Vagoleya na Yalomu vei Jisu Karisito: Na iSolisoli Tabu ni Sere ni Lalai

Na sere ni Lalai e rawa ni yaco me iyaya ni veivakavulici vakaivunau qaqa. Eso na sere e tukuna na italanoa ni nona bula kei na veiqaravi ni iVakabula. Eso tale e vakavulica na Nona itovonibula, me vaka na Nona vakabauta, Nona inuinui, kei na Nona loloma cecere. Ia na veisere bibi duadua e vakadinadinataka na Nona Veisorovaki tawayalani kei na loloma e drodro mai na ivalavala oya ni veivakabulai.

Na parofita ni Turaga, o Peresitedi Russell M. Nelson, e vakavulica: “[Na ivakatagi] e rawa ni solia e dua na gauna vinaka ni veivakayarayarataki vei ira na gone nira se lalai. Sa tiko na kaukauwa me vakarautaka na kakana vakayalo. E tiko kina na kaukauwa ni veivakabulai. E tu kina na kaukauwa me qarava na sokalou, vakatara vei keda me da vakasamataka na Veisorovaki kei na Vakalesuimai ni kosipeli, vata kei na kena ivakavuvuli ni veivakabulai kei na cakacaka vakalotu vakacerecerei eso. E vakarautaka na kaukauwa kivei keda meda vakaraitaka na vakasama yalomasumasu ka wasei ni ivakadinadina ni dina tabu eso.”

Nida itubutubu, iliuliu, ka qasenivuli, na noda sasaga e oka kina nodra vukei na gone mera rawata na veivakalougatataki yalataki oqo ena noda veivakavulici vakainaki ena dina ni kosipeli ka kunei ena ivakatagi. E vakavuvulitaka talega o Peresitedi Nelson “era rawa ni vulica na gone na ivunau ena gauna era vulica mera lagasere ena kena levu ga e rawa nira vulica kina na ivunau ena dua na kalasi.” Na sere eso oqori e rawa ni vakarautaka e dua na ivakaso ni ivunau sinai ena vakabauta ka na dusi ira na gone vua na iVakabula ka vukei ira mera taracake na yalodina kina Nona kosipeli.

E vakavulica na ivolanikalou ni nodra sere na buladodonu mai vuniyalodra sa ka ni marau vua na iVakabula. Au rawa ni vakasamataka na marau ena kauta mai na domodra na nona tisaipeli gone duadua na iVakabula. Au kila ni nodra sere ena yalomasumasu ena yacovi lomalagi me votuka ni vakabauta ka dau sureta na Yalo Tabu me vakadeitaka na dina tawamudu, sureti ira kina vakamalua ka malumu na tani mera ciqoma na kaci ni noda iVakabula me ra muri Koya ka lesu mai ki vale. Me vaka e vakananuma vei keda o Elder Henry B. Eyring, sai koya na veigauna oya ni vakila na Yalotabu ena cakacaka tiko kina ena noda bula na ivakatakilakila ni Veisorovaki ni iVakabula.

Na sere/ivakatagi ni Lalai e rawa ni dua na cakamana ena ikaukau voli ena gaunisala ni bula vakatisaipeli era na lakova na noda lalai. E dua na sere a vulici ena yabaki ono e tiko kina na kaukauwa me tu ga vei keda—ka rawa ni lesu tale mai ena veiyabaki e muri ena veigauna ni vakataulewa, veitemaki, yaluma, se reki. Rairai ena noda veiyabaki e muri, e rawa ni yaco me iyaqa vakayalo ka vakavoqataka na ivakadinadina ni iApositolo ko Paula ena dei ni nona yalayala na Kalou vei keda. Se ena rawa ni vakananuma vei keda me vaka ni dau dina ena nona yalayala na Kalou, na Nona veiyalayalati e solia na vakacegu kei na dua na ivakaruru ka sureti keda meda laiva na noda inuinui ka yalodei vei Jisu Karisito kei na mana ni Nona veisorovaki.

Lewenilotu uabula e vuravura taucoko, ena veigauna ni dredre, era dau nanuma ka vuki kina sere ni Lalai era vulica ni ra se gone. Vei ira e lewevuqa, na sere eso oqo e tokona na tayavu ni nodra vakabauti Jisu Karisito ka vakavuqa ni oya na imatai ni vanua e tekivu kina na saumaki kina Nona kosipeli. Na itubutubu, iliuliu, kei ira na qasenivuli era a susuga cake na vakabauta ena veiyabaki ena veivakavulici, lagasere, kei na vakadinadina vei ira na gone ena qaqarauni.

E dua na marama e wasea vei au ni dau vakamareqeta na sere ni Lalai, ni oti e 20 na yabaki a vakavinavinakataka ni a vakatotolotaka na nona saumaki mai kina kosipeli i Jisu Karisito. E dua tale na lewenilotu e vakadinadinataka ni Lalai a teivaka na sore ni mosita ni vakabauta ni se gone, sai koya na vuna e rawa kina ni lesu tale mai kina Lotu ni Turaga ni sa yabaki 30 vakacaca. E yalataka na iVakabula, A kaya nio koya na “Dauveivakacegui, ena vakavulici kemudou ena ka kecega kau a vosataka vei kemudou.” Na sere ni ivakatagi ni Lalai e rawa ni dua na sala ena vakayacori kina na yalayala oya.

