ni savasava kakaukauwa, ka bulia na igu vakayalo ena noda bula.

Nida saga tiko meda bulataka na lawa cecere sara i Jisu Karisito ena laveti keda cake na iVakabula mai na idre ni vuravura lutu oqo ena Nona vakalougatataki keda ena loloma cecere sara, yalomalua, dauloloma, yalovinaka, bula vakaivakarau, sautu, kei na vakacegu.”

”[Na igu vakayalo] oqo e vu mai na bulataki ni vunau i Karisito,” ka a vakamacalataka o Elder Dale G. Renlund, ”ni sega walega ni vaqaqacotaka na veisau ni keda ituvaki vakalou ki na keda icavacava tawamudu ia e vakauqeti keda talega [meda veiqaravi vei] ira eso ena sala e veiganiti.” E vakavotuya vei keda o Elder Renlund ni ”cakacaka ni iVakabula oya me veivakabulai [meda taucoko kina]. Na noda cakacaka o ya meda loloma—meda loloma ka veiqaravi ena ivakarau mera gole na tamata vei Jisu Karisito.”

Na noda rawata meda bulataka na vunau i Karisito ena vakalevutaki ni da vulica ena veisiga na iVola i Momani ka votai ena sakaramede ena veimacawa. A vakaraitaka o Peresitedi Nelson ni iVola i Momani, “e vakavulica na vunau i Karisito [ka] vakarautaka na kila ka taucoko ka vakadonui duadua ni Veisorovaki i Jisu Karisito e rawa ni kunei ena veivanua cava ga.” Au taleitaka na ivola oqo. Ni da votai ena cakacaka vakalotu ni sakaramede ena masumasu ena veimacawa ena torocake kina na noda kila vinaka na Veisorovaki i Jisu Karisito ka vakarautaka na vakavoui vakayalo, vakacegu, kei na kaukauwa ni bula vakalou ena noda bula. Nanuma tiko “ena veicakacaka vakalotu [ni matabete], ena vakatakilai mai na kaukauwa ni bula vakalou,” ni kaukauwa oqo e lako maivei Jisu Karisito sa vaqaqacotaka na noda gagadre kei na noda rawa ni veiqaravi vua e dua.

Na noqu vulica na iVola i Momani ka votai ena sakaramede sa vakalailaitaka na yalo lailai, ia sa toroya cake na noqu igu meu qarava e dua ena ivakarau ni iVakabula, ka vukea na veivakatisaipelitaki meu sa dau vakaliuca.

Noqu itokani, au yalataka nida bulataka na vunau i Karisito ka veiqaravi vua e dua ena sala e veimuataki kina vale ni Turaga, eda na rawa ni gu ki liu ena vakabauti Jisu Karisito ke sega tiko mada ga ni saumi noda vakatataro ka vakila ni da tawadokai, galili, yalolailai, ka sega ni laurai. Eda na sureta e dua me gole mai vei Jisu Karisito me laki sokalou ena vale ni Turaga me ciqoma na Nona kaukauwa veivueti kei na loloma. Ena vale ni Turaga, eda na ”vakila na loloma veivueti [ni iVakabula]. [Eda] na kunea na isau ni [noda] taro e veimedreyaki sara. [Eda na] qai kila vakavinaka na reki ni Nona kosipeli.” Ena yaca i Jisu Karisito, emeni.