E dua tale na sere lomani ni Lalai e toboka na mana ni vakabauta rawarawa kei na ivakadinadina tudei:

Nira lagasere na gonelalai, era vakaraitaka tiko na gagadre ni dua na tisaipeli ka vulica na iwalewale ni bulataka na veiyalayalati. Na yalotabu e rawa ni vakayagataka na sereivakatagi me ceuta kina na dina tawamudu ena yalodra malumu. Ia ni toso na gauna, e rawa ni ra digitaka na gone me ra lagasere ka vukica na yalodra kei na nodra bula vei Jisu Karisiro ena nodra cakava ka maroroya na veiyalayalati tabu vata kei Koya.

Na sereivakatagi tabu e rawa ni veivuke me vola na ivunau i Karisito ki yaloda ka vakarautaki keda meda ciqoma na Nona cakacaka vakalotu. E semata na ivunau ni iVakabula kina noda vakanananu ia na vakanananu oya kina noda bula vakatisaipeli Vua.

Nida iliuliu ena Lalai, e noda na madigi kei na itavi tabu me vakadeitaka ni sere/ivakatagi ena Lalai e vakavulici ena reki, ena kilaka vakaivunau kei na Yalotabu. Oqo e okati kina nodra sureti na gonelalai mera vakila na veika era nanuma nira lagasere ka vukea mera raica ni veika oqori e lako mai vua na Yalo Tabu. Na veisasaga oqori e vukea nodra vakarautaki na luveda kina veicakacaka tabu vakalotu me vaka na papitaiso kei na veivakadeitaki, vakakina na vakauqeti ni nodra vakanananu ni veiyalayalati ni ra vakavouya e veigauna na nodra yalayala vua na Kalou.

Ena iOtioti ni Vakayakavi, ni oti nona tekivu vakaurataki na iVakabula na sakaramede, e vola o Maciu ni “ia nira sa sere oti era sa lako yani kina ulunivanua ni veiolive.” E veimacawa, era dau vakarau na lewenilotu yadua era sa papitaiso ka vakadeitaki oti ni Nona Lotu na Turaga, oka kina o ira na gone era sa papitaiso, vei ira sara mada ga na yabaki walu me ra taura na sakaramede ni Turaga. Ena lagati ni veisere tabu, sa soli kina vei ira na veivavakoso ni luveni Kalou na madigi me ra vakarautaka na yalodra me baleta na cakacaka vakalotu tabu oya me ra taura na Yacana, me ra dau nanumi Koya tikoga, ka muria na Nona ivunau.

Kemuni na itokani, au vakadinadinataka ni sere ni Lalai e vakavuvulitaka na veidina kei na ivunau tawamudu ena kauti keda yani vei Jisu Karisito kei na Nona kosipeli. Au sureti kemuni moni vakasamataka na yavutu dina cava soti sa volai e yalomu mai na veivakavuvuli rawarawa ni veisere oqo ka vakadinadinataka na dina oqori vua na nona tisaipeli gone duadua na iVakabula nio vakavulica vei ira na itukutuku vinaka ni kosipeli mai na sere.

Au kila ni Kalou na Tamada, ena Nona loloma tawayalani, e tala mai na Luvena Daulomani me vakavulici keda, me vakaraitaka vei keda na sala, ka vueti keda ena Nona Veisorovaki.

Au kila ni Nona bula kei na nona veiqaravi na iVakabula e ka dina ka vakatamata yadua. E sinai tu na ivolanikalou ena italanoa ni Nona veivakabulai, Nona yalovinaka, kei na Nona cakacaka mana.

Au kila nio Tamada Vakalomalagi e rogoca ka sauma na nodra masu ena yalodina na Luvena, se cava ga na nodra yabaki, kedra ituvaki, se ivosavosa. E rogoca o Koya na vakatakekere malua ni yaloda.

Au vakadinadinataka ni a colata ko Jisu Karisito mai Kecisemani na bibi ni noda ivalavala ca, rarawa kei na mosi. A sotava ena lomasoli na nona vakararawataki ena vuku ni Nona loloma ena vukuda ka rawa kina me da vosoti ka lesu yani ki vale.

Au kila nio keda na luvena dina na Kalou, eda a buli me da ucuya, ka vakalougatataki meda rawa ni yaco me kalou, ka sureti meda lesu ka bula vata kei Koya kevaka eda digia me da muri Jisu Karisito.

Au kila ni o Jisu Karisito na ivakaraitaki uasivi sara, ia ni da muri Koya ena noda veiqaravi, veivosoti, ka lomani ira na tani, eda na yaco me vakataki Koya vakalevu cake e veisiga.

Au kila ni nona valetabu na Turaga na Nona vale e vuravura. E lomadra, eda cakava kina na veiyalayalati tabu, ciqoma na veivakalougatataki tawamudu, ka vulici Koya vakalevu cake ka vakila vakalevu cake na Kena iserau. Na valetabu e dua na vanua ni vuli, vakacegu, kei na vakavakarau ni noda bula.

Au vakadinadinataka ni sasaga eda vakayacora meda vakavulica ka lagata na veisere ni Lalai oqo vei ira na noda gone e sega ni dua walega na tiki totoka ni noda ivalavala vakalotu. Era ivunau vei ira na tisaipeli i Jisu Karisito, ivakadinadina ni dina ni kosipeli vakalesui mai, kei na masu ena sereivakatagi. Na sereivakatagi tabu e rawa ni vakacilava na Rarama i Karisito vei koya e rogoca ka rawa ni sovaraka ki yalona o koya e lagata. Kemuni na itokani, se vinakata tikoga o Jisu me da dua na matanisiga. Au vakadinadinataka ena yaca tabu i Jisu Karisito, emeni.